ស្ត្រី ៤នាក់ជាតំណាងប្រជាពលរដ្ឋនៅភូមិខ្នងក្រពើកើត និងខ្នងក្រពើលិច ដែលបានចូលរួមវគ្គដោះស្រាយទំនាស់ដីធ្លីនៅសមាគមអាដហុក (Adhoc) ខេត្តកំពង់ចាម កាលពីថ្ងៃទី៧ ខែមីនា ឆ្នាំ២០១៤។
អ្នក មានជម្លោះដី នៅកំពង់ចាម ស្នើឲ្យ អាជ្ញាធរ ចេញប្លង់កម្មសិទ្ធិដីធ្លី
ដោយ សូត សុខប្រាថ្នា / អាស៊ីសេរី | ០៧ មីនា ២០១៤
តំណាងប្រជាពលរដ្ឋជាច្រើនរយគ្រួសារនៅឃុំត្រមូង ស្រុកមេមត់ ខេត្តកំពង់ចាម ដែលមានបញ្ហាដីធ្លីជាមួយក្រុមហ៊ុនចម្ការកៅស៊ូមេមត់ បានជួបជាមួយអភិបាលខេត្តកំពង់ចាម និងដាក់សំណើអោយជួយដោះស្រាយបញ្ហាដីធ្លីជូនពួកគាត់ កាលពីថ្ងៃទី៦ មីនា។ អភិបាលខេត្តកំពង់ចាម បញ្ជាក់ថា នឹងបញ្ជូនសំណើនេះទៅអាជ្ញាធរដោះស្រាយទំនាស់ដីធ្លីថ្នាក់ជាតិ ពីព្រោះខាងខេត្តមិនអាចមានសមត្ថភាពក្នុងការសម្រេចនោះទេ។
តំណាងប្រជាពលរដ្ឋប្រមាណជា ១៥នាក់ ស្នើឱ្យអភិបាលខេត្តកំពង់ចាម ជួយដោះស្រាយបញ្ចប់ជម្លោះដីធ្លី ដោយការចេញប្លង់កម្មសិទ្ធិដល់ពួកគាត់ ពីព្រោះពួកគាត់មិនអាចរង់ចាំចំណាត់ការរបស់អាជ្ញាធរ ដែលចេះតែពន្យារពេលក្នុងការដោះស្រាយជូនពួកគាត់តទៅទៀតបានឡើយ។
អ្នកស្រីថ្លែងបន្តថា កន្លងមកអាជ្ញាធរបានប្រាប់ឱ្យពួកគាត់ទទួលយកតំបន់អភិវឌ្ឍន៍កន្លែងថ្មី ប៉ុន្តែពួកគាត់មិនព្រម ដោយអះអាងថា ពួកគាត់រស់នៅតាំងពីឆ្នាំ១៩៨០ ដែលវាស្របទៅតាមច្បាប់ភូមិបាល អាចនឹងទទួលបានប្លង់កម្មសិទ្ធិស្របច្បាប់ ហើយពួកគាត់ព្រមទទួលយកការអភិវឌ្ឍនៅនឹងកន្លែង ល្អជាងទៅរស់នៅកន្លែងថ្មី ដែលប្រៀបបានទៅនឹងការចាប់ផ្ដើមពីចំណុចសូន្យនោះ។
អភិបាលខេត្តកំពង់ចាម លោក លន់ លឹមថៃ បានមានប្រសាសន៍កាលពីថ្ងៃទី៦ មីនា ថា លោកបានទទួលសំណូមពររបស់តំណាងប្រជាពលរដ្ឋ និងខិតខំធ្វើសំណើនោះបញ្ជូនទៅថ្នាក់ជាតិក្នុងការធ្វើសេចក្តីសម្រេច ចំណែកខាងខេត្តគ្មានសិទ្ធិសម្រេចនោះឡើយ៖ «សរុបមក យើងមានការខិតខំ ហើយក៏បានរាយការណ៍ជូនជាបន្តបន្ទាប់ដែរ ទៅខាងអាជ្ញាធរជាតិដោះស្រាយដីធ្លី ក៏ដូចជាគណៈកម្មាធិការអវិនិយោគ។ ឥឡូវនេះ យើងបានធ្វើអត្តសញ្ញាណកម្មរួចហើយដែរ ហើយយើងនឹងផ្ញើឯកសារទៅ ហើយបើមានការសម្រេចថាយ៉ាងណានោះ គឺអាស្រ័យលើថ្នាក់គណៈកម្មាធិការថ្នាក់ជាតិ»។
