អ្នកបឹងកក់ ៣គ្រួសារ ដែលត្រូវគេ លួចដុតផ្ទះ បដិសេធ ទទួលយកផ្ទះ ដែលសាលារាជធានី ផ្ដល់ឲ្យ
ដោយ៖ កាន់ វិច្ឆិកា / វីអូឌី | ថ្ងៃចន្ទ ទី24 ខែមិនា ឆ្នាំ2014
អ្នកបឹងកក់ ដែលត្រូវបាន គេលួចដុតផ្ទះ ចំនួន ៣គ្រួសារ បដិសេធ ការផ្តល់សំណង ជាផ្ទះ នៅម្តុំជ្រោយចង្វា របស់សាលារាជធានី ដោយទាមទារ ឲ្យមានការដោះស្រាយ តាមផ្លូវច្បាប់ និងយុត្តិធម៌។
ពលរដ្ឋរងគ្រោះ កញ្ញា លី សៀវមីង ប្រាប់ VOD នៅព្រឹកថ្ងៃចន្ទនេះថា អភិបាលរាជធានី លោក ប៉ា សុជាតិវង្ស បានអញ្ជើញពួកគាត់ដែលរងគ្រោះពីការដុតផ្ទះចំនួន ៣គ្រួសារមកជួបកាលពីព្រឹកមិញ ដើម្បីដោះស្រាយបញ្ហារដ្ឋបាល។ កញ្ញាបន្តថា លោក ប៉ា សុជាតិវង្ស បានប្រាប់ឲ្យពួកគាត់ទទួលយកផ្ទះមួយល្វែងនៅម្តុំជ្រោយចង្វា ដែលមានទំហំប្រហែលជា ៤ គុណ ១២ ប៉ុណ្ណោះ។ កញ្ញាបន្ថែមថា កញ្ញារួមនិងពលរដ្ឋ២គ្រួសារផ្សេងទៀត មិនព្រមទទួលយកទេ ហើយនៅតែប្រកាន់ជំហរទាមទារឲ្យមានការផ្តល់យុត្តិធម៌ ពាក់ព័ន្ធនឹងការដុតផ្ទះរបស់ពួកគេ។
VOD មិនអាចទាក់ទងអភិបាលរាជធានី លោក ប៉ា សុជាតិវង្ស និងអ្នកនាំពាក្យ លោក ឡុង ឌីម៉ង់ បានទេ។
ទំនាស់ដីធ្លីរវាងពលរដ្ឋ៤គ្រួសារនៅតំបន់បឹងកក់១ ជាមួយនឹងក្រុមហ៊ុន ឃុន សៀ កើតឡើងចាប់ពីខែមេសា ឆ្នាំ២០១៣ ដោយពលរដ្ឋអះអាងថា ក្រុមហ៊ុនមួយនេះបានព្យាយាមទិញយកដីពលរដ្ឋនៅទីនោះចំនួន៣គ្រួសារ ដោយឲ្យតម្លៃ១៥០០០ដុល្លារក្នុងមួយគ្រួសារ។ ប៉ុន្តែ ប្រជាពលរដ្ឋមិនព្រមលក់ ហើយក្រោយមកក្រុមហ៊ុនក៏ព្យាយាមរកគ្រប់មធ្យោបាយដើម្បីរំខានដល់ពួកគាត់៕
No comments:
Post a Comment