ស្ត្រីម្នាក់ បារម្ភខ្លាច ត្រូវសម្លាប់ ដោយសាររាយការណ៍ រឿងជួញដូរ ពលកម្មកុមារ នៅចម្ការអំពៅ
ដោយ ឡេង ម៉ាលី / អាស៊ិសេរី | ២៣ មីនា ២០១៤
ស្ត្រី ជាកម្មករ ចម្ការអំពៅ នៅខេត្តព្រះវិហារ មួយរូប ឈ្មោះ អឿ ប៊ុនថានី កំពុងព្រួយបារម្ភ ខ្លាចគេសម្លាប់ បន្ទាប់ពី បានរាយការណ៍ រឿងជួញដូរ ពលកម្មកុមារ នៅចម្ការអំពៅ ក្នុងស្រុកត្បែងមានជ័យ។
លោកស្រី អឿ ប៊ុនថានី៖ «កុមារមាន ២០នាក់ អាយុ ១១ ១២ ១៣ ១៥ ហើយធ្វើការកម្លាំងមនុស្សចាស់។ ធ្វើឱ្យថៃ ធ្វើឱ្យចិន ធ្វើឱ្យខ្មែរ ថៅកែឈ្មោះ ហេង ឈ្មោះ សែ។ ខ្ញុំបានទៅប្ដឹងដល់ក្រសួងមានសមត្ថកិច្ច និងស្នងការខេត្ត។ អ៊ីចឹងគេមានការបណ្ដេញ គេប្រមាថមើលងាយតាមសម្លាប់ខ្ញុំ។ ឥឡូវហ្នឹងឱ្យប្ដីខ្ញុំនៅកន្លែងធ្វើការ តែចំណែកខ្ញុំវាបណ្ដេញតាំងពីយប់មិញ ហើយឥឡូវហ្នឹងក៏វាមកបណ្ដេញទៀត។ វាយកម្នាក់មានកាំភ្លើងខ្លី អង្គរក្សដើរច្រងេងច្រងាងតាំងពីយប់មិញមក។ ស្លៀកពាក់ស៊ីវិល»។
ព្រះរាជអាជ្ញាអមតុលាការខេត្តព្រះវិហារ លោក លី លន់ មានប្រសាសន៍ថា បានទទួលព័ត៌មាននេះហើយ ហើយលោកបានបញ្ជាទៅខាងនគរបាលឱ្យធ្វើការលើរឿងហ្នឹងហើយ។
លោកស្រី អឿ ប៊ុនថានី បញ្ជាក់ថា កងរាជអាវុធហត្ថខេត្តបានចុះមកស៊ើបអង្កេតបញ្ហានេះហើយ នៅថ្ងៃទី២៣ មីនា។ រីឯខាងនគរបាល នឹងចុះមកពិនិត្យ នៅថ្ងៃទី២៤ មីនា។
ដោយឡែកមន្ត្រីអង្គការការពារសិទ្ធិមនុស្សអាដហុក (Adhoc) លោក ឡោ ច័ន្ទ ថ្លែងថា លោកក៏នឹងចុះទៅធ្វើការរឿងនេះ ព្រោះលោកក៏បានទទួលបណ្ដឹងដូចគ្នាដែរ៕
No comments:
Post a Comment