អាជ្ញាធរមូលដ្ឋាន នៅសៀមរាប រងការចោទ ថា លក់ដីព្រៃ របស់ រដ្ឋ
ដោយ ហង្ស សាវយុត / អាស៊ីសេរី | ០២ មេសា ២០១៤
មន្ត្រី សង្កាត់រដ្ឋបាលព្រៃឈើ នៅឃុំស្លែងស្ពាន ស្រុកស្រីស្នំ ខេត្តសៀមរាប កំពុងព្រួយបារម្ភចំពោះការឈូសឆាយ និងកាប់បំផ្លាញ ព្រៃការពារ របស់ រដ្ឋ កាន់តែច្រើនឡើងៗ ដោយមិនអាចទប់ស្កាត់បានទេ ពីមួយថ្ងៃ ទៅមួយថ្ងៃ។ ការបំផ្លាញ ព្រៃការពារ នោះ គឺនៅស្របពេលដែលដំឡូង មីកាន់តែមានទីផ្សារ ហើយក្រុមអ្នកភូមិ និងពួកឈ្មួញខ្លះ ត្រូវការពង្រីកយកដីដាំដុះដំឡូងមី។
ប្រជាពលរដ្ឋមួយចំនួនរស់នៅឃុំស្លែងស្ពាន បានចោទប្រកាន់ថា បច្ចុប្បន្នអាជ្ញាធរភូមិ ព្រមទាំងមន្ត្រីឃុំខ្លះមានជាប់ពាក់ព័ន្ធក្នុងរឿងឃុបឃិតគ្នាលក់ដីព្រៃការពាររបស់រដ្ឋមួយកន្លែងឈ្មោះ មណ្ឌលដូនសុខ ទៅឱ្យអ្នកចំណូលថ្មី និងក្រុមឈ្មួញកាន់កាប់ខុសច្បាប់។
បុរសដដែលបានបញ្ជាក់ថា ការឈូសឆាយ និងកាប់រានព្រៃកាន់កាប់ដីខុសច្បាប់នោះ គឺមានជាប់ពាក់ព័ន្ធនឹងអាជ្ញាធរឃុំស្លែងស្ពាន ព្រមទាំងមេភូមិខ្លះដែលបានលក់ដូរទៅឱ្យឯកជន។ អ្នកភូមិមួយចំនួនមិនពេញចិត្តចំពោះការលក់ដូរដីព្រៃរបស់រដ្ឋនោះទេ ហើយគេបានព្យាយាមតវ៉ាតាមរយៈការសរសេរសំបុត្រ ដាក់ក្នុងប្រអប់គណនេយ្យភាពនៅសាលាឃុំ ក៏ប៉ុន្តែការតវ៉ាមិនមានប្រសិទ្ធភាព៖ «ឃុំគេលក់ឱ្យឈ្មួញ។ ប្រជាពលរដ្ឋតវ៉ាថាកុំឱ្យលក់ដីនោះ ពីព្រោះដីត្រូវសហគមន៍។ ខ្ញុំធ្វើពាក្យបណ្ដឹងដាក់តាមប្រអប់ខ្លះដែរ ប៉ុន្តែគេអត់ទទួលស្គាល់ បាត់ឈឹងអស់ទៅ»។
អ្នកភូមិកណ្ដាល ម្នាក់ទៀតឈ្មោះ ឆវ័ន បានអះអាងប្រហាក់ប្រហែលគ្នាថា ដីព្រៃការពាររបស់រដ្ឋជាច្រើនហិកតារនៅជិតភូមិកណ្ដាល ភូមិលាភ និងភូមិសាលា ក្រោមការគ្រប់គ្រងរបស់មណ្ឌល ដូន សុខ កំពុងត្រូវបានគេលក់ដូរខុសច្បាប់ជាបន្តបន្ទាប់៖ «មេឃុំនោះស៊ីញេលក់យកថ្លៃក្នុង ១ហិកតារ ២០ដុល្លារ ឬមួយ ៥០ដុល្លារ តាមអ្នកស្រុកគេព្រមព្រៀងឱ្យ ក៏ប៉ុន្តែស៊ីញេលក់ដីព្រៃទាំងអស់។ រាល់ថ្ងៃលក់ឱ្យឈ្មួញកណ្ដាល ១ហិកតារថ្លៃ ៣០០ ឬក៏ ៤០០ដុល្លារ ដីព្រៃ។ ឃុបឃិតគ្នាលក់»។
