លោក សម រង្ស៊ី ប្រធានគណបក្សសង្គ្រោះជាតិ ចូលរួមពិធីបង្សុកូលឧទ្ទិសកុសលជូនអ្នកស្លាប់ក្នុងព្រឹត្តិការណ៍ផ្ទុះគ្រាប់បែកនៅមុខអគាររដ្ឋសភាចាស់ នៅព្រឹកថ្ងៃទី៣០ មីនា ឆ្នាំ២០១៤។
RFA/Uon Chhin
បក្សប្រឆាំង ថា អ្នកដែល បញ្ជា ឲ្យគប់គ្រាប់បែកនៅមុខសភាចាស់ ត្រូវគេ ស្គាល់ ជាទូទៅ
ដោយ ម៉ម មុនីរតន៍ / អាស៊ីសេរី | ៣០ មីនា ២០១៤
នៅថ្ងៃទី៣០ មីនា មន្ត្រី ជាន់ខ្ពស់ គណបក្ស សង្គ្រោះជាតិ ប្រកាសនៅមុខចេតិយរំលឹកវិញ្ញាណក្ខន្ធ អ្នកដែលស្លាប់ ដោយសារ ត្រូវគេគប់គ្រាប់បែកដៃ កាលពី ១៧ឆ្នាំមុនថា អ្នកដែលបញ្ជា និងសម្លាប់ ប្រជាពលរដ្ឋ កម្ពុជា បណ្ដាលឲ្យមាន អ្នកស្លាប់ និងរងរបួស ប្រមាណជិត ២០០នាក់នោះ ត្រូវគេដឹង និងស្គាល់មុខ ជាទូទៅច្បាស់អស់ ហើយមកដល់ពេលនេះ។ ក៏ប៉ុន្តែថា ភាពយឺតយ៉ាវ ដែលមិនអាច នាំអ្នកប្រព្រឹត្តបទល្មើស មកផ្ដន្ទាទោសបាន នៅពេលនេះ ដោយហេតុថា ជនដៃដល់ កំពុងនៅមាន អំណាច និងឥទ្ធិពល នៅឡើយ។
ថ្លែងទៅកាន់អ្នកគាំទ្រប្រមាណ ២ពាន់នាក់ ដែលចូលរួមរំលឹកព្រឹត្តិការណ៍គប់គ្រាប់បែកដៃកាលពី ១៧ឆ្នាំមុន មេដឹកនាំគណបក្សសង្គ្រោះជាតិ អះអាងថា អ្នកដែលបញ្ជាឲ្យសម្លាប់ប្រជាពលរដ្ឋកម្ពុជា និងអ្នកប្រព្រឹត្តដោយផ្ទាល់ នឹងត្រូវប្រឈមមុខពីបទឧក្រិដ្ឋ ដែលធ្វើឲ្យជីវិតប្រជាជនកម្ពុជា មិនតិចជាង ១០០នាក់ស្លាប់ និងរងរបួស ក្នុងព្រឹត្តិការណ៍គប់គ្រាប់បែកដៃ នៅមុខអតីតអាគាររដ្ឋសភា ក្បែរសួនច្បារវត្តបទុមវតី។
លោក កឹម សុខា អនុប្រធានគណបក្សសង្គ្រោះជាតិ ឲ្យដឹងនៅព្រឹកថ្ងៃទី៣០ មីនា ថា នៅពេលរដ្ឋាភិបាលអនុវត្តច្បាប់ដោយពេញលេញ និងប្រទេសមានយុត្តិធម៌សង្គមដ៏ពិតប្រាកដ ពេលនោះឃាតកដែលសម្លាប់ប្រជាពលរដ្ឋនឹងចៀសមិនផុតពីការទទួលខុសត្រូវចំពោះមុខច្បាប់ឡើយ។ ការព្រមានដោយមិនសំដៅឈ្មោះរបស់លោក កឹម សុខា ដែលអះអាងថា មេឃាតក និងបរិវារ ត្រូវបានគេស្គាល់មុខអស់ហើយនោះ ទំនងជាមានជាប់ពាក់ព័ន្ធនឹងមេដឹកនាំជាន់ខ្ពស់ក្នុងរដ្ឋាភិបាលបច្ចុប្បន្ននេះ។
លោក កឹម សុខា៖ «ដោយសារឃាតកនៅមានអំណាចរឹងមាំនៅឡើយ មិនទាន់បាត់បង់អំណាច។ដូច្នេះហើយដោយសារសង្គមរបស់យើង តុលាការមិនមានយុត្តិធម៌ យើងមិនទាន់ចាប់យកឃាតកទាំងនោះយកមកផ្ដន្ទាទោសឲ្យបានពេញចិត្តនឹងវិញ្ញាណក្ខន្ធរបស់វីរបាតុករយើង។ ក៏ប៉ុន្តែ យើងខ្ញុំមានក្តីសង្ឃឹមថា ថ្ងៃណាមួយឃាតកដែលសម្លាប់វីរបាតុករយើងនឹងដេកក្នុងជាមិនខាន»។
