ពិធីចុះហត្ថលេខាទទួលប្រាក់ជំនួយនិងប្រាក់កម្ចីពីប្រទេសជប៉ុន នៅឯក្រសួងការបរទេសកម្ពុជា នាថ្ងៃ១៣ សីហា ២០០៩។ RFA/Sok Serey
រដ្ឋាភិបាល កម្ពុជា អះអាង ថា មានលទ្ធភាព សងបំណុល បរទេស ទាំងប្រាក់ដើម និងការប្រាក់
ដោយ អាន ស៊ីថាវ / អាស៊ីសេរី | ០៣ មេសា ២០១៤
រដ្ឋាភិបាលបានអះអាងថា បំណុលបរទេសបច្ចុប្បន្នបានយកមកប្រើប្រាស់ជំរុញមូលដ្ឋានផលិតកម្ម ដើម្បីលើកកម្ពស់ការនាំចេញ។ ម៉្យាងវិញទៀត រដ្ឋាភិបាលមានលទ្ធភាពសងទាំងប្រាក់ដើម និងការប្រាក់នៃបំណុលទាំងនោះ ដោយសារតែកម្ពុជា ធានាបានកំណើនសេដ្ឋកិច្ចខ្ពស់រៀងរាល់ឆ្នាំ។ ប៉ុន្តែសហគមន៍អន្តរជាតិ និងស្ថាប័នដែលវាយតម្លៃពីលទ្ធភាពផ្ដល់ជំនួយដល់រដ្ឋាភិបាលកម្ពុជា បានព្រួយបារម្ភចំពោះការកើនឡើងនៃប្រាក់កម្ចីបរទេស។
បំណុលរបស់រដ្ឋាភិបាលបានមកពីប្រភពសំខាន់ពីរសំខាន់ គឺកម្ចីក្នុងស្រុក ដែលខ្ចីពីប្រជាពលរដ្ឋរបស់ខ្លួន តាមរយៈការលក់ប័ណ្ណរតនាគាររបស់រដ្ឋាភិបាល និងប្រភពសំខាន់ទីពីរ គឺការខ្ចីលុយពីសហគមន៍អន្តរជាតិ ក្នុងនោះប្រទេសដែលផ្ដល់ប្រាក់កម្ចីច្រើនជាងគេ គឺប្រទេសចិន។ បំណុលបរទេស គឺយកមកបំពេញឱនភាពថវិកាជាតិ និងកសាងមូលដ្ឋានសេដ្ឋកិច្ច ជាពិសេសពង្រឹងមូលដ្ឋានផលិតកម្មក្នុងការនាំចេញ។
របាយការណ៍របស់ធនាគារអភិវឌ្ឍន៍អាស៊ី (ADB) ប្រចាំឆ្នាំ២០១៤ បានរកឃើញថា ការនាំចេញ និងវិស័យទេសចរណ៍របស់កម្ពុជា មានភាពរឹងមាំខ្លាំងជាងមុន ដែលបានចូលរួមតិចតួចពីប្រាក់កម្ចីបរទេស។ ភាពរឹងមាំនោះ ដោយសារការវិនិយោគខ្លាំងពីផលិតកម្មក្នុងស្រុក។
ការកើនឡើងប្រាក់កម្ចីបរទេសនេះ មិនបានជំរុញឲ្យប្រទេសកម្ពុជា ក្លាយជាប្រទេសផលិតខ្លាំងក្លាឡើយ។ បច្ចុប្បន្ន ប្រទេសកម្ពុជា មានឱនភាពជញ្ជីងពាណិជ្ជកម្ម មានន័យថា ការនាំចូលទំនិញច្រើនជាងការនាំចេញទៅវិញ។ តួលេខជញ្ជីងទូទាត់ពាណិជ្ជកម្មរបស់កម្ពុជា បច្ចុប្បន្ន មានអត្រា ៥% នៃផលិតផលដុលសរុបរបស់កម្ពុជា (GDP)។
ទោះជាយ៉ាងណាក៏ដោយ អ្នកសេដ្ឋកិច្ចបានពន្យល់ថា បំណុលបរទេសមិនមែនជារឿងអាក្រក់នោះទេ ព្រោះបំណុលបរទេសដើម្បីយកមកអភិវឌ្ឍប្រទេស ជាពិសេសជំរុញមូលដ្ឋានផលិតកម្មនាំចេញ ដើម្បីជំនួសការនាំចូលទំនិញពីបរទេស។ ប៉ុន្តែ បើយោងតាមរបាយការណ៍របស់ស្ថាប័នអភិវឌ្ឍន៍មួយចំនួនបានបង្ហាញថា ប្រទេសកម្ពុជា មានមូលដ្ឋានផលិតកម្មនៅអន់ខ្សោយនៅឡើយ មានន័យថា ប្រទេសកម្ពុជា បានចំណាយលុយរាប់ពាន់លានដុល្លារអាមេរិកក្នុងមួយឆ្នាំ ដើម្បីទិញទំនិញពីបរទេសមកប្រើប្រាស់នៅក្នុងប្រទេសកម្ពុជា។
