២៩-កញ្ញា-២០១១៖ នាយកដ្ឋានអន្តោប្រវេសន៍ នៅមុខអាកាសយានដ្ឋានអន្តរជាតិភ្នំពេញ។
រដ្ឋាភិបាល ប្រកាសបង្កើត អគ្គនាយកដ្ឋាន អន្តោប្រវេសន៍ ថ្មី ចំណុះ ក្រសួងមហាផ្ទៃ
ដោយ កែវ និមល / អាស៊ីសេរី | ០២ មេសា ២០១៤
រដ្ឋាភិបាលបានប្រកាសបង្កើតអគ្គនាយកដ្ឋានអន្តោប្រវេសន៍ថ្មី ចំណុះក្រសួងមហាផ្ទៃ ផ្ទាល់ ដោយផ្ទេរចេញពីអគ្គស្នងការដ្ឋាននគរបាលជាតិ។ មន្ត្រីរដ្ឋាភិបាលចាត់ទុកថា នេះជាជំហានថ្មីមួយ ប៉ុន្តែមន្ត្រីអង្គការមិនមែនរដ្ឋាភិបាលនិយាយថា ចាំមើលគោលការណ៍ស្ដីពីតួនាទី និងភារកិច្ចរបស់អង្គភាពនោះសិន ទើបបានដឹងថា តើការបង្កើតនោះវាមានប្រសិទ្ធភាពការងារឬអត់?
ប្រមុខរដ្ឋាភិបាលបានចុះហត្ថលេខាលើអនុក្រឹត្យមួយកាលពីថ្ងៃទី១ មេសា បង្កើតអគ្គនាយកដ្ឋានអន្តោប្រវេសន៍ចំណុះក្រសួងមហាផ្ទៃ ផ្ទាល់។
លោក ខៀវ សុភ័គ៖ «តាមការរីកចម្រើននៃសភាពការណ៍ប្រទេសជាតិ យើងឃើញថា ជនបរទេសកាន់តែមកទស្សនកិច្ចកម្ពុជា ច្រើនឡើងៗ ហើយមានទាំងជនអន្តោប្រវេសន៍ផង និងជនមិនមែនអន្តោប្រវេសន៍ផង។ ហើយមានជនអន្តោប្រវេសន៍ជាអ្នកវិនិយោគិននោះផង។ ដូច្នេះ ដើម្បីធ្វើការងារនោះឲ្យបានច្បាស់លាស់ថែមទៀត និងស៊ីជម្រៅ យើងបានស្នើសុំរាជរដ្ឋាភិបាលបង្កើតអគ្គនាយកដ្ឋានអន្តោប្រវេសន៍មួយ ក្នុងនោះមាននាយកដ្ឋានចំណុះចំនួន៥»។
អនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន បង្កើតអគ្គនាយកដ្ឋានអន្តោប្រវេសន៍នេះ មិនបាននិយាយលម្អិតអំពីតួនាទី និងភារកិច្ចរបស់អង្គភាពនេះទេ ដោយសរសេរថា តួនាទីភារកិច្ចរបស់អគ្គនាយកដ្ឋានអន្តោប្រវេសន៍ និងតួនាទីភារកិច្ចរបស់នាយកដ្ឋានចំណុះ ត្រូវកំណត់ដោយអនុក្រឹត្យមួយដោយឡែក។
អនុក្រឹត្យស្ដីពីការបង្កើតអគ្គនាយកដ្ឋានអន្តោប្រវេសន៍នេះ បានសរសេរថា នាយកដ្ឋានអន្តោប្រវេសន៍ដែលពីមុនចំណុះអគ្គស្នងការនគរបាលជាតិ ត្រូវផ្ទេរមកចំណុះអគ្គនាយកដ្ឋានអន្តោប្រវេសន៍ដែលទើបបង្កើតថ្មីនេះវិញ។ អគ្គនាយកដ្ឋានអន្តោប្រវេសន៍ថ្មីនេះ ដឹកនាំដោយអគ្គនាយកមួយរូប និងអគ្គនាយករងមួយចំនួន