ករណីរត់ពន្ធ រថយន្ត សេរីទំនើប ពីទឹកដីថៃ ចូលមក កម្ពុជា
ដោយ សួន សុផលមុន្នី / អាស៊ីសេរី | ១០ មីនា ២០១៤
រដ្ឋាភិបាលកម្ពុជា បាត់បង់ប្រាក់ចំណូលជាច្រើនលានដុល្លារជារៀងរាល់ឆ្នាំ ដោយសារការនាំរថយន្តគេចពន្ធចូលតាមច្រកទ្វារអន្តរជាតិប៉ោយប៉ែត។ រថយន្តប្រភេទសេរីទំនើបទាំងនោះ មានដូចជា រថយន្តម៉ាក Land cruiser និងរថយន្តម៉ាក Lexus ជាដើម។
អ្នករត់ពន្ធទាំងនោះបានយកស្លាកលេខឡានពីស្រុកខ្មែរចូលទៅក្នុងប្រទេសថៃ បន្ទាប់មកយកស្លាកលេខនោះទៅបិទលើរថយន្តសេរីទំនើបបើកឆ្លងកាត់តាមច្រកទ្វារអន្តរជាតិប៉ោយប៉ែត ចូលមកកម្ពុជា។
ប្រភពពីក្រុមអាជីវករនិងប្រជាពលរដ្ឋរស់នៅក្រុងប៉ោយប៉ែត ថ្លែងកាលពីថ្ងៃទី១០ មីនា ថា ទំនិញបន្តិចបន្តួចដែលពួកគាត់បានទិញ និងដឹកចូលមកពីប្រទេសថៃ កាត់ច្រកទ្វារអន្តរជាតិប៉ោយប៉ែត ត្រូវបានមន្ត្រីគយចាប់ និងផាកពិន័យយ៉ាងច្រើនសន្ធឹកសន្ធាប់ ប៉ុន្តែមន្ត្រីគយមានការធូររលុងជាមួយក្រុមឈ្មួញរកស៊ីធំ៖ «ថៅកែធំឃុបឃិតជាមួយគ្នាហ្នឹង បង់លុយក្រៅ ហើយអីវ៉ាន់ចេញមកទាំងឡាន អ៊ីចឹងគេចេញមកស្រួលចំពោះរូបខ្ញុំជាអាជីវករតូចតាចគេចាប់យកទៅបង់ពន្ធ វាអយុត្តិធម៌ចំពោះគ្នាមានលុយបន្តិចបន្តួចទៅរកស៊ី។ ចំពោះខ្ញុំអាជីវករមិនដឹងធ្វើម៉េចជាមួយគ្នារវល់គេចាប់យកទៅបង់ពន្ធពេក»។
ការបង់ពន្ធតាមច្បាប់កំណត់គឺតម្រូវក្រុមអាជីវករទាំងនោះនាំគ្នាចូលទៅបង់ពន្ធនៅទីស្នាក់ការគយ និងចេញបង្កាន់ដៃបង់ពន្ធអោយបានត្រឹមត្រូវ ប៉ុន្តែក្រុមអាជីវករថ្លែងថា មន្ត្រីគយបានបែរជាឈរចាំទារលុយនៅក្រោមខ្លោងទ្វារប្រាសាទ ជាប់ច្រកទ្វារអន្តរជាតិប៉ោយប៉ែតនោះទៅវិញ។ បញ្ហានេះ អាជីវករតូចតាចទាំងនោះជួបការលំបាកយ៉ាងខ្លាំង ពួកគាត់មិនហ៊ានប្រកែកតវ៉ានោះឡើយ។
អាជីវករ៖ «វាមានការលំបាកមែនទែន! ការដឹកទំនិញមក អ៊ីចឹងពេលខ្លះបានបង់ហើយ បញ្ជាឲ្យគយចល័តហ្នឹងចាប់ទៀត ចាប់តែអ្នកតូចតាចទេ អ្នកធំគេស៊ីលុយអីអ៊ីចឹងបង់ជាខែ ទំនិញគេបង្កប់ពីក្រោម ដាក់ពីលើ វាអយុត្តិធម៌សម្រាប់អ្នករកស៊ីតូចតាចណាស់ វាពិបាកយើងរកគ្រាន់ចិញ្ចឹមគ្រួសារបន្តិចបន្តួចច្រើនមានច្រើននាក់ គេអត់ហ៊ាននិយាយ អ៊ីចឹងគយដឹងគយធ្វើបាប»។
ក្រៅពីនេះ នៅច្រកទ្វារអន្តរជាតិប៉ោយប៉ែត ក៏ក្រុមឈ្មួញរកស៊ីរត់ពន្ធរថយន្តស៊ីទំនើបថែមទៀត។
