កុមារសុំទាន ពីរនាក់ បងប្អូន អង្គុយក្បែរ វិមានឯករាជ្យ រាជធានីភ្នំពេញ នៅថ្ងៃ ទី២ មីនា ឆ្នាំ២០១៤។ RFA/Uon Chhin
បទវិភាគ៖ តើ កម្ពុជា មានសមត្ថភាព ទទួលយក ជនភៀសខ្លួន ហើយ ឬនៅ?
RFA | 2 March 2014
ក្រោមហេតុផល សំអាងថា ដើម្បី ទប់ស្កាត់ ជនបរទេស ធ្វើដំណើរ ឆ្លងកាត់ មហាសមុទ្រ ពោរពេញទៅ ដោយគ្រោះថ្នាក់ មកកាន់ប្រទេស អូស្ត្រាលី, រដ្ឋាភិបាល អូស្ត្រាលី បានព្យាយាម បញ្ចុះបញ្ចូល កម្ពុជា ឲ្យជួយរំលែកបន្ទុក ទទួលយក ជនភៀសខ្លួន ខ្លះៗ ដែលកំពុង ស្នាក់នៅ ក្នុងប្រទេស របស់ខ្លួន។
ក្នុងដំណើរ ទស្សនកិច្ច មក កម្ពុជា កាលពីថ្ងៃសៅរ៍ ទី២២ កុម្ភៈ ឆ្នាំ២០១៤, រដ្ឋមន្ត្រី ក្រសួង ការបរទេស អូស្ត្រាលី, លោកស្រី ជូលី ប៊ីហ្សប (Julie Bishop) បានស្នើ ទៅលោក
ចំណែករដ្ឋមន្ត្រីការបរទេសកម្ពុជា លោក ហោ ណាំហុង បានប្រាប់អ្នកកាសែតថា កន្លងមកពលរដ្ឋខ្មែរធ្លាប់តែជាអ្នកសុំសិទ្ធិជ្រកកោននៅប្រទេសដទៃ ឥឡូវល្មមដល់ពេលហើយដែលកម្ពុជា គួរបើកទ្វារទទួលយកជនភៀសខ្លួនម្ដង។
និយាយពីសមត្ថភាពទទួលជនភៀសខ្លួន កម្ពុជាទំនងជាមិនទាន់ស័ក្ដិសមពេញលេញជាអ្នកគ្រប់គ្រងជនភៀសខ្លួន នៅឡើយទេ។ ពោល កម្ពុជាមិនមែនជាប្រទេសដែលមានសេដ្ឋកិច្ចឯករាជ្យ ម្ចាស់ការលើខ្លួនឯងនោះទេ។ និយាយអោយចំ កម្ពុជាកំពុងសុំទាន និងខ្ចីបុលគេដើម្បីរស់ពីមួយឆ្នាំទៅមួយឆ្នាំ ខណៈមន្ត្រីរាជរដ្ឋាភិបាលជាន់ខ្ពស់មួយចំនួនមានបានកប់ពពកតាមរយៈ អំពីពុករលួយ ស្របពេលដែលរដ្ឋាភិបាលអសមត្ថភាពក្នុងការដោះស្រាយបញ្ហាចំពោះមុខ រាប់សិបជំពូក។ បញ្ហាទាំងនោះ រួមមានប្រជាពលរដ្ឋកម្ពុជាម្នាក់ ក្នុងចំណោម ៥នាក់ រស់នៅក្រោមបន្ទាត់ក្រីក្រ។ កុមារជិត ៥០ភាគរយរស់នៅខ្វះអាហារដែលមានជីវជាតិដើម្បីលូតលាស់នៃរាងកាយ។ ប្រាក់ខែមន្ត្រីរាជការតិចតួច រស់ទាំងត្រដរខ្យល់ ហើយថែមទាំងបើកយឺតទៀត។ បើខ្លួនក្ររហេមរហាមបែបនេះទៅហើយ តើត្រូវទទួលយកជនភៀសខ្លួនមកបន្ថែមបន្ទុកដែរទេ?
