ជំទប់ឃុំទី២ បក្ស សមរង្ស៊ី នៅព្រះវិហារ ត្រូវចាប់ខ្លួន ចោទ ពីបទមនុស្សឃាត ដោយអចេតនា
ដោយ ហង្ស សាវយុត / អាស៊ីសេរី | ០៨ មីនា ២០១៤
សកម្មជនគណបក្ស សម រង្ស៊ី ម្នាក់ទើបតែឡើងកាន់តំណែងជំទប់ទី២ នៅឃុំយាង ស្រុកជាំក្សាន្ត បាន១ថ្ងៃ ក៏ត្រូវបានសមត្ថកិច្ចចាប់ខ្លួនពីបទមនុស្សឃាតដោយអចេតនា។ ដើមហេតុនៃការចាប់ខ្លួននោះ គឺដោយសារតែនៅក្នុងផ្ទះរបស់សកម្មជនមានអាគុយ និងឧបករណ៍អគ្គិសនីសម្រាប់ចាប់សត្វចង្រិត ក៏ប៉ុន្តែក្មេងស្រីតូចម្នាក់បានដើរទៅប៉ះបណ្ដាលឱ្យឆក់ស្លាប់។
ក្រោយពីការចាប់ខ្លួនសកម្មជនគណបក្សនោះមក គឺក្រុមប្រជាពលរដ្ឋដែលជាគ្រួសារក្មេងស្រីរងគ្រោះ និងសមត្ថកិច្ច មានការយល់ឃើញផ្ទុយពីគ្នា។
ក្នុងចំណោមក្រុមអ្នកភូមិទាំងនោះ មានខ្លះជាសាច់ញាតិរបស់បុរសដែលជាសកម្មជននៃគណបក្សប្រឆាំង ហើយក៏មានឪពុករបស់ក្មេងស្រីដែលស្លាប់ដែរ។
ឪពុករបស់ក្មេងស្រី គឺលោក ហម ថ្មី។ លោកបានមានប្រសាសន៍កាលពីរសៀលថ្ងៃសៅរ៍ ទី៨ ខែមីនា ថា កូនស្រីតូចរបស់គាត់ម្នាក់ឈ្មោះ ថ្មី ឃ្លី អាយុ ១ខួប ៩ខែ បានស្លាប់កាលពី ៣ថ្ងៃមុន នៅក្នុងផ្ទះបងប្រុសរបស់គាត់ ដែលជាសកម្មជននៃគណបក្ស សម រង្ស៊ី ទើបតែឡើងកាន់តំណែងជាជំទប់ទី២ នៅឃុំយាង បាន១ថ្ងៃ។ បុរសដដែលបានបញ្ជាក់ថា ថ្វីត្បិតតែកូនស្រីរបស់គាត់ស្លាប់ ក៏ប៉ុន្តែគាត់មិនដឹងពីមូលហេតុច្បាស់លាស់ថា តើវាបណ្ដាលមកពីកូនស្រីដួលទៅប៉ះ និងម៉ូតូ ឬក៏ប៉ះនឹងអាគុយដែលបងប្រុសរបស់គាត់បានទុក ដើម្បីចាប់សត្វចង្រិត ឬក៏យ៉ាងណាទេ?
