លោក កឹម សុខា បដិសេធ ការចោទថា មានចេតនា ផ្ដួលរំលំ រដ្ឋាភិបាល
RFA | 16 March 2014
អនុប្រធាន គណបក្ស សង្គ្រោះជាតិ លោក កឹម សុខា
ថ្លែងក្នុងមហាបាតុកម្ម នាទីលាន ប្រជាធិបតេយ្យ នៅព្រឹកថ្ងៃពុធ ទី២៤
ខែមេសា ឆ្នាំ២០១៣។ RFA/Den Ayuthea
អនុប្រធាន គណបក្ស សង្គ្រោះជាតិ បានច្រានចោល ការចោទប្រកាន់ របស់ ក្រសួងមហាផ្ទៃ ថា, លោក មានបំណង ផ្ដួលរំលំ រដ្ឋាភិបាល បច្ចុប្បន្ន។ លោក កឹម សុខា អះអាងថា, នេះ ពុំមែន ទើបតែ លើកទីមួយឡើយ ដែលគួរបដិបក្ខ របស់លោក តែងព្យាយាម ចាប់កំហុស ដើម្បី ផ្ដួលរំលំ លោកនោះ។
ការបដិសេធ របស់លោក កឹម សុខា នេះ ធ្វើឡើង ក្រោយពេល ដែលក្រសួងមហាផ្ទៃ បានចុះផ្សព្វផ្សាយ ខ្សែអាត់ ពីរ ដាច់ដោយឡែក ពីគ្នា នៅក្នុងសប្ដាហ៍នេះ ប្រឆាំងគណបក្ស សង្គ្រោះជាតិ, ហើយ នៅក្នុងខ្សែ អាត់នោះ, ក្រសួងមហាផ្ទៃ ចោទថា លោក កឹម សុខា មានបំណង ផ្ដួលរំលំ រដ្ឋាភិបាល ដែលដឹកនាំ ដោយលោកនាយករដ្ឋមន្ត្រី ហ៊ុន សែន។
លោក កឹម សុខា អនុប្រធានគណបក្សសង្គ្រោះជាតិ ឲ្យដឹងនៅថ្ងៃទី១៦ មីនា ថា លោកពុំមានការភ័យខ្លាច ឬតក់ស្លុតណាមួយឡើយ ចំពោះការចោទប្រកាន់ប្រឆាំងរូបលោករបស់ក្រសួងមហាផ្ទៃនេះ។ លោកចាត់ទុកថា នេះជាយុទ្ធសាស្ត្របែបប៉ែងជើងផ្ដួលដៃគូរបស់គណបក្សប្រជាជនកម្ពុជា ប៉ុណ្ណោះ។
លោក កឹម សុខា អះអាងថា អ្វីដែលលោកចេះធ្វើនោះ គឺអនុវត្តតាមបែបប្រជាធិបតេយ្យ និងជំរុញឲ្យមានគោលនយោបាយបែបអហិង្សា។
«សំឡេង»
វិទ្យុអាស៊ីសេរី មិនអាចទាក់ទងលោកនាយឧត្ដមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ ដើម្បីសុំការបំភ្លឺបានភ្លាមៗទេ នៅថ្ងៃទី១៦ មីនា នេះ។
ពាក់ព័ន្ធនឹងករណីនេះ កាលពីថ្ងៃសុក្រ ទី១៤ មីនា នេះ ក្រសួងមហាផ្ទៃ បានចេញផ្សាយនៅលើគេហទំព័ររបស់ខ្លួន ដែលរកឃើញថា លោក កឹម សុខា ព្យាយាមផ្ដួលរំលំរដ្ឋាភិបាលលោកនាយករដ្ឋមន្ត្រី ហ៊ុន សែន តាមរយៈសុន្ទរកថាពីរដាច់ដោយឡែកពីគ្នារបស់លោកនៅប្រទេស អូស្ត្រាលី កាលពីខែវិច្ឆិកា និងនៅសហរដ្ឋអាមេរិក កាលពីខែធ្នូ។