បើនិយាយពីទីផ្សារការងារវិញ រដ្ឋាភិបាលកម្ពុជា ខ្លួនឯងមិនមានសមត្ថភាពក្នុងការបង្កលក្ខណៈបង្កើតការងារអោយ សមាមាត្រនឹងចំនួនពលរដ្ឋរបស់ខ្លួនផង។ និស្សិតរាប់ម៉ឺននាក់ក្នុងមួយឆ្នាំៗ ក្រោយពីបញ្ចប់ការសិក្សាមិនអាចរកការងារធ្វើបាន។ ពលរដ្ឋខ្មែររាប់ម៉ឺននាក់ត្រូវធ្វើចំណាកស្រុកទៅរកការងារធ្វើនៅ ប្រទេសដទៃ។ ម៉្យាងទៀត ប្រសិនបើអ្នកសុំសិទ្ធិជ្រកកោនទាំងនោះមិនមែនជាធនធានមនុស្ស ហើយជាមនុស្សមិនល្អថែមទៀតនោះ វាអាចនឹងបន្ថែមបញ្ហាដល់សង្គមកម្ពុជា កាន់តែខ្លាំង។
បើនិយាយអំពីចិត្តល្អវិញ រដ្ឋាភិបាលកម្ពុជា មិនមែនជាប្រទេសដែលគោរពសិទ្ធិមនុស្ស ឬច្បាប់មនុស្សធម៌អីនោះទេ។ កាលពីឆ្នាំ២០០៩ រដ្ឋាភិបាលក្រុងភ្នំពេញ ដើម្បីផ្គាប់ចិត្តរដ្ឋាភិបាលក្រុងប៉េកាំង បានចាប់បញ្ជូនជនភៀសខ្លួនអ៊ុយហ្គរ៍ ចំនួន ២០នាក់ អោយត្រឡប់ទៅប្រទេសចិនវិញ។ ក្រោយពេលត្រឡប់ទៅដល់ប្រទេសចិន ជាទីកន្លែងដែលពួកគេបានរត់គេចចេញពីការធ្វើទុក្ខបុកម្នេញរបស់ អាជ្ញាធរចិន ជនភៀសខ្លួនអ៊ុយហ្គរ៍ ចំនួន ៤នាក់ ក្នុងចំណោម ២០នាក់ ត្រូវគេជឿថា ត្រូវបានអាជ្ញាធរចិន ប្រហារជីវិត និង ១៦នាក់ទៀត ត្រូវជាប់ពន្ធនាគារ។
ក្រៅតែពីផ្គាប់ចិត្តមហាអំណាចចិន ដែលតែងផ្ដល់ជំនួយមិនដែលភ្ជាប់លក្ខខណ្ឌដល់កម្ពុជានោះ រដ្ឋាភិបាលរបស់លោកនាយករដ្ឋមន្ត្រី ហ៊ុន សែន ក៏បានរំលោភសន្ធិសញ្ញាការពារជនភៀសខ្លួនដែលកម្ពុជា ជាហត្ថលេខី ដើម្បីផ្គាប់ចិត្តរដ្ឋាភិបាលវៀតណាម ដោយបានចាប់បញ្ជូនជនភៀសខ្លួនម៉ុងតាញ៉ា ពីខេត្តរតនគិរី ជាច្រើនរយនាក់ ដែលបានរត់គេចពីការធ្វើទុក្ខបុកម្នេញរបស់អាជ្ញាធរក្រុងហាណូយ បង្ខំអោយត្រឡប់ចូលទៅវៀតណាមវិញ។ ជនភៀសខ្លួនទាំងឡាយតែងតែព្យាយាមរត់គេចចេញពីការធ្វើ ទុក្ខបុកម្នេញ និងការគាបសង្កត់លើផ្នែកជំនឿនានា ពីក្នុងប្រទេសរបស់ខ្លួនទៅកាន់ប្រទេសណាដែលមានភាពល្អប្រសើរជាង។
បើនិយាយពីសិទ្ធិពលរដ្ឋ និងសិទ្ធិនយោបាយវិញ រដ្ឋាភិបាលកម្ពុជា កំពុងរឹតត្បិត និងថែមទាំងបាញ់សម្លាប់បាតុករគ្មានត្រាប្រណីនៅពេលថ្មីៗនេះ។ ប្រព័ន្ធផ្សព្វផ្សាយតុលាការ និងកងកម្លាំងប្រដាប់អាវុធ មិនឯករាជ្យដូចដែលមានចែងក្នុងរដ្ឋធម្មនុញ្ញ ប៉ុន្តែស្ថិតក្រោមក្រញាំដៃរបស់គណបក្សកាន់អំណាច។ សម្រាប់ជនភៀសខ្លួនប្រហែលជាមិនដែលនឹកស្រមៃថា អាចនឹងត្រូវគេបញ្ជូនអោយទៅរស់នៅក្នុងប្រទេសកម្ពុជាទេ។
អូស្ត្រាលីជាប្រទេសមួយក្នុងចំណោមប្រទេសជឿនលឿនឯទៀតដែលបាន ផ្ដល់សិទ្ធិរស់នៅដល់ជនភៀសខ្លួន។ ក្នុងឆ្នាំ២០១០ និងឆ្នាំ២០១១ ជនបរទេសដែលសុំសិទ្ធិជ្រកកោននៅប្រទេសអូស្ត្រាលី មានចំនួនជាងមួយម៉ឺននាក់ (១១.៤៩១)។ អ្នកស្វែងរកសិទ្ធិជ្រកកោននៅក្នុងប្រទេសអូស្ត្រាលី មានមកពីប្រទេសអ៊ីរ៉ាក់ អ៊ីរ៉ង់ ស៊ូដង់ ភូមាឬមីយ៉ាន់ម៉ា ចិន ស្រីលង្កា អាហ្វហ្គានីស្ថាន ប៉ាគីស្ថាន សូម៉ាលី នេប៉ាល់ និងឥណ្ឌូនេស៊ី ជាដើម។
ក៏ប៉ុន្តែហេតុអ្វីបានជារដ្ឋាភិបាលអូស្ត្រាលី ជ្រើសរើសកម្ពុជា ជាគោលដៅសម្រាប់យកជនភៀសខ្លួនមកទម្លាក់នោះ?