លោកបន្តថា កន្លងមកគណៈកម្មាធិការដោះស្រាយទំនាស់ដីធ្លីថ្នាក់ជាតិ បានសិក្សារួចហើយចំពោះផលប៉ះពាល់ដល់ប្រជាពលរដ្ឋនៅតំបន់នោះ ហើយមានសំណងជាផ្ទះ ជាដីធ្លីនៅកន្លែងថ្មី ដែលមានទីផ្សារ សាលារៀន ទឹក ភ្លើង នៅផ្លាកសំរោង ហើយក៏មានប្រជាពលរដ្ឋជាច្រើនបានទទួលយកសំណង ក្នុងការផ្លាស់ទៅរស់នៅកន្លែងថ្មីហើយដែរ។ ប៉ុន្តែក៏មានប្រជាពលរដ្ឋខ្លះ មិនព្រមទទួលយកការរស់នៅតំបន់អភិវឌ្ឍន៍ថ្មីនោះទេ។ លោកបន្ថែមទៀតថា ការតវ៉ា គឺជាសិទ្ធិរបស់ប្រជាពលរដ្ឋ ប៉ុន្តែប្រសិនបើប្រជាពលរដ្ឋមិនមានភាពអត់ធ្មត់នោះ អាចនឹងធ្វើឱ្យការដោះស្រាយកាន់តែមានការលំបាក ពីព្រោះទាំងគណៈកម្មាធិការដោះស្រាយទំនាស់ដីធ្លីថ្នាក់ខេត្ត និងថ្នាក់ជាតិ កំពុងតែខិតខំរកវិធីដោះស្រាយបញ្ហានេះ ធ្វើយ៉ាងម៉េចឱ្យភាគីទំនាស់ទាំងសងខាងអាចទទួលយកបានទាំងអស់គ្នា។
តំណាងប្រជាពលរដ្ឋម្នាក់ទៀតរស់នៅភូមិខ្នងក្រពើកើត អ្នកស្រី ព្រំ ដាណែត បានលើកឡើងថា ប្រសិនបើជាការសន្យារបស់លោកអភិបាលខេត្តថា នឹងផ្តល់ដំណឹងឱ្យពួកគាត់វិញក្នុងរយៈពេលយ៉ាងយូរកន្លះខែ បែរជាមិនមានការឆ្លើយតបវិញនោះ ពួកគាត់នឹងឡើងទៅគណៈកម្មាធិការដោះស្រាយទំនាស់ថ្នាក់ជាតិតែម្តង៖ «តាមខ្ញុំជួបហ្នឹងកន្លះខែ ទុកឱកាសគាត់ខ្លះខែ គាត់នឹងផ្តល់ដំណឹង។ ប្រសិនបើអភិបាលខេត្តមិនបានផ្តល់ដំណឹងអីទេ ខ្ញុំ និងកម្លាំងពួកខ្ញុំប្រជាពលរដ្ឋហ្នឹងឡើងទៅគណៈកម្មាធិការអវិនិយោគថ្នាក់ជាតិ ស្នើសុំទៅគណៈកម្មាធិការថ្នាក់ជាតិតែម្តង។ តើរឿងខ្ញុំហ្នឹងយ៉ាងម៉េច ដោះស្រាយយ៉ាងណាបាន ឬមិនបាន ចង់ដឹងអ៊ីចេះ?»។
អ្នកស្រីបន្តថា នៅតំបន់ចម្ការកៅស៊ូផ្សេងៗ គេដោះស្រាយរួចហើយ លើកលែងតែតំបន់ពួកគាត់ដែលមានបញ្ហាជាមួយក្រុមហ៊ុនចម្ការកៅស៊ូមេមត់នេះទេ ដែលមិនព្រមដោះស្រាយជូនប្រជាពលរដ្ឋ។ អ្នកស្រីបញ្ជាក់ថា ប្រជាពលរដ្ឋទាំងភូមិខ្នងក្រពើកើត និងខ្នងក្រពើលិច ដែលប៉ះពាល់មានប្រមាណជាង ៦០០គ្រួសារ ដែលមានទំហំដីសរុបប្រហែល ២០ហិកតារ គឺមិនស្នើនឹងអ្នកមានលុយ មានអំណាចម្នាក់នៅតំបន់នោះកាន់កាប់ដីមួយកន្លែងផង។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ប្រចាំខេត្តកំពង់ចាម លោក នាង សាវ៉ាត មានប្រសាសន៍ថា វាជារឿងយឺតយ៉ាវរបស់អាជ្ញាធរដោះស្រាយទំនាស់ដីធ្លី ដែលមិនព្រមចាត់វិធានការចំពោះបញ្ហានេះ ហើយនៅតែពន្យារពេលអស់ជាច្រើនឆ្នាំមកហើយ គឺចាប់តាំងពីឆ្នាំ២០០៨ មកនោះ។ លោកព្រួយបារម្ភថា ប្រសិនបើគណៈកម្មាធិការដោះស្រាយទំនាស់នៅតែពន្យារពេលតទៅទៀតនោះ នឹងអាចមានបញ្ហាកាន់តែធំ ពីព្រោះការឈឺចាប់របស់ប្រជាពលរដ្ឋកាន់តែច្រើននោះ ការតវ៉ានឹងអាចកើតមានកាន់តែខ្លាំងឡើងៗជាមិនខាន៕
No comments:
Post a Comment