ពិធីរំលឹកខួបការគប់គ្រាប់បែកដៃ កាលពី ១៧ឆ្នាំមុន នៅព្រឹកថ្ងៃទី៣០ មីនា នៅមុខចេតិយសួនច្បារវត្តបទុមវតី ក្រៅពីមេដឹកនាំថ្លែងសារនយោបាយ និងជនរងគ្រោះថ្លែងវិយោគកថាហើយ លើលពីនេះទៀត ក៏មានរៀបចំពិធីតាមបែបសាសនា និងរាប់បាត្រព្រះសង្ឃថែមទៀតផង។
ព្រឹត្តិការណ៍ថ្ងៃទី៣០ មីនា ឆ្នាំ១៩៩៧ ដែលដឹកនាំដោយលោក សម រង្ស៊ី អតីតប្រធានគណបក្សជាតិខ្មែរ មានមនុស្ស ១៦នាក់បានស្លាប់ និងជិត ២០០នាក់ទៀតរងរបួស។ ហេតុការណ៍កាលណោះ មានគ្រាប់បែកដៃចំនួន ៤គ្រាប់ត្រូវបានគប់ចូលក្នុងហ្វូងបាតុករ ដែលឈនៅមុខរដ្ឋសភាចាស់ ខណៈពួកគេទាមទារឲ្យតុលាការអនុវត្តការងារដោយយុត្តិធម៌ និងកាត់ក្ដីដោយតម្លាភាព មិនត្រូវរើសអើងអ្នកធំ ឬអ្នកតូចតាចអ្វីឡើយ។
លោក សម រង្ស៊ី ប្រធានគណបក្សសង្គ្រោះជាតិ អះអាងថា មានមេដឹកនាំសព្វថ្ងៃមួយចំនួន និងអ្នកតែងការពារអតីតមេដឹកនាំក្នុងរបបខ្មែរក្រហមផង នឹងមិនអាចគេចផុតពីសំណាញ់ច្បាប់ឡើយ។លោកចាត់ទុកថា មេដឹកនាំនោះអាចមានទោស ព្រោះប្រឆាំងការរារាំងចំពោះការប្រព្រឹត្តទៅរបស់តុលាការ។ លោកបន្តថា មានទឡ្ហីករណ៍រួចមកហើយ ដែលតុលាការខ្មែរក្រហ មិនអាចបំពេញកិច្ចការរបស់ខ្លួនដោយឯករាជ្យ ដូចជាសំណុំរឿងពាក់ព័ន្ធនឹងអតីតរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ព្រមទាំងឧបនាយករដ្ឋមន្ត្រីក្រសួងការបរទេសផង។
លោក សម រង្ស៊ី៖ «តុលាការកាត់ទោសមេដឹកនាំខ្មែរក្រហមបានកោះលោក ហៅ ណាំហុង ឧបនាយករដ្ឋមន្ត្រី រដ្ឋមន្ត្រីក្រសួងការបរទេស គេកោះហៅស្រុកគេណា តែចៅក្រុមកោះហើយ បើអត់ទៅទេជាប់គុក។ តែនៅស្រុកយើង អាងតែខ្លួនឯងធ្វើអី អំណាចស្អី តុលាការគឺគេអត់គិតទេរឿងហ្នឹង។ ហៅអត់ទៅ ពីព្រោះមានមេម្នាក់ការពារ ថាកុំទៅ មិនចាំបាច់ទៅ។ អ៊ូ! អាហ្នឹងងាប់ទាំងឪ ងាប់ទាំងកូនហើយ។ ម្នាក់ទៀតឈ្មោះលោក គាត ឈន់ ជាឧបនាយករដ្ឋមន្ត្រីផង ឥឡូវគេឲ្យការងារជាឧបនាយករដ្ឋមន្ត្រីអី អចិន្ត្រៃយ៍ណាស់ វាមិនដែលឃើញឧបនាយករដ្ឋមន្ត្រីអចិន្ត្រៃយ៍ ធ្លាប់កាន់ក្រសួងក្រសួងសេដ្ឋកិច្ច និងហិរញ្ញវត្ថុ ហើយធ្លាប់ធ្វើដៃស្កាំ ប៉ុល ពត»។
បដិសេធនឹងការចោទប្រកាន់នេះ រដ្ឋលេខាធិការនៃទីស្ដីការគណៈរដ្ឋមន្ត្រី លោក ផៃ ស៊ីផាន ចាត់ទុកថា សាររបស់មេបក្សប្រឆាំងនេះ ពុំមានឥទ្ធិពលអ្វីចំពោះការបំពេញកិច្ចការដោយឯករាជ្យរបស់តុលាការក្នុងពេលបច្ចុប្បន្ន។ ហើយរដ្ឋាភិបាលក៏ពុំដែលលូកលាន់ណាមួយចូលក្នុងកិច្ចការរបស់ប្រព័ន្ធយុត្តិធម៌នោះម្ដងណាដែរ។