ដីព្រៃការពាររបស់រដ្ឋក្រោមការគ្រប់គ្រងរបស់មណ្ឌល ដូន សុខ នោះ គឺមានទំហំប្រមាណជាង ១០០ហិកតារ។ ក៏ប៉ុន្តែអ្នកភូមិបានអះអាងថា ពេលបច្ចុប្បន្ននេះ គឺមានការលក់ដូរខុសច្បាប់ទៅឱ្យឯកជន និងក្រុមឈ្មួញអស់ប្រហែលជិតពាក់កណ្ដាលនៃផ្ទៃដីសរុបទៅហើយ។
សង្កាត់រដ្ឋបាលព្រៃឈើនៅក្នុងស្រុកស្រីស្នំ បានសំដែងការព្រួយបារម្ភចំពោះការកាប់រានតំបន់ព្រៃការពារជាបន្តបន្ទាប់នោះ។
មន្ត្រីសង្កាត់រដ្ឋបាលព្រៃឈើប្រចាំនៅភូមិលាភ លោក យិន យ៉ា បានមានប្រសាសន៍ថា បច្ចុប្បន្នមានជនចំណូលថ្មីខ្លះ និងក្រុមឈ្មួញខ្លះ បានយកគ្រឿងចក្រ និងជួលមនុស្សឱ្យទៅឈូសឆាយ និងកាប់ឆ្ការព្រៃការពាររបស់រដ្ឋ។ លោក យិន យ៉ា បានបញ្ជាក់ថា ការឈូសឆាយ និងកាប់ឆ្ការព្រៃនោះ គឺដើម្បីយកដីដាំដំឡូងមី នៅពេលដែលដំណាំនោះកំពុងមានទីផ្សារត្រូវប៉ាន់។
មន្ត្រីសង្កាត់រដ្ឋបាលព្រៃឈើដដែលបានអះអាងថា អ្នកដែលចូលទៅឈូសឆាយ និងកាប់ឆ្ការព្រៃ បានប្រាប់ថា គេបានទិញដីនោះ ក៏ប៉ុន្តែទោះយ៉ាងណា លោកមិនទាន់ប្រាកដថា អ្នកណា គឺជាអ្នកលក់ទេ ពីព្រោះលោកមិនទាន់រកឃើញភស្តុតាង និងឯកសារទិញលក់ឱ្យច្បាស់លាស់៖ «អាដីខាងលិចភូមិលាភ ហ្នឹង គេលក់ប្រហែលជា ២០-៣០ហិកតារ។ ខ្ញុំចុះទៅពិនិត្យមើល ថែមទាំងដេញពួកត្រាក់ទ័រពួកអីដែលគេមកធ្វើ ធ្លាប់ទាំងចាប់យកកាំបិត ចាប់ពូថៅ។ ដឹងថាគេលក់ ប៉ុន្តែយើងអត់រកបានលិខិតស្នាមលក់នោះ។ មានប្រជាជនគាត់កាប់ឆ្ការម្ដងបន្តិចៗ យើងការពារដែរ ជួនកាលយើងដេញតែពេលថ្ងៃ គាត់ធ្វើយប់។ ពេលខ្លះអាជ្ញាធរឃុំ ភូមិ គាត់លក់ ប៉ុន្តែគ្រាន់ថាយើងចាប់ភស្តុតាងអត់បាន គេអត់ឱ្យឯកសារយើងមើល»។
ក៏ប៉ុន្តែ មន្ត្រីក្រុមប្រឹក្សាឃុំស្លែងស្ពាន បានបដិសេធយ៉ាងដាច់អហង្ការចំពោះការចោទប្រកាន់ដែលថា អាជ្ញាធរភូមិឃុំមានជាប់ពាក់ព័ន្ធនឹងការលក់ដីព្រៃទីនោះ។
