លោក ស មូរ៉ា ប្រធានសហព័ន្ធសហជីពកម្មករចំណីអាហារ (រូបថត៖ តាត ឧត្តម)
សហជីព១៤ ប្រកាស ធ្វើកូដកម្ម ថ្មីទៀត ឲ្យដោះលែង អ្នកជាប់ឃុំ និងទារប្រាក់ឈ្នួល ១៦០ដុល្លារ
ដោយ៖ ញឹម សុខន | ថ្ងៃពុធ ទី2 ខែមេសា ឆ្នាំ2014
សហព័ន្ធសហជីព១៤ នៅថ្ងៃពុធនេះ ប្រកាសផ្លូវការ ធ្វើកូដកម្មជាថ្មីទៀត ដើម្បីដាក់សម្ពាធ ឲ្យភាគីពាក់ព័ន្ធ ដំឡើងប្រាក់ឈ្នួលកម្មករ ដល់ ១៦០ដុល្លារ ក្នុងមួយខែ និងដោះលែង មនុស្ស ២១នាក់ ឲ្យមានសេរីភាពវិញ។
ប្រធានសហព័ន្ធសហជីពកម្មករចំណីអាហារ ស មូរ៉ា ឲ្យ VODដឹងថា ក្រុមការងារ បានដាក់លិខិតផ្លូវការហើយ នៅថ្ងៃទី២ខែមេសាឆ្នាំ២០១៤នេះ ទៅសមាគមរោងចក្រកាត់ដេរ ដើម្បីបង្ហាញពីបំណងនៃការធ្វើកូដកម្មចំនួន៧ថ្ងៃក្រោយថ្ងៃចូលឆ្នាំខ្មែរ។
កាលពីថ្ងៃទី៣ខែមករាឆ្នាំ២០១៤កម្មករច្រើនពាន់នាក់បានផ្ទុះបាតុកម្មម្តងហើយ ដើម្បីទាមទារប្រាក់ឈ្នួលដល់១៦០ដុល្លារនេះ ប៉ុន្តែពួកគេ៥នាក់ត្រូវសមត្ថកិច្ចបាញ់ឲ្យស្លាប់ និងប្រមាណជា៤០រងរបួស និង២៣នាក់ត្រូវបានចាប់ខ្លួន។
រហូតមកដល់ពេលនេះមនុស្ស២១នាក់កំពុងឃុំខ្លួនក្នុងពន្ធនាគារ ចំណែកអ្នកបាញ់កម្មករមិនទាន់ត្រូវបាន យកមកផ្តន្ទាទោសទេ ដោយរដ្ឋាភិបាលចោទថា ជាជនអាណាធិបតេយ្យ។
ប្រធានសហព័ន្ធសហជីពនៃឧស្សាហកម្មវាយនភណ្ឌកាត់ដេរនៅម្ពុជា លោក ស្រី ម៉ម ញឹម ដែល ប្រកាស ធ្វើកូដកម្មដែរនោះ អះអាងថា កូដកម្មពេលនេះ គឺកម្មករធ្វើពហិការមិនចូលធ្វើការដោយសម្រាកនៅផ្ទះវិញដើម្បីបញ្ចៀសការប៉ះទង្គិច «អ្វីដែលយើងចង់បាននេះមិនមែន មានន័យថាកម្មករទាមទារអ្វីដែលហួសហេតុពេកទេ ក្រពះរបស់គាត់ ចា ហើយរដ្ឋាភិបាលគួរតែគិត កុំយកលេស កុំដូចថារបៀបពោល ថាកម្មករ ធ្វើកូដកម្មទាមទារប្រាក់ឈ្នួរនិងគឺ អ្នកនយោបាយ ឬបង្កប់ដោយន័យ នយោបាយនៅក្នុងនិង អ្វីដែលគាត់គិតនិងគឺឥតត្រឹមត្រូវទេ គ្រាន់ជាលេសដោះសាររបស់គាត់»។
VODមិនអាចសុំបំភ្លឺពីប្រធានសមាគមរោងចក្រកាត់ដេរកម្ពុជា ពីលោក វ៉ាន់ ស៊ូអៀង បានទេ ដោយលោកមិនលើកទូរស័ព្ទ ខណៈអ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ លោក ហេង សួរ មិនអាចទាក់ទងបាន។
ប៉ុន្តែកន្លងទៅក្រសួងមហាផ្ទៃធ្លាប់ចេញរបាយការណ៍បង្ហាញថា ការធ្វើកូដកម្មនិងបាតុកម្ម របស់កម្មករ នៅដើមឆ្នាំ២០១៤ធ្វើឲ្យវិស័យកាត់ដេរខាតបង់ថវិកាច្រើនម៉ឺនដុល្លារ ដែលរដ្ឋាភិបាលចោទថា បាតុកម្មទាំងនោះផ្ទុះឡើងដោយសារមានសហជីព និងបក្សប្រឆាំងជាអ្នកញុះញង់។
ប៉ុន្តែសម្រាប់សង្គមស៊ីវិលវិញ មើលឃើញថា បាតុកម្មដែលផ្ទុះឡើងជាបន្តបន្ទាប់បណ្តាលមកពី មានការរំលោកសិទ្ធិកម្មករ និងរដ្ឋាភិបាលអសមត្ថភាព មិនអាចដំឡើងប្រាក់ឈ្នួលឲ្យកម្មករ រស់នៅសមរម្យបាន៕
No comments:
Post a Comment