កម្ពុជាមិនមែនជាប្រទេសទី១ទេដែលរដ្ឋាភិបាលអូស្រ្តាលី ចង់យកជនភៀសខ្លួនមកដាក់នោះ។ ប្រទេសក្នុងតំបន់ មានប្រទេសម៉ាឡេស៊ី ដែលបានទទួលយកជនភៀសខ្លួនជាច្រើនពីប្រទេសអូស្ត្រាលី រួចទៅហើយ។
រដ្ឋាភិបាលអូស្ត្រាលី ហ៊ានហាមាត់សុំអោយកម្ពុជា ជួយរំលែកអម្រែកបន្ទុកជនភៀសខ្លួន ប្រហែលជាដោយសារហេតុផលមួយចំនួនដូចជា៖
រដ្ឋាភិបាលអូស្ត្រាលី អាចគិតថា ខ្លួនបានជួយដល់កម្ពុជា ជាច្រើន និងជាយូរឆ្នាំមកហើយ។ ដូច្នេះវាល្មមដល់ពេលកម្ពុជា សងគុណវិញហើយ។ ឬក៏អាចថា អូស្ត្រាលីធ្លាប់ទទួលយកជនភៀសខ្លួនខ្មែរអោយទៅរស់នៅក្នុងប្រទេស របស់ខ្លួននៅពេលកម្ពុជា ជួបគ្រោះអាសន្នដែរ។ ម៉្យាងទៀត ក្រោយការបោះឆ្នោតសភាជាតិនៅកម្ពុជា ឆ្នាំ២០១៣ ខណៈមានការរិះគន់ខ្លាំងអំពីការលួចបន្លំសន្លឹកឆ្នោត និងប្រទេសលោកសេរីមួយចំនួនមិនទាន់ទទួលស្គាល់លទ្ធផលបោះឆ្នោត រហូតមកដល់ពេលនេះ នាយករដ្ឋមន្ត្រីអូស្ត្រាលី លោក តូនី អាបត (Tony Abbot) នៅខែតុលា ឆ្នាំ២០១៣ បានផ្ញើលិខិតអបអរសាទរមួយដល់លោកនាយករដ្ឋមន្ត្រី ហ៊ុន សែន ដែលលោកថា បានឈ្នះឆ្នោត។ ការសាទររបស់នាយករដ្ឋមន្ត្រីអូស្ត្រាលី លោក តូនី អាបត ចំពោះលោកនាយករដ្ឋមន្ត្រី ហ៊ុន សែន ត្រូវបានបក្សនយោបាយប្រឆាំងនៅអូស្ត្រាលី រិះគន់យ៉ាងចាស់ដៃ។
គេអាចនិយាយបានថា ទង្វើរបស់នាយករដ្ឋមន្ត្រីអូស្ត្រាលី លោក តូនី អាបត ប្រហែលជាចង់ "បោះនុយតូចដើម្បីស្ទូចត្រីធំ"។ ពោលគឺនាយករដ្ឋមន្ត្រីអូស្ត្រាលីរូបនេះ មានបំណងទុកជាមុន គឺកសាងទំនាក់ទំនងល្អជាមួយលោក ហ៊ុន សែន ដើម្បីត្រួសត្រាយផ្លូវសម្រាប់ស្នើសុំប្រមុខរដ្ឋាភិបាលកម្ពុជា រូបនេះ អោយយល់ព្រមទទួលយកអម្រែកជនភៀសខ្លួនពីអូស្ត្រាលី។
ចុះតើកម្ពុជា អាចមានប្រយោជន៍អ្វីដែរពីការទទួលយកជនភៀសខ្លួនពីប្រទេសអូស្ត្រាលីនេះ?
