តុលាការ នឹងបើកសវនាការ រឿងលោក វន់ ពៅ សូម នៅក្រៅឃុំ ជាថ្មី នៅថ្ងៃ៤ មេសា
ដោយ វោហារ ជាតិ / RFA | 3 April 2014
ប្រធាន សមាគម ប្រជាធិបតេយ្យ ឯករាជ្យ នៃសេដ្ឋកិច្ច ក្រៅប្រព័ន្ធ
លោក វន់ ពៅ
ផ្ដល់បទសម្ភាសន៍ ក្នុងពេល លោកដឹកនាំការ តវ៉ា សូម ឲ្យទំនិញចុះថោក
កាលពីថ្ងៃទី២៩ ធ្នូ ឆ្នាំ២០១៣។ RFA/Sek Bandith
សវនាការ នៅសាលាដំបូង នៅថ្ងៃទី៤ ខែមេសា ជាសវនាការ លើកទី២ហើយ គឺ បន្ទាប់ពីមេធាវី ការពារក្ដី លោក វន់ ពៅ បានដាក់ពាក្យបណ្ដឹង សូម ឲ្យកូនក្ដី របស់លោក, គឺ លោក វន់ ពៅ សូម នៅក្រៅឃុំ បន្ទាប់ពីសាលា ដំបូង រាជធានីភ្នំពេញ និងសាលា ឧទ្ធរណ៍ បដិសេធបណ្ដឹង សូម នៅក្រៅឃុំនេះ បីលើករួចមកហើយ។
មេធាវីនៃសហភាពការងារកម្ពុជា លោក គីម សុជាតិ ដែលការពារក្ដី លោក វន់ ពៅ បញ្ជាក់នៅថ្ងៃទី៣ មេសា ថា ទោះបីជាសាលាដំបូង និងសាលាឧទ្ធរណ៍ បានបដិសេធបណ្ដឹងសុំនៅក្រៅឃុំនេះច្រើនដងមកហើយក៏ដោយ ក៏លោកនៅតែព្យាយាមឲ្យអស់លទ្ធភាព ដើម្បីឲ្យកូនក្ដីរបស់លោកបាននៅក្រៅឃុំមុនថ្ងៃជំនុំជម្រះក្ដី មកដល់ ព្រោះថា សុខភាពរបស់កូនក្ដីលោកមានសភាពធ្ងន់ធ្ងរណាស់៖ «ស្អែក នេះ គឺសវនាការនៅសាលាដំបូងពាក់ព័ន្ធការសុំនៅក្រៅឃុំរបស់ខ្ញុំ ដែលបានដាក់ជូនតុលាការកាលពីថ្ងៃទី២៦ មីនា ឆ្នាំ២០១៤ ហ្នឹង។ ព្រោះអីពាក់ព័ន្ធនឹងរឿងហ្នឹង យើងអនុវត្តនីតិវិធី គឺសំណុំរឿងរបស់ វន់ ពៅ ត្រូវបានបញ្ជូនទៅជំនុំជម្រះហើយ។ អ៊ីចឹង នីតិវិធីនៅមុនសវនាការហ្នឹង គឺជនជាប់ចោទមានសិទ្ធិសុំនៅក្រៅឃុំ។ អ៊ីចឹង តុលាការត្រូវបើកសវនាការមុនអង្គសេចក្ដី ពាក់ព័ន្ធនៅក្រៅឃុំហ្នឹង។»
សាលាឧទ្ធរណ៍បានបើកសវនាការបដិសេធពាក្យបណ្ដឹងឧទ្ធរណ៍របស់ លោក វន់ ពៅ ពីរលើករួចមកហើយ គឺកាលពីថ្ងៃទី១១ ខែកុម្ភៈ និងថ្ងៃទី២៤ ខែមីនា បន្ទាប់ពីសាលាដំបូងបានបើកសវនាការបដិសេធបណ្ដឹងសុំនៅក្រៅឃុំដូច គ្នានេះ កាលពីថ្ងៃទី៨ មករា ឆ្នាំ២០១៤ កន្លងទៅ។
ស្របពេលនេះដែរ អ្នកស្រី ប្រាក់ សុវណ្ណារី ភរិយារបស់ លោក វន់ ពៅ បានទៅសួរសុខទុក្ខប្ដីនៅគុកត្រពាំងផ្លុង ក្នុងខេត្តកំពង់ចាម នៅថ្ងៃទី៣ មេសា ហើយអះអាងថា សុខភាពប្ដីអ្នកស្រីនៅតែមានសភាពធ្ងន់ធ្ងរដដែល។ ទោះយ៉ាងណា អ្នកស្រីបានពោលថា អ្នកស្រីបានធូរទ្រូងបន្តិច ដោយសារអ្នកស្រីបានធ្វើពិធីខួបកំណើតដ៏កំសត់ជូនប្ដី ដែលចូលឆ្នាំថ្មីនេះមានអាយុ ៤០ឆ្នាំ នៅក្នុងគុកនៅថ្ងៃទី៣ មេសា នេះ៖ «ខ្ញុំបានទិញនំខួបកំណើតសម្រាប់ធ្វើពិធីខួបកំណើតឲ្យគាត់ នៅពន្ធនាគារ ចំពោះស្វាមីខ្ញុំ គាត់រំភើបនឹងភរិយាធ្វើឲ្យ តែគាត់មិនសូវសប្បាយចិត្ត ដោយសារតែយើងធ្វើខួបកំណើតម្ដងនេះនៅក្នុងពន្ធនាគារ ដូចជាវាក្រៀមក្រោះ និងឈឺចាប់ដែរ។»
លោក វន់ ពៅ រួមទាំងសកម្មជនសិទ្ធិមនុស្ស និងកម្មករ ២០នាក់ទៀត បានជាប់ឃុំជាង ២ខែហើយ ដោយជាប់ចោទពីបទពាក់ព័ន្ធអំពើហិង្សា និងបំផ្លាញទ្រព្យសម្បត្តិ នៅពេលពួកគេធ្វើបាតុកម្មជាមួយកម្មករ នៅថ្ងៃទី២ និងទី៣ មករា ឆ្នាំ២០១៤ នៅជាយរាជធានីភ្នំពេញ ទាមទារប្រាក់ខែគោលកម្មករ ១៦០ដុល្លារ មិនបានសម្រេច។
សាលាដំបូងនឹងបើកសវនាការលើអង្គសេចក្ដីជំនុំជម្រះទោស លោក វន់ ពៅ និងអ្នកទាំង ២០នាក់ទៀតនោះ នៅថ្ងៃទី១៨ មេសា ឆ្នាំ២០១៤ ខាងមុខនេះ៕
No comments:
Post a Comment