បក្ស ប្រជាជន កម្ពុជា ចេញគោល នយោបាយ ៩ចំណុច
ដោយ វណ្ណ វិចារ / RFA | 14 April 2014
សមាជិក ក្រុមប្រឹក្សាសង្កាត់ បោះឆ្នោត ជ្រើសរើស ក្រុមប្រឹក្សា
រាជធានី ខេត្ត-ក្រុង
ស្រុក-ខណ្ឌ នៅស្ថានីយ បោះឆ្នោត មួយកន្លែង ក្នុងក្រុងភ្នំពេញ នាថ្ងៃ
ទី១៧ ឧសភា ២០០៩។ RFA/Ouk Savborey
គណបក្ស ប្រជាជន កម្ពុជា ចេញគោល នយោបាយ ៩ចំណុច ដើម្បី ឃោសនា ក្នុងឱកាស បោះឆ្នោត ជ្រើសតាំង ក្រុមប្រឹក្សា ស្រុក-ក្រុង, ខេត្ត-រាជធានី។ គោលនយោបាយ ត្រូវ បានផ្សព្វផ្សាយ ជាសាធារណៈ លើគេហទំព័រ គណបក្ស កាន់អំណាច ស្របពេល ដែលប្រជាជាតិខ្មែរ ប្រារព្ធពិធីបុណ្យ ចូលឆ្នាំថ្មី ប្រពៃណីជាតិ។
គណបក្ស ប្រជាជន កម្ពុជា បានកំណត់ យកឆ្នាំ២០១៨ ជាថេរវេលា ចុងក្រោយ ដើម្បី សម្រេច ឲ្យបាន នូវគោលនយោបាយ ទាំង៩ចំណុច របស់ខ្លួន។ គោលនយោបាយ ទាំងនោះ រួមមាន៖ ការពារសិន្តិសុខ, សណ្តាប់ធ្នាប់, និងសុវត្ថិភាព ពលរដ្ឋ; ការពារ លើកស្ទួយ សិទ្ធិសេរីភាព របស់ ប្រជាជន; ធានាកំណើន សេដ្ឋកិច្ច; អភិវឌ្ឍន៍ វិស័យកសិកម្ម; ការពារ សិទ្ធិដីធ្លី របស់ ពលរដ្ឋ; បន្ត អនុវត្តផ្លូវ, អគ្គីសនី, និងទឹកស្អាត; លើកស្ទួយកម្រិត ជីវភាព អ្នករាជការ; អភិវឌ្ឍន៍ វិស័យអប់រំ, សុខាភិបាល, សង្គមកិច្ច; ព្រមទាំង ពង្រឹងអភិបាលកិច្ច និងសមត្ថភាព ស្ថាប័នរដ្ឋ។
ដើម្បីសម្រេចគោលដៅនេះ គណបក្សប្រជាជនកម្ពុជា បានប្ដេជ្ញាចិត្តនឹងចាត់ការចំពោះទង្វើមួយចំនួនដែលជាឧបសគ្គរបស់ ខ្លួន។ ទង្វើទាំងនោះដូចជា សកម្មភាពនិងការញុះញង់ដែលបង្កអស្ថិរភាពនិងចលាចលសង្គម ការប្រើប្រាស់សិទ្ធិតាមបែបអានាធិបតេយ្យ ការរំលោភសិទ្ធិលើអ្នកដទៃ និងប្រឆាំងរាល់ការរើសអើងជាតិសាសន៍។ លើសពីនេះ គណបក្សក៏សន្យាថា នឹងដំឡើងប្រាក់ខែទាបបំផុតម្តងបន្តិចៗជូនបុគ្គលិករដ្ឋឲ្យបាន ចំនួន ១លានរៀលដល់ឆ្នាំ២០១៨ ហើយកម្មករនឹងត្រូវបានប្រាក់ខែគោល ១៦០ដុល្លារ នៅឆ្នាំ២០១៨ ដូចគ្នា។ ចុងបញ្ចប់នៃកម្មវិធីនយោបាយនេះ គណបក្សប្រជាជនកម្ពុជា បានស្នើឲ្យសមាជិកសមាជិកាក្រុមប្រឹក្សាឃុំសង្កាត់ទាំងអស់ បោះឆ្នោតគាំទ្រគណបក្សរបស់ខ្លួនកុំបីខាន។