មេឃុំស្លែងស្ពាន លោក ចៀម ចក បានមានប្រសាសន៍ថា លោកពុំដែលដឹងថា ដីព្រៃមួយចំនួននៅម្ដុំភូមិលាភ នោះមានជាប់ពាក់ព័ន្ធនឹងតំបន់ការពារទេ ហើយលោកក៏មិនដែលពាក់ព័ន្ធនឹងការលក់ដូរដីព្រៃទាំងនោះដែរ មានតែប្រជាពលរដ្ឋខ្លះដែលចូលទៅកាប់រានព្រៃដើម្បីយកដី។ លោកមេឃុំបានពន្យល់ថា ការចោទប្រកាន់រូបលោក ព្រមទាំងស្មៀនឃុំផង ថាពាក់ព័ន្ធក្នុងរឿងលក់ដូរដីព្រៃ គឺមិនពិតទេ វាគ្រាន់តែជាការមួលបង្កាច់ ដោយសារទំនាស់អ្វីមួយប៉ុណ្ណោះ៖ «បើខ្ញុំលក់អ៊ីចុះ ខ្ញុំមានបាត់ទៅហើយ មិនបាច់ខ្ញុំក្រដូច្នេះទេ។ ខ្ញុំអត់ដែលបានចុះហត្ថលេខា ឬមួយនេះទេ។ ពួកមេព្រៃនោះបានទាស់ទែងជាមួយខ្ញុំ ព្រោះអីមេព្រៃដើរដកកាំបិតដកអីប្រជាជនទៅ ដូចថ្ងៃទី២៤ ខែមករា នោះ គេដក ១៣កាំបិត។ ដល់ខ្ញុំទៅដោះស្រាយ គេអត់ដោះស្រាយឱ្យ បានឈ្លោះគ្នាជាមួយខ្ញុំទៅដល់នេះ មានបំណងចង់រករឿងខ្ញុំ។ ចេះតែបង្ខូចខ្ញុំ តាមការពិត ខ្ញុំអត់បានដឹងទេ អារឿងដីអីណាណីនៅខាងកើតភូមិលាភ អី ខ្ញុំអត់បានដឹងទេ»។
ទោះយ៉ាងណា មន្ត្រីក្រុមប្រឹក្សាឃុំស្លែងស្ពាន ខ្លះនៅតែអះអាងថា អាជ្ញាធរឃុំ និងស្មៀនឃុំ ពិតជាមានជាប់ពាក់ព័ន្ធនឹងការឃុបឃិតស៊ីញេ និងបោះត្រាលើឯកសារលក់ដីព្រៃរបស់រដ្ឋនោះមួយចំនួន។
ជំទប់ទី២ ឃុំស្លែងស្ពាន លោក អំ ប៉ែល បានមានប្រសាសន៍ថា ដីព្រៃរបស់រដ្ឋជាច្រើនកន្លែង ត្រូវក្រុមអ្នកភូមិដើរចាប់យកទៅលក់ដូរ ហើយនៅក្នុងចំណោមនោះ គេតែងឃើញស្មៀនឃុំស្លែងស្ពាន ក៏សម្បូរដីលក់ដែរ។
មន្ត្រីសង្កាត់រដ្ឋបាលព្រៃឈើស្រុកស្រីស្នំ បានបញ្ជាក់ថា ពេលបច្ចុប្បន្ន ដោយសារសន្ទុះនៃដំឡូងមីឡើងថ្លៃលើទីផ្សារ បណ្ដាលឱ្យមានការសម្រុកទៅកាប់រានព្រៃទីនោះ ដើម្បីយកដីកាន់កាប់ដោយខុសច្បាប់ ហើយមន្ត្រីរដ្ឋបាលព្រៃឈើមានកម្លាំងមិនគ្រប់គ្រាន់ក្នុងការចុះទប់ស្កាត់ឱ្យបានជាប្រចាំថ្ងៃទេ៕
No comments:
Post a Comment