លោក ហម ថ្មី បញ្ជាក់ថា លោកមិនបានប្ដឹងចោទប្រកាន់ជុំវិញរឿងកូនស្រីរបស់គាត់ស្លាប់នោះទេ ហើយលោកក៏ទាមទារឱ្យតុលាការដោះលែងអ្នកដែលសមត្ថកិច្ចចាប់ខ្លួនដែរ៖ «ខ្ញុំមកនេះធានាខ្លួនបងទៅវិញ ព្រោះខ្ញុំអត់បានប្ដឹងអត់អីទេ ធ្វើម៉េចវាចៃដន្យ។ មិនដឹងថាកូនខ្ញុំដួលទៅលើម៉ូតូ ឬក៏ដួលទៅលើអាគុយ វាប៉ះដើមទ្រូងក៏មិនដឹង ឬក៏ខ្សែភ្លើងឆក់ក៏មិនដឹង?»។
ការទាមទារនេះ ធ្វើឡើងបន្ទាប់ពីសមត្ថកិច្ចបានចាប់ខ្លួនបុរសម្នាក់ឈ្មោះ សៅ សុខា ជាជំទប់ទី២ ឃុំយាង កាលពីថ្ងៃទី៧ ខែមីនា កន្លងទៅ ដោយចោទប្រកាន់ពីបទមនុស្សឃាតដោយអចេតនា។
ចំណែកមន្ត្រីនៃគណបក្ស សម រង្ស៊ី ប្រចាំខេត្តព្រះវិហារ ក៏កំពុងតែតវ៉ាចំពោះបញ្ហានេះ ព្រមទាំងចាត់ទុកថា ការចាប់ខ្លួននោះ គឺជារឿងសំអប់ខាងនយោបាយច្រើនជាង។
ប្រធានប្រតិបត្តិនៃគណបក្ស សម រង្ស៊ី ខេត្តព្រះវិហារ លោក សុខ ណារាន បានមានប្រសាសន៍ថា លោកបានមើលឃើញភាពមិនប្រក្រតីចំពោះការចាប់ខ្លួនជំទប់ទី២ នៃគណបក្ស សម រង្ស៊ី នោះ ពីព្រោះថា ករណីខ្សែភ្លើងឆក់មនុស្សនេះ គឺធ្លាប់កើតមាននៅក្នុងទីរួមខេត្តព្រះវិហារ ដែរ ក៏ប៉ុន្តែសមត្ថកិច្ចមិនបានចាប់ខ្លួនម្ចាស់អគ្គិសនីណាម្នាក់ទេ៖ «ការឆក់ខ្សែភ្លើងនេះ នៅសាលាក្រុងក៏មានដែរ។ ខាងសមត្ថកិច្ចហ្នឹងគាត់អត់មានហៅម្ចាស់អគ្គិសនីទៅសាកសួរចម្លើយ ឬក៏ប្រមូលវត្ថុតាងអីយកទៅទុកទេ ប៉ុន្តែចំណែកនៅខាងឃុំយាង គឺរឿងវាដូចគ្នាទេ ហេតុអ្វីបានទៅចាប់ប៉ះពាល់លើសមាជិកគណបក្សនយោបាយ?»។
ក្រុមអ្នកច្បាប់បានពន្យល់ថា តាមផ្លូវច្បាប់ រឿងដែលសកម្មជនគណបក្ស សម រង្ស៊ី មានរក្សាទុកអាគុយ និងឧបករណ៍អគ្គិសនីឆក់នៅក្នុងផ្ទះ ដែលបណ្ដាលឱ្យឆក់ស្លាប់ក្មេងស្រីនោះ ទោះយ៉ាងណាក៏ជាបទល្មើសមនុស្សឃាតដោយអចេតនា។
អ្នកសម្របសម្រួលសមាគមការពារសិទ្ធិអាដហុក (Adhoc) ខេត្តព្រះវិហារ លោក ឡោ ចាន់ បានមានប្រសាសន៍ថា លោកនឹងចុះស៊ើបអង្កេតបញ្ហានេះឱ្យស៊ីជម្រៅ ក៏ប៉ុន្តែក្នុងកាលៈទេសៈនេះ សង្គមស៊ីវិលមិនទាន់ហ៊ានកំណត់ថា តើការចាប់ខ្លួនសកម្មជនគណបក្ស សម រង្ស៊ី ម្នាក់នោះ វាពិតជារឿងស្អប់ខាងនយោបាយ ច្រើនជាងការអនុវត្តច្បាប់ ឬក៏យ៉ាងណានៅឡើយទេ?
No comments:
Post a Comment