ទីលាប្រជាធិបតេយ្យ មានការយាមកាមពីសមត្ថកិច្ច មិនឲ្យមានការជួបជុំសម្តែងមតិ (រូបថត៖ ណាត សុភាព)
សង្គមស៊ីវិល រិះគន់ ការបិទទីលានប្រជាធិបតេយ្យ ថា ជាការរំលោភ សិទ្ធិពលរដ្ឋ
ដោយ៖ កាន់ វិច្ឆិកា / វីអូឌី | ថ្ងៃព្រហស្បតិ៍ ទី13 ខែមិនា ឆ្នាំ2014
ក្រុមសង្គមស៊ីវិល ដែលឃ្លាំមើលលើការរំលោភសិទ្ធិមនុស្សនៅកម្ពុជា រិះគន់អាជ្ញាធររាជធានីភ្នំពេញ ដែលប្រកាសបិទទីលានប្រជាធិបតេយ្យមិនឲ្យមានការប្រមូលផ្តុំធ្វើបាតុកម្មណាមួយនោះ ថាជាការរំលោភសិទ្ធិមនុស្ស និងជាបំរាមខុសច្បាប់។
ការលើកឡើងបែបនេះ បន្ទាប់ពីអភិបាលរាជធានី លោក ប៉ា សុជាតិវង្ស កាលពីថ្ងៃពុធម្សិលមិញ ប្រកាសផ្ទាល់មាត់ថា ទីលានប្រជាធិបតេយ្យ នឹងត្រូវបិទចាប់ពីថ្ងៃប្រកាសនេះតទៅ ដោយមិនអនុញ្ញាតឲ្យមានការប្រមូលផ្តុំធ្វើបាតុកម្មណាមួយឡើយ រហូតដល់បិទបញ្ចប់ការស៊ើបអង្កេតករណីហិង្សានៅផ្លូវវ៉េងស្រេង។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូ លោក អំ សំអាត មានប្រសាសន៍ថា ការប្រកាសបិទទីលានប្រជាធិបតេយ្យរបស់អភិបាលរាជធានីភ្នំពេញ ជាការរំលោភលើសិទ្ធិសេរីភាពរបស់ប្រជាពលរដ្ឋ និងមិនត្រឹមត្រូវតាមច្បាប់ដែលបានចែងក្នុងរដ្ឋធម្មនុញ្ញ និងច្បាប់ស្តីពីការធ្វើបាតុកម្មដោយសន្តិវិធី។
ប្រធានក្រុមប្រឹក្សាភិបាលមជ្ឈមណ្ឌលសិទ្ធិមនុស្ស លោក អ៊ូ វីរៈ លើកឡើងដែរថា លោកមានការសោកស្តាយយ៉ាងខ្លាំង ចំពោះអភិបាលរាជធានីក្នុងការប្រកាសបិទទីលានប្រជាធិបតេយ្យ ដែលជាកន្លែងសម្រាប់បញ្ចេញមតិរបស់ប្រជាពលរដ្ឋ។
នាយិកាអង្គការសីលការ លោកស្រី ធីតា ឃឹះ យល់ថា ការបិទទីលានប្រជាធិបតេយ្យ អាចជាលេសរបស់រដ្ឋាភិបាលក្នុងការបិទមិនឲ្យមានការធ្វើបាតុកម្ម ព្រោះថា ទីលានប្រជាធិបតេយ្យ និងអំពើហិង្សានៅផ្លូវវេងស្រេងមិនមានជាប់ទាក់ទងគ្នាទេ ហើយរហូតមកដល់ពេលនេះមិនទាន់ឃើញមានលទ្ធផលស៊ើបអង្កេតណាមួយនៅឡើយ គឺឃើញតែចាប់ពលរដ្ឋ និងសកម្មជនសិទ្ធិមនុស្សដែលមិនមានកំហុសដាក់ទោសទៅវិញ។
VOD មិនអាចសុំការបកស្រាយបន្ថែមពីអភិបាលរាជធានីភ្នំពេញ លោក ប៉ា សុជាតិវង្ស និងអ្នកនាំពាក្យបានទេ ដោយលោកប្រាប់ថារវល់ប្រជុំ។
តាមច្បាប់រដ្ឋធម្មនុញ្ញកម្ពុជា មាត្រា៣៧ និងមាត្រា៤១ បានចែងថា ពលរដ្ឋមានសិទ្ធិធ្វើកូដម្ម និងបាតុកម្មដោយសន្តិវិធី និង សេរីភាពក្នុងការបញ្ចេញមតិ។
ចំណែកមាត្រា២៨នៃច្បាប់ស្តីពីការធ្វើបាតុកម្មដោយសន្តិវិធី ចែងថា ថ្នាក់ដឹកនាំរាជធានី ឬខេត្តនីមួយៗ ត្រូវបង្កើតកន្លែងបញ្ចេញមតិជាសាធារណៈ សម្រាប់ធ្វើបាតុកម្មដោយសន្តិវិធី ឬបញ្ចេញមតិជាសាធារណៈ។
ក្រុមសិទ្ធិមនុស្ស បានហៅបំរាមបិទទីលានប្រជាធិបតេយ្យនេះ ថាផ្ទុយនឹងច្បាប់កម្ពុជាដែលមានចែង។ ជាមួយគ្នានេះ អ្នករាយការណ៍ពិសេសសិទ្ធិមនុស្សប្រចាំកម្ពុជា លោក សុរិយា ស៊ូប៊ែឌី បានស្នើឲ្យរដ្ឋាភិបាលកម្ពុជា លើកច្បាប់មួយណាដែលអនុញ្ញាតឲ្យអាជ្ញាធរបិទការជួបនៅទីលានប្រជាធិបតេយ្យ ព្រោះបំរាមនេះ ក៏ផ្ទុយនឹងសន្ធិសញ្ញាអន្តរជាតិផងដែរ៕
No comments:
Post a Comment