អ្នកនាំពាក្យ ក្រសួងមហាផ្ទៃ៖ CNRP គួរឈប់ យកទីលានប្រជាធិបតេយ្យ ជាកន្លែង សម្តែងមតិ បើចាត់ទុក ជាកន្លែង ផ្ដាច់ការ
ដោយ៖ ឡាយ សាមាន / វីអូឌី | ថ្ងៃអាទិត្យ ទី30 ខែមិនា ឆ្នាំ2014
អ្នកនាំពាក្យក្រសួងមហាផ្ទៃ នៅថ្ងៃអាទិត្យនេះ ឲ្យដឹងថា ការថ្លែងរបស់មេដឹកនាំគណបក្សសង្គ្រោះជាតិ ដែលចាត់ទុកថា ទីលានប្រជាធិបតេយ្យ ជាទីលានផ្ដាច់ការកុម្មុយនីស្ត គឺជាការល្អ ហើយគណបក្សនេះគួរឈប់មកធ្វើសមាជ ឬជួបជុំសម្តែងមតិនៅទីនោះទៀត។
នៅរសៀលថ្ងៃអាទិត្យនេះ លោក សម រង្ស៊ី ប្រធានគណបក្សសង្គ្រោះជាតិ ឲ្យឈ្មោះទីលានប្រជាធិបតេយ្យថា ជាទីលានផ្ដាច់ការកុម្មុយនីស្ត ក្រោមការដឹកនាំរបស់គណបក្សកាន់អំណាចបច្ចុប្បន្ន។
ឆ្លើយតបទៅនឹងការថ្លែងរបស់គណបក្សសង្គ្រោះជាតិ អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ប្រសិនបើ លោក សម រង្ស៊ី ចាត់ទុកទីលានប្រជាធិបតេយ្យជាកន្លែងផ្តាច់ការនោះ លោកសង្ឃឹមថាថ្ងៃក្រោយគាត់ឈប់មក ឬសុំទីលានប្រជាធិបតេយ្យធ្វើជាកន្លែងបញ្ចេញមតិ ឬធ្វើសមាជទៀតទៅ។ លោកបន្តថា ក្រសួងមហាផ្ទៃដឹងពីផែនការរបស់គណបក្សសង្គ្រោះជាតិជាមុនថា គណបក្សនេះ មុនដំបូងសុំទីកន្លែងធ្វើសមាជមហាជនប៉ុណ្ណោះ ប៉ុន្តែយូរៗទៅនៅពេលមានអ្នកគាំទ្រចូលរួមច្រើន អាចលើសពីមួយលាននាក់ ឬអាចឈានទៅទម្លាក់រដ្ឋាភិបាលនោះ ក្រសួងមិនអាចទប់ស្កាត់បានឡើយ និងអាចបណ្តាលឲ្យមានភាពវឹកវរ ឬអស្ថេរភាពក្នុងសង្គមជាដើម។
លោក សម រង្ស៊ី ហៅទីលានប្រជាធិបតេយ្យជាកន្លែងផ្តាច់ការបែបនេះ បន្ទាប់ពី ក្រសួងមហាផ្ទៃ និងសាលារាជធានីភ្នំពេញ បានសម្រេចជាគោលការណ៍ មិនឲ្យគណបក្សនេះ ធ្វើបាតុកម្មនៅទីលានប្រជាធិបតេយ្យ អាស្រ័យដោយអាជ្ញាធរ មានសមត្ថកិច្ច កំពុងស៊ើបអង្កេតហេតុការណ៍ ដែលនាំឲ្យកើតមានអំពើហិង្សា និងការខាតបង់នានា ក្នុងព្រឹត្តិការណ៍កន្លងមក មិនទាន់បញ្ចប់ជាស្ថាពរ៕
No comments:
Post a Comment