សហគមន៍មានជម្លោះដីធ្លីនៅរាជធានីភ្នំពេញ លើកបដាតវ៉ាខាងមុខវត្តព្រះពុទ្ធទាមទារឲ្យដោះលែងមនុស្ស ២៣នាក់ នៅព្រឹកថ្ងៃទី២៥ ខែមេសា ឆ្នាំ២០១៤។
តុលាការ បើកសវនាការ សំណុំរឿង មនុស្ស២៣នាក់
ដោយ សុជីវី និង វណ្ណ វិចារ / អាស៊ីសេរី | ២៥ មេសា ២០១៤
អង្គជំនុំជម្រះ បានផ្អាកសវនាការ មួយរយៈពេល បន្ទាប់ពីបានសាកសួរ ជនសង្ស័យ មួយចំនួន ដើម្បីស្រស់ស្រូបអាហារថ្ងៃត្រង់ នៅម៉ោងប្រមាណ ១១ព្រឹក ហើយកំណត់ ថា នឹងបន្តសវនាការ នៅម៉ោង ២ និង ៣០នាទីបន្តទៀត។
នៅក្នុងបន្ទប់សវនាការទី១ ចៅក្រមទើបសាកសួរបានមនុស្ស ៤នាក់ ក្នុងចំណោមបុរស ១០នាក់ ដែលបានចាប់ខ្លួននៅមុខរោងចក្រ យ៉ាក ជីង កាលពីថ្ងៃទី២ ខែមករា។ ក្នុងបន្ទប់សវនាការទី២ ចៅក្រមបានសាកសួរសាក្សីដាក់បន្ទុកលើករណីបុរស ៣នាក់ ដែលបានចាប់ខ្លួននៅផ្លូវវ៉េងស្រេង កាលពីព្រឹកថ្ងៃទី៣ ខែមករា និងករណីបុរសទាំង ១០នាក់នោះ ក៏ត្រូវបានចាប់ខ្លួននៅផ្លូវវ៉េងស្រេង នៅថ្ងៃនោះផងដែរ។ ចំណែកបន្ទប់សវនាការទី៣ ចៅក្រមក៏បានសាកសួរសាក្សីករណីមនុស្សពីរនាក់ ដែលបានចាប់ខ្លួនកាលពីថ្ងៃទី១២ ខែវិច្ឆិកា ឆ្នាំ២០១៣ នៅគល់ស្ពានស្ទឹងមានជ័យ។
សាលាដំបូងរាជធានីភ្នំពេញ នៅព្រឹកថ្ងៃទី២៥ ខែមេសា បើកសវនាការសំណុំរឿងសកម្មជនសិទ្ធិមនុស្ស និងកម្មករចំនួន ២៣នាក់។ ចាប់តាំងពីព្រឹកព្រលឹម ផ្លូវខាងមុខតុលាការត្រូវកម្លាំងសមត្ថកិច្ចចម្រុះដាក់រនាំងបិទមិនអោយមានចរាចរណ៍ឡើយ។
ចំណែកផ្លូវតូចៗឆ្លងកាត់ផ្សេងទៀត ដែលអាចចូលទៅរកអគារតុលាការ ក៏ត្រូវបិទមិនឲ្យឆ្លងកាត់ដែរ។ ក្រៅតែពីហាមប្រាមយានយន្តមិនអោយធ្វើចរាចរ អ្នកថ្មើរជើងក៏ត្រូវរឹតត្បិតក្នុងពេលដំណើរការសវនាការកំពុងដំណើរការ។ ការរារាំងមិនអោយមានមនុស្សចូលទៅខាងមុខតុលាការ បានធ្វើឡើងចាប់តាំងពីពេលដែលជនជាប់ចោទមួយចំនួនត្រូវបញ្ជូនដល់តុលាការ កាលពីម៉ោងជាង ៦ព្រឹក។ នៅជ្រុងខាងជើងត្រង់រង្វង់មូលនាងគង្ហីង មានអ្នកតវ៉ាជាច្រើនរយនាក់បានប្រមូលផ្ដុំគ្នា ស្រែកទាមទារអោយតុលាការដោះលែងអ្នកទាំង ២១នាក់។
សវនាការត្រូវបែងចែកជា ៣បន្ទប់ ដែលរួមមាន បន្ទប់សវនាការទី១ បុរស ១០នាក់ដែលបានចាប់ខ្លួននៅមុខរោងចក្រ យ៉ាក ជីង កាលពីថ្ងៃទី២ ខែមករា។ បន្ទប់សវនាការទី២ ករណីបុរស ៣នាក់ដែលបានចាប់ខ្លួននៅផ្លូវវ៉េងស្រេង កាលពីព្រឹកថ្ងៃទី៣ ខែមករា និងករណីបុរសទាំង ១០នាក់នោះក៏ត្រូវបានចាប់ខ្លួននៅផ្លូវវ៉េងស្រេង នៅថ្ងៃនោះផងដែរ។ ចំណែកបន្ទប់សវនាការទី៣ ករណីមនុស្សពីរនាក់ ដែលបានចាប់ខ្លួនកាលពីថ្ងៃទី១២ ខែវិច្ឆិកា ឆ្នាំ២០១៣ នៅគល់ស្ពានស្ទឹងមានជ័យ។ ក្នុងសវនាការ ក៏មានអ្នកអង្កេតការណ៍ជាតិ អន្តរជាតិ តំណាងស្ថានទូតមួយចំនួនប្រចាំកម្ពុជា និងក្រុមគ្រួសារជនជាប់ចោទតាមដានយ៉ាងយកចិត្តទុកដាក់។
សូមរង់ចាំស្ដាប់ និងអានព័ត៌មានបន្ថែម...
No comments:
Post a Comment