ហើយមាននាយកដ្ឋានចំណុះចំនួន៥។ នាយកដ្ឋានចំណុះទាំង៥នោះរួមមាន ទី១ នាយកដ្ឋានរដ្ឋបាលសរុប។ ទី២ នាយកដ្ឋានគ្រប់គ្រងជនបរទេសមិនមែនអន្តោប្រវេសន៍។ ទី៣ នាយកដ្ឋានគ្រប់គ្រងជនបរទេសអន្តោប្រវេសន៍។ ទី៤ នាយកដ្ឋានគ្រប់គ្រងជនបរទេសអន្តោប្រវេសន៍ជាអ្នកវិនិយោគឯកជន និងទី៥ នាយកដ្ឋានច្រកទ្វារអន្តរជាតិ។
មកទល់ពេលនេះមិនទាន់ប្រកាសឲ្យដឹងថា អ្នកណាជាអ្នកដឹកនាំអគ្គនាយកដ្ឋានអន្តោប្រវេសន៍ដែលទើបបង្កើតថ្មីនេះទេ។
ទាក់ទងការបង្កើតអគ្គនាយកដ្ឋានអន្តោប្រវេសន៍ថ្មីនេះ លោក សុក សំអឿន នាយកអង្គការមិនមែនរដ្ឋាភិបាលមួយឈ្មោះ ក្រុមអ្នកច្បាប់ការពារសិទ្ធិកម្ពុជា មានប្រសាសន៍ថា ការបង្កើតអគ្គនាយកដ្ឋានថ្មីនេះវាមានប្រយោជន៍ ឬអត់ អាស្រ័យលើសកម្មភាពជាក់ស្តែងរបស់អង្គភាពនោះ។
លោក សុក សំអឿន បានឲ្យដឹងថា ប្រទេសកម្ពុជា មានច្បាប់អន្តោប្រវេសន៍ហើយ ប៉ុន្តែការអនុវត្តកន្លងមកមិនសូវមានប្រសិទ្ធភាព ដោយសារមន្ត្រីថ្នាក់ក្រោមមួយចំនួននិយាយថា មិនមានគោលការណ៍ច្បាស់លាស់ពីថ្នាក់លើមក ជាពិសេសទាក់ទងជនជាតិវៀតណាម ហាក់មានការអនុគ្រោះ ដែលធ្វើឲ្យការអនុវត្តច្បាប់អន្តោប្រវេសន៍នោះមិនមានលក្ខណៈទូទៅស្មើភាពគ្នា ចំពោះជនអន្តោប្រវេសន៍ទាំងអស់ដែលរស់នៅ និងមកបំពេញការងារនៅប្រទេសកម្ពុជា។
លោក សុក សំអឿន៖ «សំខាន់លើគោលនយោបាយរដ្ឋាភិបាល តើសម្រេចអនុវត្តគោលការណ៍នោះច្បាស់លាស់ដែរឬអត់? ព្រោះកន្លងមក ការងារអន្តោប្រវេសន៍នេះរយីករយាកដោយសារយើងឃើញថា រដ្ឋាភិបាលហ្នឹងរាងបន្ធូរដៃជាមួយជនអន្តោប្រវេសន៍វៀតណាម។ ធម្មតាក្នុងការអនុវត្ត បើយើងអនុវត្តបន្ធូរដៃដល់ក្រុមណាមួយ វានាំឲ្យអនុវត្តធូរដៃទូទៅដែរ»។
បញ្ហាជនអន្តោប្រវេសន៍ជារឿងរសើបងាយប៉ះទង្គិចមួយនៅកម្ពុជា ជាពិសេសទាក់ទងជាមួយជនអន្តោប្រវេសន៍វៀតណាម។ ក្រៅពីជនអន្តោប្រវេសន៍វៀតណាម ក៏មានជនអន្តោប្រវេសន៍ចិន និងសាសន៍ផ្សេងៗទៀតដែរ។ ប្រទេសកម្ពុជា មានច្បាប់អន្តោប្រវេសន៍តាំងពីឆ្នាំ១៩៩៤។ ច្បាប់នេះមាន ៧ជំពូក និងចែងជា ៤១មាត្រា៕
No comments:
Post a Comment