អ្នករងរបួស ដោយសារក្រុមសន្តិសុខសាលាខណ្ឌដូនពេញបង្ក្រាប (រូបថត៖ តាត ឧត្តម)
ជនរងគ្រោះដោយការបង្ក្រាបរបស់សមត្ថកិច្ច ផ្តល់បទសម្ភាសន៍ដល់អ្នកសារព័ត៌មាន (រូបថត៖ តាត ឧត្តម)
អ្នកគាំទ្រ វិទ្យុសំបុកឃ្មុំ ពីរនាក់ រងរបួស ក្នុងការបង្ក្រាប របស់ ក្រុមសន្តិសុខ សាលាខណ្ឌដូនពេញ
ដោយ៖ ណាត សុភាព / វីអូឌី | ថ្ងៃចន្ទ ទី31 ខែមិនា ឆ្នាំ2014
បុរសពីរនាក់ ក្នុងចំណោមប្រជាពលរដ្ឋជាង ១០០នាក់ ដែលជាអ្នកគាំទ្រប្រធានវិទ្យុសំបុកឃ្មុំ បានរងរបួសក្បាល ខណៈដែលក្រុមសន្តិសុខខណ្ឌដូនពេញជាច្រើនាក់ បំបែកពួកគេមិនឲ្យប្រមូលផ្តុំគ្នា នៅក្បែរស្ពាននាគ ជិតទីលានប្រជាធិបតេយ្យ ដើម្បីទាមទារដំឡើងហ្វ្រេកង់ទូរទស្សន៍ និងដំឡើងកម្លាំងផ្សាយវិទ្យុនៅតាមខេត្ត។
នៅម៉ោងជិត ៨ព្រឹកថ្ងៃទី៣១ ខែមីនានេះ ប្រជាពលរដ្ឋដែលគាំទ្រលោក ម៉ម សូណង់ដូ ប្រធានវិទ្យុសំបុកឃ្មុំ ប្រមាណជាង ១០០នាក់ បានព្យាយាមចូលទៅកាន់ទីលានប្រជាធិបតេយ្យ ក្នុងខណ្ឌដូនពេញ រាជធានីភ្នំពេញ ដើម្បីធ្វើបាតុកម្មទាមទារដំឡើងហ្វ្រេកង់ទូរទស្សន៍ និងដំឡើងកម្លាំងផ្សាយវិទ្យុនៅតាមខេត្ត ប៉ុន្តែត្រូវបានសមត្ថកិច្ចចម្រុះរាប់សិបនាក់ រារាំង ហើយក្រុមសន្តិសុខសាលាខណ្ឌដូនពេញ បានប្រើដំបងវាយទៅលើក្រុមប្រជាពលរដ្ឋទាំងនោះ បណ្តោយឲ្យបុរសម្នាក់រងរបួសត្រង់ក្បាល និងម្នាក់ទៀត រងរបួសក្បែរភ្នែក។
តែទោះជាយ៉ាងណា នៅម៉ោងជិត ៩ព្រឹកនេះ លោកម៉ម សូណង់ដូ ប្រធានវិទ្យុសំបុកឃ្មុំ នៅពុំទាន់ទៅកាន់កន្លែងប្រមូលផ្តុំនៅឡើយ។
លោក ម៉ម សូណង់ដូ ប្រធានវិទ្យុសំបុកឃ្មុំ ធ្លាប់បានប្រកាសកាលពីថ្ងៃទី២៤ខែមីនាថា លោកនឹងមិនដឹកនាំប្រជាពលរដ្ឋធ្វើបាតុកម្មនៅ ថ្ងៃទី៣១ ខែមីនានេះទេ ព្រោះសាលារាជធានីភ្នំពេញ មិនអនុញ្ញាត ហើយបើបានការធ្វើបាតុកម្មណាមួយនៅថ្ងៃនេះ គឺជាឆន្ទៈ និងសិទ្ធិរបស់ប្រជាពលរដ្ឋ ដែលចង់មានស្ថានីយទូរទស្សន៍ និងវិទ្យុឯករាជ្យ។
កាលពីថ្ងៃទី២៧ ខែមករា ឆ្នាំ២០១៤ កន្លងទៅ លោក ម៉ម សូណង់ដូ ប្រធានវិទ្យុសំបុកឃ្មុំ និងអ្នកគាំទ្រ ប្រមាណ៣០០០នាក់ ធ្លាប់បានធ្វើបាតុកម្មម្តងរួចមកហើយ ដើម្បីទាមទារហ្វ្រេកង់ទូរទស្សន៍ និងដំឡើងកម្លាំងផ្សាយវិទ្យុសំបុកឃ្មុំបន្តទៅតាមខេត្ត នៅទីលានប្រជាធិបតេយ្យ និងហែក្បួនទៅមុនក្រសួងព័ត៌មាន ប៉ុន្តែត្រូវបានអាជ្ញាធររាជធានីភ្នំពេញ ប្រើប្រាស់គ្រាប់បែកផ្សែង បាញ់ទៅលើក្រុមប្រជាពលរដ្ឋ ដើម្បីបំបែកការតវ៉ារបស់ពួកគេនៅមុខក្រសួងព័ត៌មាន ធ្វើឲ្យពលរដ្ឋជាច្រើននាក់ រងរបួសធ្ងន់ និងស្រាល៕
No comments:
Post a Comment