មិនមែនថា អត់ចំណេញមកកម្ពុជា សោះនោះទេ។ ប៉ុន្តែបញ្ហានៅត្រង់ថា តើមេដឹកនាំកម្ពុជា ឆ្លាតឈ្លាសវៃ និងគិតពីផលប្រយោជន៍ជាតិជាធំឬទេ?
រដ្ឋាភិបាលថៃ កាលពីចុងទសវត្សឆ្នាំ១៩៧៩ បានយល់ព្រមតាមសំណើរបស់សហគមន៍អន្តរជាតិ អនុញ្ញាតអោយជនភៀសខ្លួនខ្មែរ និងពីប្រទេសដទៃទៀតរាប់សែននាក់ តាំងទីលំនៅបណ្ដោះអាសន្ននៅតាមព្រំដែននិងនៅក្នុងទឹកដីរបស់ខ្លួន។
ការយល់ព្រមអោយបង្កើតជំរំជនភៀសខ្លួននោះ មិនមែនជាការយល់ព្រមដោយទទេៗនោះទេ។ ក្រៅតែពីទាមទារយកលុយមួយចំនួនធំពីសហគមន៍អន្តរជាតិហើយ រដ្ឋាភិបាលថៃ បានតម្រូវអោយសហគមន៍អន្តរជាតិជាអ្នកចំណាយទាំងអស់លើស្បៀងអាហារ និងទីជម្រកដល់ជនភៀសខ្លួន។ សហគមន៍អន្តរជាតិត្រូវតែទិញស្បៀងអាហារ សម្ភារៈសំណង់ និងវត្ថុផ្សេងៗទៀត ដែលត្រូវផ្ដល់អោយជនភៀសខ្លួននោះពីប្រទេសថៃ ដោយមិនអាចទិញពីប្រទេសផ្សេងបានឡើយ។
ម៉្យាងទៀត សម្ភារៈជំនួយខ្លះត្រូវចែកទៅអោយពលរដ្ឋថៃ ដែលរស់នៅជិតព្រំដែនក្បែរជំរំជនភៀសខ្លួនដែរ។ សម្រាប់ប្រទេសថៃ មានត្រឹមតែទីកន្លែងសម្រាប់អោយជនភៀសខ្លួនរស់នៅប៉ុណ្ណោះ។ ក្រៅពីនេះ វត្តមានជនភៀសខ្លួននៅតាមព្រំដែន និងក្នុងប្រទេសថៃ ក៏បានជួយបង្កើតទីផ្សារការងារអោយប្រជាពលរដ្ឋថៃ បានជាច្រើនអនេកទៀតផង។ ពេលនោះហើយដែលសេដ្ឋកិច្ចថៃ បានស្ទុះលឿនទៅមុខយ៉ាងខ្លាំងក្លា។
សម្រាប់រដ្ឋាភិបាលកម្ពុជា នៅពេលទទួលយកជនភៀសខ្លួនពីអូស្ត្រាលីនោះ គឺកម្ពុជាអាចបង្កើនទំនាក់ទំនងជាមួយអូស្ត្រាលី កាន់តែប្រសើរ។ ហើយប្រសិនបើជនភៀសខ្លួនទាំងនោះជាធនធានមនុស្សល្អ ពួកគេនឹងជួយរួមចំណែកកសាងកម្ពុជា អោយរុងរឿងនៅក្នុងថ្ងៃអនាគត។
ក៏ប៉ុន្តែការទទួលយកជនភៀសខ្លួនមកដាក់អោយរស់នៅក្នុងប្រទេស កម្ពុជា ខណៈប្រទេសក្រីក្រមួយនេះ កំពុងប្រឈមនឹងបញ្ហាជាច្រើនដែលរដ្ឋាភិបាលបច្ចុប្បន្ន មិនមានសមត្ថភាពដោះស្រាយនោះ វាអាចកាន់តែធ្វើអោយសង្គមកម្ពុជា ជួបការលំបាកកាន់តែខ្លាំង។ បញ្ហាដោះស្រាយមិនបានដែលគេឯងមើលឃើញស្ទើរគ្រប់គ្នានោះ រួមមាន៖ ការអនុវត្តច្បាប់មិនស្មើគ្នា មានច្បាប់អន្តោប្រវេសន៍ជាដើម ខ្វះខាតទីផ្សារការងារជំរុញអោយពលរដ្ឋខ្មែរធ្វើចំណាកស្រុក ប្រាក់ខែមន្ត្រីរាជការរស់នៅមិនថ្លៃថ្នូរ អំពើពុករលួយញាំញីសង្គម និស្សិតរាប់ម៉ឺននាក់រកការងារមិនបានធ្វើ ជាពិសេសកម្ពុជា នៅសុំនិងខ្ចីបុលគេជារៀងរាល់ឆ្នាំជាដើម៕
No comments:
Post a Comment