សិស្សានុសិស្ស នៅវិទ្យាល័យបាក់ទូក
@rfi/siv channa
អង្គភាព ប្រឆាំង អំពើពុករលួយ និងក្រសួង អប់រំ ប្រកាសយុទ្ធនាការ ប្រឆាំងអំពើពុករលួយ សិស្ស សូកលុយគ្រូ ក្នុងពេលប្រលង ឌីប្លូម និងបាក់ឌុប
អង្គភាព ប្រឆាំង អំពើពុករលួយ សហការ ជាមួយ ក្រសួងអប់រំ យុវជន និងកីឡា បានរួមគ្នា ដាក់ចេញ នូវយុទ្ធនាការ ប្រឆាំង អំពើពុករលួយ ក្នុងពេលប្រលង ដែលសិស្ស សូកលុយគ្រូ រួមទាំង ភាពមិនប្រក្រតី។ យុទ្ធនាការប្រឆាំង អំពើពុករលួយ ក្នុងវិស័យអប់រំ ថ្មីនេះ ត្រូវចាប់ផ្តើម អនុវត្ត នៅពេលប្រលង ឌីប្លូម និងប្រលង បាក់ឌុប នាខែកក្កដា និងខែសីហា ខាងមុខ។
វគ្គបណ្តុះបណ្តាលគ្រូបង្គោល សម្រាប់ការអប់រំ ស្តីពី ការប្រឆាំងអំពើពុករលួយ ក្នុងកម្មវិធីសិក្សាចំណេះទូទៅមធ្យមសិក្សាទុតិយភូមិ ចាប់ពីថ្នាក់ទី១០ ទី១១ និងថ្នាក់ទី១២ ត្រូវបានអង្គភាពប្រឆាំងអំពើពុករលួយ សហការជាមួយក្រសួងអប់រំ យុវជន និងកីឡា រៀបចំឡើង រយៈពេល ៣ ថ្ងៃ ចាប់ពីថ្ងៃទី២៥មីនានេះ។ វគ្គបណ្តុះបណ្តាល នៅអង្គភាពប្រឆាំងអំពើពុករលួយ ក្នុងទីក្រុងភ្នំពេញ ចូលរួមដោយគ្រូបង្រៀនប្រមាណ ១០០ នាក់ មកពីសាលានានា ទូទាំងប្រទេស។
លោក ឱម យ៉ិនទៀង ក៏បានអំពាវនាវដល់អង្គការសង្គមស៊ីវិល គណបក្សនយោបាយ ក្រុមហ៊ុនឯកជន បុគ្គលឯកជន ពិសេសសមាគមគ្រូបង្រៀនរបស់លោក រ៉ុងឈុន ឲ្យចូលរួមសង្កេត ត្រួតពិនិត្យ នូវភាពមិនប្រក្រតី និងអំពើពុករលួយ ក្នុងពេលប្រលង។ លោកបញ្ជាក់ថា អ្នកស្ម័គ្រចិត្ត ដែលមានការទទួលស្គាល់ពីអង្គភាពប្រឆាំងអំពើពុករលួយ ត្រូវជួយផ្តល់ព័ត៌មាន មកកាន់អង្គភាពប្រឆាំងអំពើពុករលួយ ដើម្បីកសាងសំណុំបែបបទ សម្រាប់បញ្ជូនទាំងគ្រូ និងទាំងសិស្ស ដែលទទួល និងសូកលុយ ក្នុងពេលប្រលង ទៅកាន់តុលាការ។
ដោយព្រមានកុំឲ្យគ្រូ និងសិស្ស ទទួល និងសូកលុយ ក្នុងថ្ងៃប្រលង លោក ឱម យ៉ិនទៀង បានគូសបញ្ជាក់ថា “កូនសិស្សឲ្យលុយគ្រូ គ្រូទទួលលុយសិស្ស ក្នុងពេលប្រលង ជាការប្រព្រឹត្តបទល្មើស ដែលត្រូវទទួលទោសតាមច្បាប់។ អង្គភាពប្រឆាំងអំពើពុករលួយ មានភារៈកិច្ច ធ្វើយ៉ាងណា ចាប់ឲ្យបាន ហើយកសាងសំណុំបែបបទ ទៅតុលាការ ដោយគ្មានការលើកលែងទេ។
យុទ្ធនាការប្រឆាំងអំពើពុករលួយ និងភាពមិនប្រក្រតី ក្នុងពេលប្រលងឌីប្ល៊ូម និងប្រលងបាក់ឌុប នៅពេលខាងមុខ ត្រូវបានអង្គភាពប្រឆាំងអំពើពុករលួយ និងក្រសួងអប់រំ អះអាងថា ដើម្បីពង្រឹងគុណភាពអប់រំ ក្នុងន័យថា “អ្នកចេះ គឺជាប់។
វិធានការថ្មី ក្នុងពេលប្រលងចំណេះទូទៅដូច្នេះ ត្រូវបានលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានសាទរ ហើយប្រកាសស្វាគមន៍ និងចូលរួមជាមួយអង្គភាពប្រឆាំងអំពើពុករលួយ និងក្រសួងអប់រំ ដើម្បីប្រឆាំងអំពើពុករលួយ និងភាពមិនប្រក្រតី ក្នុងពេលប្រលង។
ប៉ុន្តែលោក រ៉ុង ឈុន បានអំពាវនាវដល់អង្គភាពប្រឆាំងអំពើពុករលួយ និងក្រសួងអប់រំ ត្រូវអនុវត្តឲ្យស្មើភាពគ្នា ចំពោះមុខច្បាប់ ជៀសវាង អ្នកធំ មិនជាប់ទោស ព្រោះថា ភាពមិនប្រក្រតី ដូចជា ការបែកធ្លាយវិញ្ញាសារប្រលង និងធ្វើចំលើយវិញ្ញាសារលក់ កន្លងមក គឺច្រើនតែចេញពីមន្ត្រីថ្នាក់ក្រសួង សហការជាមួយប្រធានមណ្ឌលប្រលង៕
No comments:
Post a Comment