ទន្ទឹមនឹងនេះដែរ មេដឹកនាំគណបក្សប្រឆាំង លោក សម រង្ស៉ី បានថ្លែងជាសាធារណៈកាលពីសប្ដាហ៍មុនដោយស្នើឲ្យសមាជិក ក្រុមប្រឹក្សាឃុំសង្កាត់របស់គណបក្សប្រជាជនកម្ពុជា ទាំងអស់ បោះឆ្នោតឲ្យគណបក្សសង្គ្រោះជាតិ ដើម្បីអភិវឌ្ឍន៍ជាតិដោយភាពស្អាតស្អំ។ យ៉ាងណាក៏ដោយ គណបក្សប្រឆាំងមិនទាន់បានចេញគោលនយោបាយសម្រាប់ប្រកួតប្រជែងក្នុងការ បោះឆ្នោតអសកលនេះនៅឡើយទេ។ ក៏ប៉ុន្តែគណបក្សនេះ បានទទួលការគាំទ្រពីសមាជិកក្រុមប្រឹក្សាឃុំសង្កាត់ចំនួនជាង ១០០នាក់មកពីគណបក្សជាតិនិយមរួចទៅហើយ។
មន្ត្រីជាន់ខ្ពស់នៃគណបក្សជាតិនិយម ក៏បានប្រកាសថា សមាជិកក្រុមប្រឹក្សាឃុំរបស់ខ្លួននឹងបោះឆ្នោតគាំទ្របក្សប្រឆាំង ដែរ។
ទាក់ទិននឹងបញ្ហានេះ នាយកប្រតិបត្តិរបស់គណៈកម្មាធិការអព្យាក្រឹតនិងយុត្តិធម៌ដើម្បីបោះ ឆ្នោតដោយសេរីនិងត្រឹមត្រូវនៅកម្ពុជា ហៅថា និកហ្វិច លោក ហង្ស ពុទ្ធា មានប្រសាសន៍ថា គណបក្សនីមួយៗមានយុទ្ធសាស្ត្រផ្សេងៗគ្នា ក្នុងការទាក់ទាញម្ចាស់ឆ្នោត។ យុទ្ធសាស្ត្រនោះមានដូចជាការឃោសនាដោយផ្ទាល់មាត់ និងការផ្សព្វផ្សាយគោលនយោបាយរបស់ខ្លួន។ លោកបន្តថា អ្នកមានសិទ្ធិបោះឆ្នោតក្នុងការបោះឆ្នោតអសកលនេះជាសមាជិករបស់ គណបក្សសកម្មរបស់គណបក្សនីមួយៗរួចហើយ ហើយលទ្ធផលនៃការបោះឆ្នោតនោះ ក៏មិនសូវខុសពីការគណនាជាមុននោះដែរ ប៉ុន្តែអ្វីៗក៏អាចមានការប្រែប្រួលបានដែរ។
លោក ហង្ស ពុទ្ធា៖ «ខ្ញុំយល់ថា អាចនឹងមានការប្រែប្រួល ដោយសារការវិវត្តន៍នយោបាយថ្មីនេះឯង ឃើញថាពលរដ្ឋខ្លះមិននិយាយមិនស្តី តែទម្លាក់សន្លឹកឆ្នោតតាមការសម្រេចចិត្តរបស់គាត់ អ៊ីចឹងតំណាងរបស់ពលរដ្ឋអាចថានឹងធ្វើការសម្រេចចិត្តដោយខ្លួនឯង។»
ការបោះឆ្នោតជ្រើសតាំងសមាជិកក្រុមប្រឹក្សា នឹងប្រព្រឹត្តិទៅនៅថ្ងៃទី១៨ ខែឧសភា ឆ្នាំ២០១៤។អ្នកដែលមានសិទ្ធិបោះឆ្នោត គឺជាសមាជិកក្រុមប្រឹក្សាឃុំសង្កាត់ដែលឋិតនៅក្នុងតំណែងមកពី គណបក្សសិទ្ធិមនុស្ស គណបក្ស សម រង្ស៉ី គណបក្សជាតិនិយម គណបក្សហ៊្វុនស៊ិនប៉ិច គណបក្សសម្ព័ន្ធដើម្បីលទ្ធិប្រជាធិបតេយ្យ និងគណបក្សប្រជាជនកម្ពុជា។ គណបក្សប្រជាជនកម្ពុជា បានបាត់សំឡេងឆ្នោត ២២អាសនៈក្នុងពេលបោះឆ្នោតជ្រើសតាំងតំណាងរាស្ត្រកាលពីឆ្នាំមុន៕
No comments:
Post a Comment