លោក ហោ ណាំហុង រិះគន់ គណបក្ស ប្រឆាំង មុខមន្រ្តី សិទ្ធិមនុស្ស UN​

ដោយ៖​ ស៊ុន ណារិន និងសុទ្ធ គឹមសឿន​ /​ វីអូឌី | ថ្ងៃអង្គារ ទី29 ខែមេសា ឆ្នាំ2014

​​រដ្ឋមន្ត្រី​ ក្រសួង​ការបរទេស កម្ពុជា លោក ហោ ណាំហុង នៅថ្ងៃអង្គារនេះ បានបកស្រាយ បញ្ហាគណបក្ស ស​ង្រ្គោះ​ជាតិ​ ​ទៅ​ម​ន្រ្តី អង្គការ សហប្រជាជាតិ ទទួលបន្ទុក សិទ្ធិមនុស្ស ដោយលើកឡើងថា គណបក្ស ប្រឆាំង ជាអ្នកធ្វើ​ឲ្យ ​ការ​ចរចា​ មិន​ទទួលបាន លទ្ធផល។​

លោកស្រី Flavia Pansieri ឧត្តម​ស្នងការរង​ទទួលប​ន្ទុ​ក​សិទ្ធិមនុស្ស​អង្គការសហប្រជាជាតិ​ នៅរសៀល​ថ្ងៃ​អង្គា​រនេះ បាន​ជួប​ជាមួយ​​លោក ហោ ណាំហុង រដ្ឋមន្ត្រី​ក្រសួង​ការបរទេស។ ភាគីទាំងពីរ បាន​លើ​កពី​កិច្ច​ស​​ហ​ប្រតិ​បត្តិ​ការលើផ្នែកសិទ្ធិមនុស្ស។

អ្នកនាំពាក្យក្រសួងការបរទេស លោក កុយ គួង មានប្រសាសន៍ទាក់ទងនឹងជំនួបថា កន្លងម​កប្រជា​ជន​កម្ពុជា​ មាន​សិទ្ធិសម្តែងមតិ និងសិទ្ធិចូលរួមសកម្មភាពផ្សេងៗ និង​ដំណើរកា​រលទ្ធិប្រ​ជាធិបតេ​យ្យ។​ លោកបន្តថា រាជ​រដ្ឋាភិបាលកម្ពុជា មានឆន្ទៈពិតប្រាកដឲ្យមានការជឿនលឿនទៅមុខផ្នែកសិទ្ធិមនុស្ស និង​​ប្រ​ជា​ធិបតេយ្យ។

លោក កុយ គួង ឲ្យដឹងទៀតថា លោក ហោ ណាំហុង បានពន្យល់ពីការផ្អាកនៃការជួបជុំនៅទី​លានប្រ​ជា​ធិប​​តេយ្យ​​​បណ្តោះអាសន្ន ដោយសាររាជរដ្ឋាភិបាល អស់ការអត់ធ្មត់នឹងការតវ៉ារបស់បក្ខប្រឆាំង។ លោក​ ហោ ណាំហុង បញ្ជាក់ថា គណបក្សប្រជាជនកម្ពុជា មានឆន្ទៈពិតប្រាកដក្នុងការដោះស្រាយ តែ​គណបក្ស​ប្រឆាំងទេ ប្រៀបដូច​ពស់ក្បាលពីរ គឺមួយបង្ហាញឆន្ទៈពិតប្រាកដចង់ដោះស្រាយ និងទីពីរ ចាំតែ​ជំទាស់ ដែលនាំឲ្យ​ការចរចាមិន​ទទួល​លទ្ធផល​។ លោកបានលើកឧទារណ៍នៃជំ​នួបកំពូលកា​លពីថ្ងៃទី១​៦​ខែកញ្ញា​ ដែលមានការសុំតំណែងប្រធានរដ្ឋសភា និងជំនួបតាមរយៈទូរស័ព្ទរវាងលោក ហ៊ុន សែន និង​លោក សម រង្ស៊ី។