ប្រភពបញ្ជាក់ថា រថយន្តម៉ាក Land cruiser និងរថយន្តម៉ាក Lexus សេរីទំនើបត្រូវនាំចូលមកពីទឹកដីថៃ ឆ្លងកាត់ច្រកទ្វារអន្តរជាតិប៉ោយប៉ែត ដោយពុំបានបង់ពន្ធជូនរដ្ឋនោះឡើយ៖ «ឡានពេលគេនាំចូលមកថៅកែគេអត់បង់ពន្ធគយទេ គេជិះឡានល្អពីនេះទៅមួយអ៊ីចឹងទៅ ដល់នុះ ដោះស្លាកលេខ ខេមរភូមិន្ទបិទមកពីនុះ អ៊ីចឹងរថយន្តទំនើបដែលគយវាមិនដឹង ច្រើនប្រភេទក្នុងមួយខែ ចេញចូលសេរី៥៧០»។
ការរត់ពន្ធរថយន្តសេរីទំនើបនេះ គេមិនដឹងថា មន្ត្រីគយខ្មែរប្រចាំការនៅច្រកទ្វារនោះពុំបានដឹង ឬបានដឹងនោះទេ។ ការរត់ពន្ធរថយន្តសេរីទំនើបឆ្លងកាត់ច្រកទ្វារអន្តរជាតិប៉ោយប៉ែតនេះ បានធ្វើឲ្យប៉ះពាល់ដល់ប្រាក់ចំណូលបង់ពន្ធជូនរដ្ឋ។ ក្រុមអាជីវករលើកឡើងថា នៅពេលមានមន្ត្រីថ្នាក់លើចុះទៅត្រួតពិនិត្យការចេញចូលទំនិញនៅច្រកទ្វារប៉ោយប៉ែតនោះ ម្ដងៗ មន្ត្រីគយនៅទីនោះបានប្រាប់ឲ្យឈ្មួញរកស៊ីនាំទំនិញធំនោះផ្អាកសកម្មភាពជាបណ្ដោះអាសន្ន។
វិទ្យុអាស៊ីសេរីមិនអាចសុំការបញ្ជាក់ពីលោក ឈួន ហៃ ប្រធានការិយាល័យគយប្រចាំច្រកទ្វារអន្តរជាតិប៉ោយប៉ែត ដើម្បីបញ្ជាក់ជុំវិញបញ្ហានេះបានទេ ប៉ុន្តែប្រធានសាខាគយប្រចាំខេត្តបន្ទាយមានជ័យ លោក ថោង សុខាំភូ ថ្លែងថា មន្ត្រីគយថ្នាក់លើពុំបានដឹងពីបញ្ហានេះទេ។ កន្លងមក លោកបានចុះពង្រឹង មិនអនុញ្ញាតឲ្យមានការរត់ពន្ធរថយន្តឆ្លងដែននោះឡើយ។
លោក ថោង សុខាំភូ៖ «បញ្ហាហ្នឹងមានតែសួរមេដឹកនាំក្រោមហ្នឹងអោយឆ្លើយ ខ្ញុំនៅនេះ ចំពោះឡានគ្រប់គ្រងចេញចូលខ្ញុំពិបាកនិយាយដែរ រឿងចាប់អីវ៉ាន់ជារឿងគេត្រូវតែអោយចាប់ បើថា បង់តាមក្រោយមាន ឬមិនមាន ខ្ញុំមិនហ៊ានឆ្លើយទេ ខ្ញុំឲ្យកែសម្រួលមិនអោយធ្វើអ៊ីចឹងទេ»។
ពាក់ព័ន្ធបញ្ហានេះ អភិបាលខេត្តបន្ទាយមានជ័យ លោក គោ ស៊ុំសារឿត បញ្ជាក់ថា កន្លងមកអាជ្ញាធរខេត្តពុំដែលបានជួបប្រជុំត្រួតពិនិត្យពីប្រាក់ចំណូលរបស់ស្ថាប័នគយនោះឡើយ។ ពាក់ព័ន្ធទៅបទល្មើសរត់ពន្ធរថយន្តសេរីទំនើបឆ្លងដែន កន្លងមកមានអាជីវករប្រាប់ថា បានកើតមានឡើងពិតប្រាកដមែន។ លោកបន្តថា ក្នុងនាមថ្នាក់ដឹកនាំខេត្ត និងធ្វើការពិនិត្យជុំវិញភាពមិនប្រក្រតីនៃការប្រកួតប្រជែងមិនស្មើភាពគ្នា និងការរត់ពន្ធរថយន្តសេរីទំនើបឆ្លងដែន ព្រោះបញ្ហានេះបានធ្វើឲ្យប៉ះពាល់ដល់ចំណូលថវិកាជាតិយ៉ាងច្រើនសន្ធឹកសន្ធាប់៕
No comments:
Post a Comment