ការធ្វើបាតុកម្មរបស់គណបក្សសង្គ្រោះជាតិ នៅទីលានប្រជាធិបតេយ្យ នាពេលកន្លងមក (រូបថត៖ តាត ឧត្តម)
គណបក្ស ប្រឆាំង បន្តទាមទារ ទីលានប្រជាធិបតេយ្យ ធ្វើជាកន្លែង ឃោសនាបោះឆ្នោត
ដោយ៖ ប្រែង សត្យាភិរក្ស / វីអូឌី | ថ្ងៃអង្គារ ទី29 ខែមេសា ឆ្នាំ2014
គណបក្ស សង្គ្រោះជាតិ នៅថ្ងៃអង្គារនេះ ប្រកាសយក ទីលានប្រជាធិបតេយ្យ រៀបចំយុទ្ធនាការ ឃោសនាបោះឆ្នោត ជ្រើសរើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ នៅថ្ងៃទី០២ ខែឧសភា។
សេចក្តីជូនដំណឹងរបស់គណបក្ស ឲ្យដឹងថា គណបក្ស នឹងរៀបចំយុទ្ធនាការឃោសនាបោះ ឆ្នោតជ្រើសរើស ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ នៅថ្ងៃសុក្រ ទី០២ ខែឧសភា ឆ្នាំ២០១៤ វេលាម៉ោង ២:០០ រសៀល នៅទីលានប្រជាធិបតេយ្យ រាជធានីភ្នំពេញ។យុទ្ធនាការឃោសនាបោះឆ្នោតនេះ នឹងដឹកនាំដោយលោក សម រង្ស៊ី និង អនុប្រធាន លោក កឹម សុខា។
គណបក្សបន្តថា សេចក្ដីជូនដំណឹងនេះ ចាត់ទុកជាការអញ្ជើញបងប្អូនជនរួមជាតិ ពិសេសយុវជន យុវតី ចូលរួមក្នុងយុទ្ធនាការឃោសនានេះ ឲ្យបានច្រើនកុះករ និងជាការអញ្ជើញអ្នកសារព័ត៌មានជាតិ-អន្តរជាតិ ដើម្បីយកព័ត៌មានតាមការគួរ។
កន្លងទៅ គណបក្សសង្គ្រោះជាតិ ធ្លាប់ស្នើសាលារាជធានីភ្នំពេញ សុំទីលានប្រជាធិបតេយ្យ ឬសួនការ៉ូឡាខាងកើត ចំហៀងខាងត្បូងវត្តបុទុមវត្តី ដើម្បីជួបជុំធ្វើការឃោសនាបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខណ្ឌនៃរាជធានីភ្នំពេញ។តែអាជ្ញាធរពាក់ព័ន្ធ បានបដិសេធនឹងការស្នើសុំនេះ។
ការបោះឆ្នោតជ្រើសតាំងសមាជិកក្រុមប្រឹក្សារាជធានី-ខេត្ត-ក្រុង-ស្រុក-ខណ្ឌ នឹងប្រព្រឹត្តទៅនៅថ្ងៃទី១៨ ខែឧសភា ឆ្នាំ២០១៤ ដោយមានគណបក្សចំនួន៥ចូលរួម ក្នុងនោះរួមមាន គណបក្សប្រជាជនកម្ពុជា គណសង្គ្រោះជាតិ គណបក្សហ្វ៊ុនស៊ិនប៉ិច គណបក្សសម្ព័ន្ធដើម្បីលទ្ធិប្រជាធិបតេយ្យ និងសាធារណរដ្ឋប្រជាធិបតេយ្យ៕
No comments:
Post a Comment