ប្រជាពលរដ្ឋរងគ្រោះនៅក្នុងរបបខ្មែរក្រហមមកពីខេត្តកំពត និងខេត្តកំពង់ចាម ថតរូបអនុស្សាវរីយ៍ជាមួយមន្ត្រីសាលាក្ដីខ្មែរក្រហម នៅសាលសវនាការនៃសាលាក្ដីខ្មែរក្រហម នារាជធានីភ្នំពេញ កាលពីថ្ងៃទី៣០ ខែធ្នូ ឆ្នាំ២០១០។
តំណាង ដើមបណ្ដឹង រដ្ឋប្បវេណី ចង់ឲ្យ ជនរងគ្រោះផ្សេង ផ្ដល់ សក្ខីកម្ម ក្នុងសាលាក្ដី ខ្មែរក្រហម
ដោយ ជិន ជេដ្ឋា / អាស៊ិសេរី | ១៣ មីនា ២០១៤
តំណាងដើមបណ្ដឹងរដ្ឋប្បវេណីនៃសាលាក្ដីខ្មែរក្រហម ចង់ឲ្យតុលាការអញ្ជើញជនរងគ្រោះផ្សេងទៀតចូលរួមស្ដាប់ និងផ្ដល់សក្ខីកម្មក្នុងសាលាក្ដីនេះ ព្រមទាំងផ្សព្វផ្សាយឲ្យបានទូលំទូលាយអំពីការវិវឌ្ឍថ្មីៗនៃការកាត់ក្ដីលើសំណុំរឿងរបស់អតីតមេដឹកនាំជាន់ខ្ពស់ខ្មែរក្រហម។ មន្ត្រីសាលាក្ដីខ្មែរក្រហមបញ្ជាក់ថា សិទ្ធិចូលរួមរបស់ជនរងគ្រោះរហូតមកដល់ពេលនេះ ត្រូវបានបើកទូលាយ។
សំណើសុំរបស់តំណាងដើមបណ្ដឹងរដ្ឋប្បវេណីនេះ បានធ្វើឡើងនៅក្នុងកិច្ចប្រជុំពិភាក្សាគ្នាមួយ រវាងដើមបណ្ដឹងរដ្ឋប្បវេណី និងតំណាងសហគមន៍ជាង ៥០នាក់ ក្នុងបរិវេណវត្តបន្ទាយក្ដី ខេត្តពោធិ៍សាត់ នាព្រឹកថ្ងៃទី១១ ខែមីនា។
សមាគមការពារសិទ្ធិមនុស្សអាដហុក បានរៀបចំឲ្យមានវេទិកាជួបប្រជុំរវាងដើមបណ្ដឹងរដ្ឋប្បវេណីនៃសាលាក្ដីខ្មែរក្រហម និងសហគមន៍ ក្នុងគោលបំណងផ្ដល់ឱកាសដល់ព្រះសង្ឃ ប្រជាពលរដ្ឋ និងអាជ្ញាធរ បានពិភាក្សាគ្នាអំពីរបបខ្មែរក្រហម។
បុគ្គលិកកម្មវិធីនៃគម្រោងសំឡេងសម្រាប់ការផ្សះផ្សា នៃសមាគមអាដហុក កញ្ញា ហ៊ាន ជាវគុន មានប្រសាសន៍ថា កិច្ចប្រជុំពិភាក្សានេះអាចធ្វើឲ្យពួកគាត់យល់កាន់តែច្បាស់អំពីនីតិវិធីនៅក្នុងប្រព័ន្ធតុលាការ ដោយការប្រៀបធៀបសាលាក្ដីខ្មែរក្រហម ជាមួយតុលាការបច្ចុប្បន្ន។ កញ្ញាបន្តថា រាល់ការលើកឡើង អ្នកចូលរួមនឹងចងក្រងជាឯកសារ ដើម្បីបញ្ជូនទៅម្ចាស់ជំនួយ៖ «និយាយទៅយើងផ្ដោតតែបញ្ហាសាលាក្ដីខ្មែរក្រហម ទាក់ទងនឹងបញ្ហាដីធ្លី និងបញ្ហាផ្សេង វាទាក់ទងនឹងការរំលោភសិទ្ធិមនុស្ស គឺពួកគាត់បានលើកឡើង ប៉ុន្តែយើងឲ្យគាត់លើកនៅក្នុងន័យធៀបនៅក្នុងដំណើរការតុលាការ»។