ម៉្យាងវិញទៀត គោលនយោបាយលើកទឹកចិត្តដល់វិនិយោគក្នុងស្រុក ក៏នៅមានកម្រិតទាប ដូចជា វិស័យកែច្នៃកសិផលដែលប្រទេសកម្ពុជា មានស្រាប់។
របាយការណ៍របស់ធនាគារអភិវឌ្ឍន៍អាស៊ី ប្រចាំកម្ពុជា ប្រចាំឆ្នាំ២០១៤ បានរកឃើញថា បំណុលរបស់រដ្ឋាភិបាលកម្ពុជា គិតត្រឹមចុងឆ្នាំ២០១៣ នេះមានទំហំ ស្មើនឹង ៣២% នៃទំហំសេដ្ឋកិច្ចកម្ពុជា ភាគច្រើនបានខ្ចីពីសហគមន៍អន្តរជាតិ។ បំណុលក្នុងស្រុកវិញមានទំហំតិចជាង ១% នៃសេដ្ឋកិច្ចកម្ពុជា។
តំណាងគណបក្សប្រឆាំងធ្លាប់ស្នើឲ្យរដ្ឋាភិបាលកាត់បន្ថយលើការខ្ចីលុយពីបរទេស។ ប៉ុន្តែលោកនាយករដ្ឋមន្ត្រី ហ៊ុន សែន បានអះអាងថា ប្រទេសកម្ពុជា ស្ថិតនៅលំដាប់លេខមធ្យមក្នុងចំណោមប្រទេសដែលជំពាក់បំណុលច្រើនជាងគេនៅលើពិភពលោក។ បំណុលបរទេសនេះ តែងតែទទួលបានការរិះគន់ពីមជ្ឈដ្ឋាននានាថាមានកម្ពុជា មានបំណុលច្រើន ប៉ុន្តែ លោក ហ៊ុន សែន បញ្ជាក់ថា ប្រទេសកម្ពុជា អាចខ្ចីលុយពីសហគមន៍អន្តរជាតិបន្ថែមទៀត៖ «សម្រាប់ ១០០ប្រទេស ប្រទេសយើងស្ថិតនៅលំដាប់លេខ៧២។ លទ្ធភាពបារ៉ែនរបស់វា គឺនៅក្រោមកម្រិត ៤០% នៃផលទុនជាតិ»។
លោក ហ៊ុន សែន បន្ថែមថា សិង្ហបុរី ជាប្រទេសដែលជំពាក់បំណុលច្រើនជាងគេលំដាប់លេខមួយនៅតំបន់អាស៊ី និងប្រ៊ុយណេ វិញជាប្រទេសដែលមិនខ្ចីបុលគេសោះនៅលើពិភពលោក។
នាយកការិយាល័យធនាគារអភិវឌ្ឍន៍អាស៊ី ប្រចាំកម្ពុជា លោក អៀរិក ស៊ីដវិច (Eric Sidgwick) មានប្រសាសន៍ថា ទាក់ទងនឹងបំណុលបរទេសដែលកម្ពុជា កំពុងជំពាក់គេ គឺពាក់ព័ន្ធនឹងកត្តាសំខាន់ពីរ គឺកម្រិតនៃបំណុលដែលមានតម្លៃ ៤ពាន់ ៨០០លានដុល្លារអាមេរិកនាពេលបច្ចុប្បន្ន ដែលនេះជារឿងមួយ។ ហើយរឿងទីពីរនោះ គឺអត្រាបំណុលបរទេស បើធៀបទៅនឹងទំហំសេដ្ឋកិច្ចកម្ពុជា ដែលមានអត្រាជាង ៣២% នៃសេដ្ឋកិច្ចកម្ពុជា ប៉ុន្តែអត្រានេះនៅមានកម្រិតទាបជាងគេនៅតំបន់។ ការសងបំណុល និងអត្រាការប្រាក់ដែលកម្ពុជា បានខ្ចីពីបរទេសនោះ គឺសងទៅតាមតារាងដែលបានព្រមព្រៀងគ្នារវាងអ្នកខ្ចី និងប្រទេសជាម្ចាស់បំណុល។ ប៉ុន្តែបំណុលបរទេសដែលកម្ពុជា ជំពាក់គេ គឺបំណុលដែលមានអត្រាការប្រាក់អនុគ្រោះ៖ «ដូច្នេះ បំណុលរបស់ប្រទេសកម្ពុជា គឺបំណុលសម្បទាន មានន័យថា ជាបំណុលដែលមានអត្រាការប្រាក់ទាប និងការសងត្រឡប់ទៅវិញ មានរយៈពេលវែង។ ទស្សនៈវិស័យចំពោះការគ្រប់គ្រងបំណុលរបស់កម្ពុជា គឺអាចគ្រប់គ្រងបាន»។