លោកចាត់ទុកថា នេះជាទម្លាប់របស់លោក សម រង្ស៊ី ប៉ុណ្ណោះ៖ «ខ្ញុំដូចជាគ្មានអីភ្ញាក់ផ្អើលទេ សំដីរបស់ឯកឧត្ដម សម រង្ស៊ី។ គាត់និយាយតាំងពីគាត់ចូលមកកាន់ស្រុកខ្មែរ គាត់និយាយអ៊ីចឹង តាំងពីដើមទីមក។ វាអត់មានអ្វីប្លែក សារដដែល អត់មានធ្វើឲ្យមានការភ្ញាក់ផ្អើលដល់អ្នកដទៃទៀត»។
ចំណែកអតីតជំទប់ទីពីរគណបក្សប្រឆាំង នៅឃុំបែកចាន ស្រុកអង្គស្នួល ខេត្តកណ្ដាល អ្នកស្រី ទៅ ហេង ដែលមានកូនស្រី ២នាក់ស្លាប់ក្នុងព្រឹត្តិការណ៍កាលពី ១៧ឆ្នាំមុន ក្នុងចំណោមជនរងគ្រោះមួយចំនួនទៀត ទទូចសុំឲ្យរដ្ឋាភិបាលគប្បីបើកការស៊ើបអង្កេតដោយស្មោះត្រង់ ដើម្បីនាំយកអ្នកបញ្ជា និងឃាតកមកផ្ដន្ទាទោសឲ្យបានឆាប់។
លោកឧត្ដមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ អះអាងថា ស្ថាប័នជំនាញរបស់រដ្ឋាភិបាលពុំដែលព្រងើយកន្តើយក្នុងការស្រាវជ្រាវរកជនដៃដល់ម្ដងណាឡើយ ហើយសំណុំរឿងព្រហ្មទណ្ឌនេះទៀតសោត កំពុងស្ថិតនៅក្នុងដែនសមត្ថកិច្ចរបស់អាជ្ញាធរនៅឡើយដែរ៖ «ថាឯកឧត្ដមឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកគឺថា មិនទាន់បិទសំណុំរឿងនេះនៅឡើយទេ។ បានសេចក្ដីថា សំណុំរឿងនេះ យើងហៅថា ករណី ៣០៣ នេះនៅតែដំណើរការបើកចំហនៅឡើយ»។
និយាយពីក្រុមអាជ្ញាធរមានសមត្ថកិច្ចរបស់រដ្ឋាភិបាលវិញ របាំងការពារផ្លូវ ត្រូវបានពង្រាយយ៉ាងតឹងរ៉ឹងនៅតាមច្រកចូលសំខាន់ៗ និងមហាវិថីមួយចំនួន ដែលចូលមកកាន់ពិធី។
បញ្ហានេះ លោក មឿន តុលា ប្រធានកម្មវិធីសិទ្ធិការងារនៅមជ្ឈមណ្ឌលអប់រំច្បាប់សម្រាប់សហគមន៍ ដែលឃ្លាំមើលព្រឹត្តិការណ៍កាលពីព្រឹកថ្ងៃទី៣០ មីនា មានប្រសាសន៍ថា នេះជាការអនុវត្តរំលោភច្បាប់ ដែលរដ្ឋាភិបាលតែងអនុវត្តក្នុងពេលកន្លងទៅនេះ៖ «ខ្ញុំមើលឃើញរដ្ឋាភិបាលដែលដឹកនាំដោយគណបក្សប្រជាជនហ្នឹង បានរំលោភរដ្ឋធម្មនុញ្ញនៃព្រះរាជាណាចក្រកម្ពុជាយើងជាច្រើនខណ្ឌហើយ រួមទាំងមាត្រា ៣៧ ដែលនិយាយអំពីសិទ្ធិរបស់ប្រជាពលរដ្ឋ ក្នុងការធ្វើបាតុកម្មដោយសន្តិវិធី»។
បើទោះជាព្រឹត្តិការណ៍រំលឹកខួបកាលពីព្រឹកថ្ងៃទី៣០ មីនា ត្រូវបានរឹតបន្តឹងផ្នែកសន្តិសុខ និងកម្លាំងត្រូវគេពង្រាយច្រើនខុសពីថ្ងៃសព្វមួយដងក្ដី ក៏ពិធីដែលរៀបចំដោយគណបក្សសង្គ្រោះជាតិ ពុំមានការប៉ះទង្គិច និងហិង្សាទេ ហើយពិធីត្រូវរំសាយទៅវិញមុនម៉ោង ១២ថ្ងៃត្រង់៕
No comments:
Post a Comment