កន្លងមកនេះ គឺមានដើមបណ្ដឹងរដ្ឋប្បវេណីមួយចំនួនត្រូវបានតុលាការអនុញ្ញាតឲ្យចូលរួមស្ដាប់ និងផ្ដល់សក្ខីកម្មក្នុងសវនាការ។
ទាក់ទងបញ្ហានេះដែរ មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ដ្រា មានប្រសាសន៍ថា នៅពេលដែលមិនទាន់មានសវនាការ អង្គជំនុំជម្រះបានធ្វើការផ្សព្វផ្សាយព័ត៌មានទាក់ទងនឹងសាលាក្ដីខ្មែរក្រហមរៀងរាល់ថ្ងៃអង្គារ និងព្រហស្បតិ៍ ហើយមានប្រជាពលរដ្ឋចន្លោះពី ២៥០នាក់ ទៅ ៣៥០នាក់ក្នុង១ថ្ងៃចូលទៅស្ដាប់៖ «ហើយដូចជានៅថ្ងៃទី១២ ខែមីនា នេះ គឺប្រជាពលរដ្ឋចំនួន ៣០០នាក់មកពីខាងស្រុករំដួល មកធ្វើទស្សនកិច្ចសិក្សានៅតុលាការ ហើយបន្តទៅទស្សនកិច្ចទៅបឹងជើងឯក និងគុកទួលស្លែង។ អ៊ីចឹង គឺយើងស្វាគមន៍ចំពោះបងប្អូនប្រជាពលរដ្ឋទាំងអស់ មិនមែនត្រឹមដើមបណ្ដឹងរដ្ឋប្បវេណីទេ គឺជនរងគ្រោះទូទៅ ហើយសាធារណជនទូទៅផងដែរ»។
ប្រធានកម្មវិធីនៃគម្រោងសំឡេងសម្រាប់ការផ្សះផ្សានៃសមាគមអាដហុក លោក ឡាត់ គី ឲ្យដឹងថា សម្រាប់ត្រីមាសទី១ ក្នុងឆ្នាំ២០១៤ គម្រោងនឹងរៀបចំកិច្ចប្រជុំពិភាក្សានេះចំនួន ៤៥វគ្គ នៅតាមតំបន់ចំនួន៥ ក្នុងប្រទេសកម្ពុជា។ តំបន់ទី១ គឺគ្របដណ្ដប់ខេត្តចំនួន៦ គឺបន្ទាយមានជ័យ ឧត្ដរមានជ័យ សៀមរាប ប៉ៃលិន បាត់ដំបង និងខេត្តពោធិ៍សាត់។ តំបន់ទី២ គឺគ្របដណ្ដប់ខេត្តចំនួន៤ គឺកំពង់ស្ពឺ កំពង់ឆ្នាំង ព្រះសីហនុ និងខេត្តកោះកុង។ តំបន់ទី៣ គឺគ្របដណ្ដប់ខេត្តចំនួន៣ គឺកណ្ដាល កំពត និងខេត្តតាកែវ។ តំបន់ទី៤ គឺគ្របដណ្ដប់ខេត្តចំនួន៤ គឺកំពង់ចាម ព្រៃវែង ស្វាយរៀង និងខេត្តកំពង់ធំ។ តំបន់ទី៥ គឺគ្របដណ្ដប់ខេត្តចំនួន៤ គឺក្រចេះ ស្ទឹងត្រែង រតនគិរី និងខេត្តមណ្ឌលគិរី៕
No comments:
Post a Comment