ក្រសួងមហាផ្ទៃ ចាត់ទុកថា ខ្លឹមសារមួយចំនួនដែលលោក កឹម សុខា បានបង្ហោះនោះ គឺមានចេតនាផ្ដួលរំលំរដ្ឋាភិបាលពិតៗ។
យ៉ាងណាក៏ដោយ លោក កឹម សុខា ដែលរងការចោទប្រកាន់នេះ បានបដិសេធ ហើយថា នេះជាវិធីលាបពណ៌របស់ក្រសួងមហាផ្ទៃ ប៉ុណ្ណោះ។ ជាងនេះទៀត លោកអះអាងថា អ្វីដែលលោកប្រាថ្នាចង់បាននោះ គឺចង់ឃើញប្រទេសកម្ពុជា ផ្លាស់ប្ដូរដោយថ្លៃថ្នូរ និងប្រកាន់គោលការណ៍អហិង្សាប៉ុណ្ណោះ។ ហើយកិច្ចការជាច្រើនក្នុងពេលកន្លងទៅ គឺជំរុញឲ្យអ្នកគ្រប់គ្រងរដ្ឋត្រូវប្រកាន់គោលការណ៍អហិង្សា និងអនុវត្តគោលនយោបាយប្រជាធិបតេយ្យ។
លោកបណ្ឌិត ឡៅ ម៉ុងហៃ ថ្លែងថា នេះមិនរាប់ថា ជាចេតនាផ្ដួលរំលំរដ្ឋាភិបាលឡើយ។លោកអះអាងថា ព្រោះអ្នកនយោបាយអាចមានសិទ្ធិនិយាយអ្វីដើម្បីចំណេញនយោបាយរបស់ ខ្លួន លើកលែងតែចំណុចផ្ទុយនឹងរដ្ឋធម្មនុញ្ញ។
«សំឡេង»
ពាក់ព័ន្ធនឹងបញ្ហានេះលោក កឹម សុខា អះអាងថា នេះពុំមែនទើបតែលើកទីមួយឡើយ សម្រាប់ជីវិតនយោបាយរបស់លោក ដែលត្រូវបានគេប៉ុនប៉ងដើម្បីបញ្ចប់ ក្រៅពីការចាប់ខ្លួន និងព្យាយាមប៉ុនប៉ងជាជីវិតរបស់លោក ម្ដងជាពីរដងមិនបានសម្រេច ក្នុងពេលកន្លងទៅ។មានព្រឹត្តិការណ៍ជាហូរហែ ទាំងមុន និងក្រោយលោកបង្កើតមជ្ឈមណ្ឌលសិទ្ធិមនុស្សកម្ពុជា ហើយនៅនាទីចុងក្រោយនេះទៀតសោត ព្រឹត្តិការណ៍ប្រហាក់ប្រហែលគ្នានេះ បានកើតឡើងសាជាថ្មីឡើងវិញ ដូចជាទីស្នាក់ការក្នុងខណ្ឌទួលគោក ត្រូវជនមិនស្គាល់មុខបាញ់ធ្លាយកញ្ចក់មុនការបោះឆ្នោតខែកក្កដា ត្រូវចាប់ផ្ដើម។ នៅថ្ងៃទី៩ មិថុនា មានមនុស្សរាប់រាយនាក់ធ្វើបាតុកម្មប្រឆាំងរូបលោក ដែលដឹកនាំដោយលោក ជុំ ម៉ី អតីតអ្នករស់ពីរបបខ្មែរក្រហម បានប្ដឹងលោកទៅតុលាការ ហើយរហូតធ្វើឲ្យសភាសម្រេចជាឯកតោភាគី បង្កើតច្បាប់មួយប្រឆាំងអ្នកនិយាយថា គ្មានរបបខ្មែរក្រហមថែមទៀត។ ក្រៅពីនេះ មានស្ត្រីមេម៉ាយបានចេញមុខជាសាធារណៈអះអាងថា ជាស្ត្រីកំណាន់របស់លោកដោយលួចលាក់ និងតាមអុកឡុកស្ទើរគ្រប់ពេលវេលាទៀតផង៕
No comments:
Post a Comment