លោក សម រង្ស៊ី ថ្លែងទៅកាន់អ្នកគាំទ្រ នៅទីស្នាក់ការកណ្តាលគណបក្សសង្គ្រោះជាតិ (រូបថត៖ តាំង វីដា)
លោក សម រង្ស៊ី៖ ទីលានប្រជាធិបតេយ្យ ជាទីលាន ផ្ដាច់ការ កុម្មុយនីស្ត
ដោយ៖ តាំង វីដា និង ជន ស្រីណុច | ថ្ងៃអាទិត្យ ទី30 ខែមិនា ឆ្នាំ2014
លោក សម រង្ស៊ី ប្រធាន គណបក្ស សង្គ្រោះជាតិ ឲ្យឈ្មោះ ទីលានប្រជាធិបតេយ្យ ថា ជាទីលានផ្ដាច់ការ កុម្មុយនីស្ត ក្រោមការដឹកនាំ របស់ គណបក្ស កាន់អំណាច។
ការប្រកាសនេះធ្វើឡើងក្នុងសមាជមហាជនលើកទីពីរ នាល្ងាចថ្ងៃអាទិត្យនេះ របស់គណបក្សសង្គ្រោះជាតិ បន្ទាប់ពីសាលារាជធានី និងក្រសួងមហាផ្ទៃមិនអនុញ្ញាតឲ្យគណបក្សនេះ ធ្វើសមាជមហាជននៅទីលានប្រជាធិបតេយ្យ។
ក្រោយពីអនុប្រធានគណបក្សបក្សសង្គ្រោះជាតិ លោកកឹម សុខា បានថ្លែងសារនយោបាយចប់ លោកសម រង្ស៊ី បានប្ដូរទីតាំងថ្លែងសារពីមុខទីស្នាក់ការបក្ស នៅសង្កាត់ចាក់អង្រែ មកថ្លែងនៅកណ្ដាលផ្លូវជាតិលេខ២ ដោយអះអាងថា នេះជាការប្រមូលផ្ដុំនៅទីសាធារណៈដែលមានមនុស្សលើសពីដប់នាក់ ដែលអាជ្ញាធរមិនហ៊ានក្នុងការចាត់វិធានការណ៍ឡើយ ព្រោះនេះជាការប្រមូលផ្ដុំជាសាធារណៈដែលស្របតាមធម្មនុញ្ញនៃព្រះរាជាណាចក្រកម្ពុជា។ លោកបន្តថា បើទោះបីជាទីលានប្រជាធិបតេយ្យជាទីលានផ្ដាច់ការក្ដី ក៏ប្រជាពលរដ្ឋនៅតែអាចបញ្ចេញមតិនៅទីសាធារណៈផ្សេងៗទៀតបានដែរ។
លោកប្រកាសជំហរចុងក្រោយរបស់គណបក្សសង្គ្រោះជាតិ គឺទាមទារឲ្យមានការបោះឆ្នោតឡើងវិញ និងការកែប្រែ គ.ជ.ប បែបស៊ីជម្រៅ។
កាលពីថ្ងៃសុក្រ ទី២៨ ខែមីនា សាលារាជធានីភ្នំពេញ និង ក្រសួងមហាផ្ទៃ បានព្រមានចាត់វិធានការតាមផ្លូវច្បាប់ មិនអនុញ្ញាតឲ្យគណបក្សសង្គ្រោះជាតិ រៀបចំសមាជមហាជន នៅទីតាំងសាធារណៈណាមួយក្នុងភូមិសាស្ត្ររាជធានីភ្នំពេញឡើយ តែអនុញ្ញាតឲ្យមានការរៀបចំពិធីនេះ នៅទីស្នាក់ការខ្លួន ឬទីតាំងឯកជនណាមួយ ដោយត្រូវសហការជាមួយសាលារាជធានីភ្នំពេញ ក្នុងការរៀបចំសន្តិសុខ និងសណ្តាប់ធ្នាប់។
ក្នុងគោលបំណងការពារសុវត្ថិភាពអ្នកគាំទ្ររបស់ខ្លួន ខណៈដែលកម្លាំងសមត្ថកិច្ចក្រោមការដឹកនាំរបស់គណបក្សប្រជាជនកម្ពុជាដាក់ពង្រាយនៅតាមទីសាធារណៈសំខាន់ៗ ដែលគណបក្សសង្គ្រោះជាតិគ្រោងធ្វើសមាជមហាជននេះ គណបក្សសង្គ្រោះជាតិបានប្ដូរទីតាំងធ្វើសមាជពីកន្លែងដែលបានស្នើសុំ មកធ្វើនៅមុខទីស្នាក់ការគណបក្សរបស់ខ្លួនវិញ៕
No comments:
Post a Comment