លោក លី ស្រៀងខេង ផ្តល់បទសម្ភាសន៍ដល់ VOD (រូបថត៖ ណាត សុភាព)
អង្គការ ចំនួន៥ ស្នើឲ្យ តុលាការ ស៊ើបអង្កេត ករណី ពលរដ្ឋ មានជម្លោះដីធ្លីជាមួយ ក្រុមហ៊ុន ឃុន សៀ
ដោយ៖ ណាត សុភាព / វីអូឌី | ថ្ងៃអង្គារ ទី18 ខែមិនា ឆ្នាំ2014
អង្គការចំនួន៥ អំពាវនាវឲ្សសាលាដំបូងរាជធានីភ្នំពេញ ស៊ើបអង្កេតជាបន្ទាន់និងឯករាជ្យទៅលើការចោទប្រកាន់នៃការយាយីនិង ការគំរាមកំហែងលើពលរដ្ឋ៤គ្រួសារនៅតំបន់បឹងកក់១ ខណ្ឌទួលគោកដែលមានជម្លោះជាមួយក្រុមហ៊ុន ឃុន សៀ។
អង្គការទាំងនោះរួមមាន សមាគមអាដហុក មជ្ឈមណ្ឌលសិទ្ធិមនុស្សកម្ពុជា អង្គការCHRAC ក្រុមការងារពិសេសសិទ្ធិលំនៅឋាន និងអង្គការអភិវឌ្ឍន៍សំឡេងសហគមន៍។
សេចក្តីថ្លែងការណ៍រួម នៃអង្គការចំនួន៥នេះ ធ្វើឡើងបន្ទាប់ពីពលរដ្ឋ១គ្រួសារក្នុងចំណោម៤គ្រួសាររស់នៅសង្កាត់ បឹងកក់១ ខណ្ឌទួលគោក ដែលមានជម្លោះដីធ្លីជាមួយក្រុមហ៊ុន ឃុន សៀ កំពុងបារម្ភពីសុវត្ថិភាព ខណៈសន្តិសុខក្រុមហ៊ុននេះ ២ទៅ៣នាក់ ត្រូវបានចោទថា បានចូលដុតទ្វារមុខបន្ទប់របស់ពលរដ្ឋដែលមានទំនាស់នោះ។
ប្រធានលេខាធិការដ្ឋាន ប្រព្រឹត្តកម្ម នៃសមាគម ការពារសិទ្ធិមនុស្សនៅកម្ពុជានៃអង្គការមួយ ក្នុងចំណោមអង្គការចំនួន៥នោះលោក សួន ប៊ុនស័ក្តិមានប្រសាសន៍ថា មានការយាយីជាបន្តបន្ទាប់ទៅលើពលរដ្ឋទាក់ទងនឹងទំនាស់ដីធ្លីជាមួយ ក្រុម ហ៊ុនឃុន សៀ ដោយសារតែក្រុមហ៊ុនមួយនេះ មានទំនាស់ជាមួយប្រជាពលរដ្ឋ៤គ្រួសារ។ លោកថា ដើម្បីធានាសុវត្ថិភាព គឺសាលាដំបូងរាជធានីភ្នំពេញ ត្រូវស៊ើបអង្កេតជាបន្ទាន់និងឯករាជ្យទៅលើបណ្តឹងនេះ ដើម្បីធានាឯករាជ្យភាពនៃតុលាការនិងការគោរពសិទ្ធិមនុស្ស និងនីតិរដ្ឋនៅកម្ពុជា «អ៊ីចឹងសេចក្តីថ្លែងការណ៍នេះ គឺក្នុងគោលបំណង ឲ្យអាជ្ញាធររដ្ឋបើកការស៊ើបអង្កេតគឺដើម្បី ឲ្យធានានូវសេចក្តីសុខ សេចក្តីស្ងប់ស្ងាត់ ជីវិតរស់រាន សិទ្ធិរស់រានមានជីវិតរបស់បុគ្គលនោះ ប្រជាពលរដ្ឋម្នាក់នៅក្នុងសង្គមហ្នឹង។ ហើយទី២ គឺដើម្បីពង្រឹងការគោរពសិទ្ធិមនុស្ស ដើម្បីពង្រឹងនិតីរដ្ឋ នៅក្នុងការគ្រប់គ្រងរដ្ឋទាំងមូលនៅប្រទេសកម្ពុជាយើង»។
ព្រះរាជ្ញារងអម សាលាដំបូងភ្នំពេញលោក មាស ច័ន្ទពិសិដ្ឋ ដែលកាន់សំណុំរឿងនេះ មិនបានអត្ថាធិប្បាយទេនៅព្រឹកថ្ងៃអង្គារនេះ ដោយសារលោក ជាប់រវល់ប្រជុំ។
ក្នុងសន្និសីទកាលពីរសៀលថ្ងៃចន្ទម្សិលមិញ ម្ចាស់ផ្ទះ លោក លី ស្រៀខេង អះអាងថា ក្រុមសន្តិសុខ ២ទៅ៣នាក់ របស់ក្រុមហ៊ុន ឃុន សៀ បានចូលដុតទ្វាមុខបន្ទប់របស់គាត់ ប៉ុនប៉ងសម្លាប់១គ្រួសារ តែ សំណាងល្អមិនមានអ្នកណារងរបួស ឬខូចខាតធ្ងន់ធ្ងរឡើយ ដោយសារមានអ្នកដំណើរពីនាក់ ចុះពីលើរថយន្តជួយពន្លត់ទាន់ពេល កាលពីម៉ោង២:៣០នាទីជិតភ្លឺកាលពីថ្ងៃចន្ទនេះ។
គ្រួសារ លោក លី ស្រៀខេងធ្លាប់ចោទក្រុមហ៊ុន ឃុន សៀ ថាបានព្រលែងពស់វែកចំនួន៤ក្បាលចូលផ្ទះគាត់ កាលពីយប់ថ្ងៃទី៣០ខែតុលា ឆ្នាំ២០១៣និងធ្លាប់គំរាមបោកគ្រាប់បែកចូលផ្ទះគាត់ផងដែរ។ បន្ទាប់មកនៅថ្ងៃទី៤ ខែវិច្ឆិកា ឆ្នាំ២០១៣ លោក ស្រៀខេង បានប្តឹងក្រុមហ៊ុនពីបទប៉ុនប៉ងមនុស្សឃាតដោយចេតនាប៉ុន្តែតុលាការ បែរជាស្នើឲ្យគាត់ប្តឹងជនមិនស្គាល់មុខមួយរូប នៃក្រុមហ៊ុននេះទៅវិញ៕
No comments:
Post a Comment