លោក សមរង្ស៊ី ប្រធានគណបក្សសង្គ្រោះជាតិ (រូបថត៖ តាំង វីដា)
បទសម្ភាសន៍ ជាមួយ លោក សម រង្ស៊ី ប្រធាន គណបក្សសង្គ្រោះជាតិ ជុំវិញស្ថានការណ៍ នយោបាយ នៅដំណាក់កាលចុងក្រោយ
ដោយ៖ ណុល ដារ៉ា | ថ្ងៃព្រហស្បតិ៍ ទី13 ខែមិនា ឆ្នាំ2014
ក្នុងកិច្ចចរចារវាងគណបក្សប្រជាជនកម្ពុជា និងគណបក្សសង្គ្រោះជាតិកាលពីថ្ងៃទី១០ ខែមីនា កន្លងទៅមិនបានទទួលលទ្ធផលជាវិជ្ជមានទេ ដោយសារគណបក្សប្រជាជនកម្ពុជាមិនទទួលយកសំណើរបស់គណបក្សសង្គ្រោះជាតិ ដែលស្នើឲ្យដាក់ គ.ជ.ប ទៅជាស្ថាប័នធម្មនុញ្ញ និងបោះឆ្នោតអនុម័ត្តដោយសំឡេង ២ភាគនៃ៣។ ហើយនៅថ្ងៃទី១២ មីនា ម្សិលមិញ លោកសម រង្ស៊ី ប្រកាសថា នឹងផ្អាកការចរចា បើសិនគណបក្សប្រជាជនកម្ពុជា មិនទទួលសំណើនេះទេ។
តើ ស្ថានភាពនយោបាយ នឹងមាន ការវិវឌ្ឍ យ៉ាងណាទៀត នៅដំណាក់កាលចុងក្រោយនេះ?
សូមស្ដាប់បទសម្ភាសន៍រវាងលោក សម រង្ស៊ី និងលោក ណុល ដារ៉ា បណ្ណាធិការព័ត៌មានវិទ្យុ VOD ដូចតទៅ ៖
លោកសម រង្ស៊ី ៖ បាទ ស្ថាប័នដែលសំខាន់ ដែលទាក់ទងទៅនឹងការរៀបចំប្រទេស ឲ្យមានការគោរពច្បាប់ត្រឹមត្រូវពេញលេញ ឲ្យមានលទ្ធិប្រជាធិបតេយ្យពិតប្រាកដ គឺត្រូវតែដាក់ចូលទៅក្នុងរដ្ឋធម្មនុញ្ញ។ ពីព្រោះដើម្បីរៀបចំ ឬកែប្រែរដ្ឋធម្មនុញ្ញ ត្រូវតែមានការគាំទ្រពីសំណាក់សមាជិករដ្ឋសភា២ភាគ៣។ ចំពោះការងារផ្សេងៗ សូម្បីតែការរៀបចំរដ្ឋាភិបាល ទាមទារមតិភាគច្រើនតែ៥០ភាគបូក១បានហើយ។ ពីព្រោះរដ្ឋាភិបាលអាចដឹកនាំដោយគណបក្សតែមួយ ក៏អាចធ្វើទៅបាន ឲ្យតែគណបក្សនោះមានការគាំទ្រ ពីសំណាក់មតិភាគច្រើន ៥០ភាគរយបូក១។ អាចជារឿងគណបក្ស ព្រោះគណបក្សណា ដែលគេដឹកនាំរដ្ឋាភិបាល គេដឹកនាំតាមកម្មវិធីនយោបាយរបស់គេ ហើយសព្វថ្ងៃនេះ គឺគេបម្រើផលប្រយោជន៍គណបក្សគេ។ តែចំពោះកិច្ចការជាតិ កិច្ចការដ៏សំខាន់ គឺមិនមែនរឿងគណបក្សទេ ត្រូវតែមានការ ឯក ភាពជាតិ ទាក់ទងទៅនឹងការការពារឧត្តមប្រយោជន៍ជាតិ។ អ៊ីចឹងត្រូវឲ្យមានការគាំទ្រពីសំណាក់យ៉ាងតិច២ភាគ៣ គឺគណបក្សតែមួយ ដែលបានតែ៥០បូក១ មិនអាចធ្វើអ្វីបានតាមចិត្តទេ ត្រូវការការគាំទ្រពីគណបក្សមួយទៀត ឬក៏គណបក្សផ្សេងទៀត ដើម្បីធានាថាការគាំទ្រឯកភាពគ្នានេះ គឺមានលក្ខណៈទូលំទូលាយ មិនមែនរឿងគណបក្សនេះ គណបក្សនោះទេ គឺរឿងប្រទេសជាតិទាំងមូល ដែលទាមទារឲ្យមានការចូលរួម ឲ្យមានការគាំទ្រ ពីតំណាងប្រទេសជាតិ តំណាងប្រជារាស្ត្រខ្មែរ ឲ្យបានច្រើនលើសលុប រហូតទៅដល់២ភាគ៣ យ៉ាងតិច។
