គ្រូបង្រៀនលើកបដាតវ៉ាទាមទារឡើងប្រាក់ខែ នៅវិទ្យាល័យ ជា ស៊ីម ចំរើនរដ្ឋ នៅខណ្ឌឫស្សីកែវ រាជធានីភ្នំពេញ នៅព្រឹកថ្ងៃ៨ មករា ឆ្នាំ២០១៤។
RFA/Den Ayuthyea
លោក ហ៊ុន សែន ធៀបប្រាក់ខែគ្រូបង្រៀន ជំនាន់នេះ ថា ប្រសើរជាង ទសវត្សរ៍ ទី៨០
ដោយ វោហារ ជាតិ / អាស៊ីសេរី | ១២ មីនា ២០១៤
លោកនាយករដ្ឋមន្ត្រី ហ៊ុន សែន បានប្រៀបប្រដូចប្រាក់ខែគ្រូបង្រៀនជំនាន់នេះថា បានប្រសើរជាងប្រាក់ខែគ្រូបង្រៀនជំនាន់វៀតណាម ត្រួតត្រាប្រទេសកម្ពុជា ក្នុងទសវត្សរ៍ឆ្នាំ១៩៨០។
លោកថា គ្រូបង្រៀនក្រោយរបប ប៉ុល ពត ដួលរលំនៅឆ្នាំ១៩៧៩ ទៅ មិនមានប្រាក់ខែទេ គឺបានតែរបបអង្ករ និងការឧបត្ថម្ភគ្រឿងឧបភោគបរិភោគពីរដ្ឋាភិបាលជំនាន់នោះបន្តិចបន្តួច។
លោក ហ៊ុន សែន មានប្រសាសន៍ដូច្នេះនៅក្នុងពិធីចែកសញ្ញាបត្របញ្ចប់វគ្គសិក្សាគ្រូបង្រៀនជាង ១ពាន់នាក់ នៅថ្ងៃទី១១ មីនា នៅវិទ្យាស្ថានជាតិអប់រំ នារាជធានីភ្នំពេញ។ លោកបានបញ្ជាក់ថា រដ្ឋាភិបាលមិនមានលទ្ធភាពដំឡើងប្រាក់ខែមន្ត្រីរាជការបានខ្ពស់ដូចថ្នាក់ដឹកនាំបក្សប្រឆាំងបានឃោសនាកន្លងមកទេ។ ក៏ប៉ុន្តែ រដ្ឋាភិបាលអាចដំឡើងប្រាក់ខែគ្រូបង្រៀន រួមទាំងមន្ត្រីរាជការបន្តិចម្ដងៗ ទៅតាមដំណើរការកំណែទម្រង់ស៊ីជម្រៅរបស់រដ្ឋាភិបាល។
ឆ្លើយតមទៅនឹងសម្ដីរបស់លោកនាយករដ្ឋមន្ត្រីនេះ លោក កឹម សុខា អនុប្រធានបក្សសង្គ្រោះជាតិ បានប្រដូច លោក ហ៊ុន សែន ទៅនឹងមេដឹកនាំអសមត្ថភាព ដែលចូលចិត្តប្រៀបធៀបប្រទេសកម្ពុជា បច្ចុប្បន្នទៅនឹងភាពអន់ថយ ទៅអតីតកាល មិនព្រមប្រៀបធៀបប្រទេសជាតិទៅអនាគត ឬទៅនឹងប្រទេសជឿនលឿនជិតខាងខ្លួន។
លោក កឹម សុខា បន្តថា បញ្ហាដែលលោកនាយករដ្ឋមន្ត្រី ហ៊ុន សែន មិនអាចដំឡើងប្រាក់ខែឲ្យមន្ត្រីរាជការបាន ដោយសារកត្តាពីរសំខាន់ គឺថ្នាក់ដឹកនាំរដ្ឋាភិបាលអសមត្ថភាពក្នុងការប្រមូលថវិកាជាតិ និងមានអំពើពុករលួយខ្លាំងក្នុងជួរមន្ត្រីរដ្ឋាភិបាល៕
No comments:
Post a Comment