បន្ទាប់ពីបញ្ចប់សវនាការ លោកស្រី Flavia Pansieri ថ្លែងទៅកាន់អ្នកសារព័ត៌មានថា ភាគីទាំងពីរ ​បាន​ត្រួ​តពិ​និត្យ​កិច្ចសហប្រតិបត្តិការដែលមានរយៈពេលជាង២០ឆ្នាំហើយទៅលើផ្នែកសិទ្ធិមនុស្ស។ លោកស្រី​បញ្ជាក់ថា ភាគី​ទាំង​ពីរ ពិនិត្យថាតើផ្នែក​ណាដែលមានការរីកចម្រើន ហើយថាតើនឹងត្រូវ​ពង្រឹង​យ៉ាងណា​ដូចម្តេចទៀ​ត។

កាលពីខែកុម្ភៈ ​ក្រុមប្រឹក្សា​សិទ្ធិមនុស្ស​អង្គការសហប្រជាជាតិ​(UN) ដាក់​អនុសាសន៍​កែលម្អ​ស្ថានភាព​សិទ្ធិមនុស្ស​កម្ពុជា ចំនួន ២០៦​ចំណុច ដែល​ក្នុងនោះ​ប្រតិភូ​កម្ពុជា បាន​ប្រកាស​ទទួល​យក ១៧២​ចំណុច និង​ស្នើ​ពន្យារ​ពេល​ទទួល​លើ ៣៤​ចំណុច​ទៀត រហូត​ដល់​កិច្ចប្រជុំ​អនុម័ត​លើ​ក​ទី​២ ខែ​មិថុនា​ខាង​មុខ​នេះ​។​

​របាយការណ៍​ដំណើរការ​ត្រួតពិនិត្យ​ជា​សាកល​តាម​ពេលវេលា​កំណត់ (UPR) ស្តីពី​កម្ពុជា អនុម័ត​លើ​ក​ទី​១ នៅ​ថ្ងៃ​ទី​៣១ ខែ​មករា​នេះ នៅ​ទីក្រុង​ហ្សឺ​ណែ​វ ប្រទេស​ស្វីស ដោយ ៧៦​ប្រទេស​ជា​សមាជិក​នៃ​អង្គការ​សហប្រជាជាតិ ឲ្យដឹងថា អនុសាសន៍ ៣៤​ចំណុច​ដែល​រដ្ឋាភិបាល ពន្យារ​ពេល​ទទួលយក​នោះ មានដូចជា ការជំរុញ​ការលើកស្ទួយ​សេរីភាព​បញ្ចេញមតិ ការសម្រួល​កិច្ចការ​សកម្មជន​សិទ្ធិមនុស្ស សិទ្ធិ​ដីធ្លី និង​សិទ្ធិ​ការងារ ការបង្កើត​ប្រព័ន្ធ​ផ្សព្វផ្សាយ​ឯករាជ្យ​មិន​ក្រោម​ឥទ្ធិពល​អ្នកនយោបាយ ការបញ្ចប់​និទណ្ឌភាព និង​ការបញ្ឈប់​ធ្វើ​ទារុណកម្ម​ឃោរឃៅ​​ លើ​អ្នកទោស​ជា​ដើម​។​

លោកស្រី Flavia Pansieri ឧត្តម​ស្នងការរង​ទទួលប​ន្ទុ​ក​សិទ្ឋិ​មនុស្ស​អង្គការសហប្រជាជាតិ បាន​មក​ដល់​ប្រទេស​កម្ពុជា កាលពី​ថ្ងៃ​ទី​២៨ មេសា ក្នុង​ដំណើរ​បំពេញ​ទស្សនកិច្ច​រយៈពេល​០៥​ថ្ងៃ​។ លោកស្រី នឹង​បញ្ចប់​ដំណើរ​ទស្សនកិច្ច​នៅ​កម្ពុជា នៅ​ថ្ងៃ​ទី​២ ខែ​ឧសភា​៕