មន្ត្រីរាជការឃុំ នៅស្រុកជុំគីរី តវ៉ា ចំពោះ ការបង្ខំ ឲ្យបង់ប្រាក់ ជួយ កាកបាទក្រហម
ដោយ អ៊ុក សាវបូរី / អាស៊ីសេរី | ២៩ មេសា ២០១៤
មន្ត្រីរាជការឃុំ នៅស្រុកជុំគីរី ខេត្តកំពត តវ៉ា ចំពោះការបង្ខំ ឲ្យបង់ប្រាក់ ជួយកាកបាទក្រហមកម្ពុជា ម្នាក់ ៤ម៉ឺនរៀល ស្មើ ១០ដុល្លារអាមេរិក។
ក្រុមប្រឹក្សា ស្រុកជុំគីរី លោក សិន ទុន ថ្លែងនៅព្រឹកថ្ងៃ២៩ ខែ មេសា ថា មន្ត្រី ក្រុមប្រឹក្សា ឃុំជាប់ឆ្នោត ក្នុងស្រុកនេះ មាន ៤១នាក់។ ក្នុងនោះ មានប្រធាន ក្រុមប្រឹក្សាឃុំ មួយចំនួន បានកំណត់ ឲ្យសមាជិក ក្នុងតំណែងក្រោមឱវាទ ត្រូវបង់ប្រាក់ ជួយកាកបាទក្រហម ឲ្យបាន ៤ម៉ឺន ស្មើនឹង ១០ដុល្លារ ក្នុងម្នាក់។
លោក សិន ទុន៖ "ក្នុងលិខិតរបស់អភិបាលខេត្តផ្ញើមកតាមបណ្ដាឃុំ គឺគាត់គ្រាន់តែអំពាវនាវតែបែរជាមេឃុំ គាត់កំណត់ឲ្យបង់ ៤ម៉ឺនក្នុងម្នាក់ ក្នុងនោះមានឃុំស្រែចែង ឃុំស្រែសំរោង ឃុំជំពូវ័ន្ត និងឃុំស្រែក្នុងដែលខ្ញុំទទួលព័ត៌មានបានច្បាស់។ អ៊ីចឹងទេសំណូមពរឲ្យលោកអភិបាលនៃគណៈអភិបាលស្រុកជុំគីរី មេត្តាពិនិត្យឡើងវិញនូវភាពមិនប្រក្រតីនៃការប្រមូលថវិការបស់កាកបាទក្រហមនេះ។
មេឃុំស្រែសំរោង និងមេឃុំជំពូវ័ន្ត បានអះអាងថា ការកំណត់ឲ្យបង់ប្រាក់ ៤ម៉ឺនរៀល ជួយឧបត្ថម្ភកាកបាទក្រហមកម្ពុជា ព្រោះមានមន្ត្រីខ្លះចង់បង់ប្រាក់តែ ២ពាន់រៀលក្នុងការជួយឧបត្ថម្ភប្រចាំឆ្នាំ។
បញ្ហានេះដែរ អភិបាលស្រុកជុំគីរី លោក ខៀវ រិទ្ធិភណ្ឌ បំភ្លឺថា អាជ្ញាធរស្រុកខេត្តមិនបានបង្ខំ ឬកំណត់ឲ្យមន្ត្រីរាជការក្នុងខេត្តនេះ បង់ប្រាក់ ៤ម៉ឺនរៀល ដូចការលើកឡើងនោះទេ។ លោកថា ទង្វើរបស់កាកបាទក្រហមគឺជួយសង្គ្រោះ។ ដូច្នេះថវិកាជួយសង្គ្រោះ គឺបានពីការបរិច្ចាគតាមសទ្ធារបស់សប្បុរសជន។ លោកបន្ថែមថា អាជ្ញាធរខេត្តគ្រាន់តែអំពាវនាវទេ មិនបង្ខំ ឬកំណត់ប្រាក់ ៤ម៉ឺនត្រូវជួយឧបត្ថម្ភកាកបាទក្រហមកម្ពុជាឡើយ។
ក្រុមប្រឹក្សាឃុំស្រែសំរោង ឃុំស្រែចែង ឃុំជំពូវ័ន្ត បានអះអាងថា ទោះជាមេឃុំបានកំណត់ឲ្យបង់ប្រាក់ ៤ម៉ឺនរៀលក៏ដោយ ពួកគាត់បានបង់ប្រាក់តាមសទ្ធា ខ្លះបង់ ៤ម៉ឺន ខ្លះ ២ម៉ឺន តែភាគច្រើនមិនក្រោម ២ម៉ឺនរៀលទេ៕
No comments:
Post a Comment