VOD ៖ បាទសូមអរគុណឯកឧត្តមច្រើន។ ក្មួយមានសំណួរមួយទៀតទាក់ទង-- ឮថា ដំណឹងពីឯកឧត្តមយឹម សុវណ្ណ ថា នៅថ្ងៃនេះ គណបក្សសង្គ្រោះជាតិនឹងដាក់លិខិតទៅគណបក្សប្រជាជន ដើម្បីបញ្ជាក់ថា ទទួលយកសំណើរបស់គណបក្សសង្គ្រោះជាតិ ក្នុងការដាក់ស្ថាប័ន គ.ជ.ប ហ្នឹងជាស្ថាប័នធម្មនុញ្ញដែរឬទេ។ ចុះបើសិនជា គណបក្សប្រជាជនមិនទទួលសំណើនេះ តើគណបក្សប្រជាជននឹងអ្វីបន្តទៀតបាទ?
លោកសម រង្ស៊ី ៖ យើងប្រាប់ទៅគណបក្សប្រជាជនថា អ្វីដែលយើងចាត់ទុកជាអាទិភាព ត្រូវកែទម្រង់ រៀបចំឡើងវិញឲ្យបានល្អ មុនគេបង្អស់គឺ គ.ជ.ប នេះហើយ។ មិនចាំបាច់ធ្វើលិខិតស្នាម ធ្វើច្បាប់រៀបចំនីតិវិធីកាន់តែច្រើនឡើងៗ បើគ្មាននរណាគោរព គ្មាននរណាអនុវត្តន៍ត្រឹមត្រូវ ហ្នឹងគឺអាស្រ័យលើ ស្ថាប័នហ្នឹងហើយ។ បើស្ថាប័នហ្នឹងជាស្ថាប័នឯករាជ ស្ថាប័នមានការគាំទ្រពីរគណបក្សទាំងពីរ ក្នុងស្ថានការណ៍បច្ចុប្បន្ន គឺមានគណបក្សតែពីរនៅក្នុងរដ្ឋសភា ហ្នឹងយើងអាចជឿជាក់ថា ស្ថាប័នហ្នឹងនឹងធ្វើការត្រឹមត្រូវ និងអនុវត្តន៍តាមច្បាប់ តាមនីតិវិធីត្រឹមត្រូវ តែបើគណបក្សប្រជាជនជាអ្នក គ្រាប់គ្រង គ.ជ.ប តែម្នាក់ឯង ធ្វើភ្លៀងធ្វើផ្គរ យើងមិនចាំបាច់ជជែកធ្វើច្បាប់ ធ្វើនីតិវិធីអីផ្សេងទៀតទេ។ ពីព្រោះរុញមក មកដល់ គ.ជ.ប ដដែល សមាសភាពដដែល គណបក្សប្រជាំជនដដែល ដែលជាអ្នកបកស្រាយ ដែលជាអ្នកអនុវត្ត ឬមិនអនុវត្ត គឺថាការបោះឆ្នោតហ្នឹងគឺមានភាពមិនប្រក្រតីច្រើន ដែលគណបក្សសង្គ្រោះជាតិមិនអាចទទួល យក បាន។ អ៊ីចឹងយើងផ្ញើសារ យើងប្រាប់ទៅគណបក្សប្រជាជនថា សុំជជែករឿង គ.ជ.ប ជាមុនសិន មិនចាំបាច់យករឿងអីផ្សេងយកមកជជែកទេ ដរាបណាបញ្ហា គ.ជ.ប នេះមិនទាន់បានដោះស្រាយ ព្រោះឥឡូវនេះយើងមានវិបត្តិនយោបាយដែលជាប់គាំង ដែលរដ្ឋសភាអត់ស្របច្បាប់ រដ្ឋាភិបាលអត់ស្របច្បាប់ គឺដោយសារបញ្ហាការបោះឆ្នោត។ ការបោះឆ្នោតកន្លងទៅកាលឆ្នាំ២០១៣ មិនត្រឹមត្រូវ។ ហើយមូលហេតុនៃការបោះឆ្នោតមិនត្រឹមត្រូវហ្នឹង គឺ គ.ជ.ប! គឺ គ.ជ.ប ហ្នឹងជាបញ្ហាចម្បង ត្រូវតែដោះស្រាយបញ្ហា គ.ជ.ប ហ្នឹងមុនគេបង្អស់។ អ៊ីចឹងហើយបានគណបក្សសង្គ្រោះជាតិយល់ឃើញថា បើមិនជជែករឿង គ.ជ.ប ជាមុនសិនទេ មិនចាំបាច់យករឿងអីផ្សេងយកមកជជែកទៀតទេ។
VOD ៖ បាទឯកឧត្តមសូមជម្រាបសួរអ៊ីចេះថា ថ្ងៃ១៧ ខាងមុខនេះនឹងមានការចរចា។ តើគណបក្សសង្គ្រោះជាតិនឹងផ្អាកការចរចា ឬមួយក៏នឹងចូលតុចរចា បើសិនជាគណបក្សប្រជាជនឆ្លើយតប ឬក៏មិនឆ្លើយតបលិខិតរបស់គណបក្សសង្គ្រោះជាតិ ដែលហ្នឹងដាក់នៅថ្ងៃហ្នឹងណាឯកឧត្តម?
