៥-មីនា-២០១៤៖ កម្មវិធីប្រកួតប្រជែងថតរូបឆ្លុះបញ្ចាំងពីផលប៉ះពាល់អវិជ្ជមាននៃអំពើពុករលួយក្នុងសង្គម។
អង្គការ តម្លាភាពកម្ពុជា រៀបចំ ប្រឡងរូបថត ឆ្លុះបញ្ចាំង អំពើ ពុករលួយ
ដោយ វោហារ ជាតិ / អាស៊ីសេរី | ០៥ មីនា ២០១៤
អង្គការតម្លាភាពកម្ពុជា (Transparency International Cambodia) បានរៀបចំពិធីប្រកួតប្រជែងជ្រើសរើសរូបថតល្អឯក ដើម្បីឆ្លុះបញ្ចាំងអំពីផលប៉ះពាល់នៃអំពើពុករលួយនៅកម្ពុជា ដែលពិធីនេះនឹងប្រារព្ធនៅថ្ងៃទី២១ មីនា ឆ្នាំ២០១៤ នៅការិយាល័យនៃអង្គការតម្លាភាពនារាជធានីភ្នំពេញ។
មន្ត្រីអង្គការតម្លាភាពកម្ពុជា លោក ប៉ិច ពិសី នាយកកម្មវិធីនៃអង្គការនេះបញ្ជាក់នៅថ្ងៃទី៥ មីនា ថា បេក្ខជនគ្រប់រូបអាចចូលប្រឡងបានគ្រប់គ្នា ដោយគ្រាន់តែផ្ញើរូបថត១សន្លឹក ឬ ៣សន្លឹក ដែលឆ្លុះបញ្ចាំងអំពីផលប៉ះពាល់អវិជ្ជមានដល់សង្គម ទៅកាន់អង្គការតម្លាភាពតាមរយៈអ៊ីមែល ឬយកទៅផ្ទាល់ក៏បាន។
លោក ប៉ិច ពិសី បញ្ជាក់បន្ថែមអំពីគោលបំណងនៃការប្រកួតប្រជែង និងគុណភាពរូបភាពដែលត្រូវដាក់ប្រឡងថា មាន ៣ចំណុចទៀត គឺទី១ រូបភាពនេះឆ្លុះបញ្ចាំងអំពីប្រព័ន្ធអភិបាលកិច្ចល្អរបស់កម្ពុជា ទៅនឹងអំពើពុករលួយ ដើម្បីឲ្យអង្គការតម្លាភាពកម្ពុជា យកទៅដាក់ជាគម្រោងរបាយការណ៍ស្រាវជ្រាវមួយ ទាក់ទងនឹងប្រព័ន្ធសុចរិតភាពថ្នាក់ជាតិ។ ទី២ ដើម្បីលើកកម្ពស់ការចូលរួមរបស់ប្រជាពលរដ្ឋនៅក្នុងការលើកស្ទួយសុចរិតភាព និងការប្រយុទ្ធប្រឆាំងអំពើពុករលួយតាមរយៈការចូលរួមនៃការប្រកួតប្រជែងនេះ និងទី៣ គឺដើម្បីបង្ហាញខ្លឹមសារនៃអំពើពុករលួយតាមរយៈរូបភាព ពិសេសផលប៉ះពាល់នៃអំពើពុករលួយតាមរយៈរូបភាព។
លោកថា ជ័យលាភីទី១ នឹងទទួលបានម៉ាស៊ីនថតរូបឌីជីថលមួយគ្រឿង ហើយជ័យលាភីទី២ និងទី៣ នឹងទទួលបានវគ្គបណ្ដុះបណ្ដាលខ្លីអំពីជំនាញថតរូប ដែលបង្រៀនដោយក្រុមអ្នកថតរូបបរទេសឈ្មោះថា រួមខឡិកធីវ (RUOM Collective)៕
No comments:
Post a Comment