អ្នកសេដ្ឋកិច្ចបានពន្យល់ថា កម្ចីបរទេស គឺមានសារសំខាន់ដើម្បីអភិវឌ្ឍវិស័យហេដ្ឋារចនាសម្ព័ន្ធ និងការកសាងមូលដ្ឋានសេដ្ឋកិច្ចរបស់ខ្លួន ប៉ុន្តែការព្រួយបារម្ភនោះ គឺការខ្ចីបុលពីប្រទេសណាដែលយកអត្រាការប្រាក់ខ្ពស់ ក្នុងនោះរួមមានប្រទេសចិន ជាដើម។
របាយការណ៍ពីក្រសួងសេដ្ឋកិច្ចកម្ពុជា បានបង្ហាញថា ប្រទេសចិន បានយកការប្រាក់ប្រមាណ ២% ក្នុងមួយឆ្នាំ ដែលជាអត្រាការប្រាក់ខ្ពស់ជាងគេ បើធៀបនឹងម្ចាស់បំណុលនានា។ ធនាគារអភិវឌ្ឍន៍អាស៊ី បានយកការប្រាក់ជាមធ្យម ១,២៣% ក្នុងមួយឆ្នាំ ប្រទេសកូរ៉េខាងត្បូង ប្រទេសជប៉ុន និងសហភាពអឺរ៉ុប បានយកការប្រាក់តិចជាង ០,៥% ក្នុងមួយឆ្នាំ។
របាយការណ៍របស់មូលនិធិរូបិយវត្ថុអន្តរជាតិ (IMF) ដែលចេញផ្សាយនៅខែកុម្ភៈ ឆ្នាំ២០១៤ បានបង្ហាញថា ការវាយតម្លៃចំពោះស្ថានភាពបំណុលបរទេសរបស់កម្ពុជា គឺអាចគ្រប់គ្រងបាន។ ប៉ុន្តែស្ថាប័ននេះបានគូសបញ្ជាក់ថា បន្ទុកបំណុលបរទេសដែលប្រទេសកម្ពុជា បានជំពាក់កន្លងមកនោះ ដែលភាគច្រើនមិនបានយកមកអភិវឌ្ឍនោះទេ គឺបំណុលរបស់ប្រទេសសូវៀត និងសហរដ្ឋអាមេរិក។ ក្រៅពីនេះ រដ្ឋាភិបាលក៏ត្រូវយកចិត្តទុកដាក់ការពារហានិភ័យនានាលើបន្ទុកបំណុលរបស់វិស័យឯកជន ជាពិសេសវិស័យធនាគារ។
បច្ចុប្បន្ន បន្ទុកបំណុលរបស់វិស័យធនាគារកម្ពុជា មានអត្រាកើនឡើងរហូតដល់ ៤០% នៃទំហំសេដ្ឋកិច្ច ក្នុងនោះរួមមានកម្ចីអន្តរជាតិ និងកម្ចីក្នុងស្រុក តាមរយៈការដាក់សន្សំរបស់ប្រជាពលរដ្ឋកម្ពុជា។
ពង្រាងច្បាប់ថវិកាជាតិប្រចាំឆ្នាំ២០១៤ ត្រូវការថវិកាចំនួន ៣.៤០០លានដុល្លារអាមេរិក ក្នុងនោះប្រាក់កម្ចីថ្មីនឹងមានចំនួនជាង ៩០០លានដុល្លារ។ តួលេខនេះ ប្រាក់បំណុលបរទេសដែលកម្ពុជា កំពុងជំពាក់មានបរិមាណ ៥.៧០០លានដុល្លារអាមេរិក នៅឆ្នាំ២០១៤ ឬសមាមាត្រនឹងប្រជាពលរដ្ឋកម្ពុជា ម្នាក់ជំពាក់បំណុលគេចំនួន ៤០០ដុល្លារអាមេរិក៕
No comments:
Post a Comment