លោក សម រង្ស៊ី ៖ អាស្រ័យលើចម្លើយ! មិនថាឆ្លើយតប ឬមិនឆ្លើយតប។ អាស្រ័យលើចម្លើយ! ចម្លើយហ្នឹងគឺឆ្លើយតប ហើយឆ្លើយតបមានន័យ ឆ្លើយតបជាវិជ្ជមាន យើងបន្តការជជែកគ្នាលើបញ្ហា គ.ជ.ប រៀបចំ គ.ជ.ប ឡើងវិញ។ បើគេមិនឆ្លើយតប ឬគេឆ្លើយតបអវិជ្ជមាន គឺមិនយល់ព្រមជជែករឿងបញ្ហា គ.ជ.ប ហ្នឹងដូចខ្ញុំបានបញ្ជាក់អម្បាញ់មិញអ៊ីចឹង មិន ចាំបាច់ជជែករឿងអីផ្សេងទៀតទេសូមផ្អាកសិនទៅ!
VOD ៖ បាទអរគុណឯកឧត្តម! មានសំណួរមួយចុងក្រោយបាទ កាលប៉ុន្មានថ្ងៃមុនឯកឧត្តមបានព្រលយពាក្យជាមួយកាសែត ឌឺណេសិនរបស់ថៃហ្នឹងថា នៅទីបំផុតឯកឧត្តមអាចនឹងជួបជាមួយលោកនាយករដ្ឋមន្ត្រីហ៊ុន សែន។ តើឯកឧត្តមគិតថា បានប្រយោជន៍ទេ នៅពេលដែលឯកឧត្តមជួបជាមួយនឹងលោកនាយករដ្ឋមន្ត្រីដោយផ្ទាល់ ហើយអ្វីៗវាអាចនឹងបំបែកភាពទ័លច្រកនៅពេលនោះទេបាទ?
លោកសម រង្ស៊ី ៖ គណបក្សសង្គ្រោះជាតិ ជាគណបក្សដែលប្រកាន់គោលជំហរអហិង្សា! អហិង្សា គឺយើងអត់មានទៅប្រឈមមុខដោយប្រើអំពើហិង្សា អត់មានទៅវ៉ៃគ្នាទេ (សើច) ប្រើពាក្យសាមញ្ញគឺយើងត្រូវរកដំណោះស្រាយដោយសន្តិវិធី ហើយសន្តិវិធីហ្នឹង គឺត្រូវតែជជែកគ្នា។ ជជែកគ្នា ហើយយើងមិនអាចជជែកគ្នាពីចម្ងាយទេ។ បើជជែកគ្នាមែន ទែន ទាល់តែជជែកគ្នា ជួបគ្នា ក្នុងន័យចង់បានដំណោះស្រាយដោយសន្តិវិធី ដែលភាគីទាំងពីរទទួលយកបាន។ ហ្នឹង ហើយជំហររបស់គណបក្សសង្គ្រោះជាតិ!
VOD ៖ បាទអរគុណឯកឧត្តមច្រើន ដែលបានផ្ដល់បទសម្ភាសន៍ជាមួយVODបាទ។
លោកសម រង្ស៊ី ៖ បាទ អរគុណ! ជម្រាបលា៕
No comments:
Post a Comment