វិបត្តិ នយោបាយ នៅថៃ ប៉ះពាល់ ដល់ការនាំចេញ ស្រូវអង្ករ កម្ពុជា
RFA | ២៤ មិថុនា ២០១៤
ផលិតផលសម្រេចអង្ករផ្កាម្លិះក្នុងកម្មវិធីតាំងពិព័រណ៍
ការងារដែលរៀបចំដោយសភាពាណិជ្ជកម្មអឺរ៉ុបនៅកម្ពុជា នៅកោះពេជ្រ
នាថ្ងៃទី ២២ ខែមិថុនា ឆ្នាំ២០១៤។ RFA/Oung Sereyvuth
អ្នកនាំចេញ អង្ករ កម្ពុជា ហាក់កំពុង ជួបបញ្ហា លំបាក ដោយសារ តែ នៅប្រទេស ជិតខាង កើតមានវិបត្តិ ដូចជាវិបត្តិ នយោបាយ ដែលកំពុង កើតឡើង នៅក្នុងប្រទេស ថៃ។ បញ្ហាធំ ចំនួនពីរ របស់ថៃ បានប៉ះពាល់ ដល់ការវិស័យ ស្រូវអង្ករ កម្ពុជា។ ទីមួយ ភាពតានតឹង លើផ្នែកនយោបាយ ដែលបន្ថយ ការនាំចូល ស្រូវ ក្រៅផ្លូវការ ពីកម្ពុជា, និងកត្តាទីពីរ គឺ ការបន្ថយ តម្លៃនាំចេញ អង្ករ ដើម្បី បញ្ចេញស្តុកស្រូវ របស់ថៃ ដែលមាន បរិមាណច្រើន សន្ធឹកសន្ធាប់។
វិស័យស្រូវអង្ករកម្ពុជា ហាក់ពឹងខ្លាំងលើទីផ្សារប្រទេសថៃ និងវៀតណាម។ ការពឹងអាស្រ័យខ្លាំងលើទីផ្សាររបស់ប្រទេសជិតខាងបែបនេះ ដោយសារតែតម្រូវការរោងម៉ាស៊ីនកែច្នៃស្រូវកម្ពុជា មានបរិមាណតិចតួចដែលមិនអាចស្រូបយកបរិមាណស្រូវដែលកម្ពុជា ផលិតបានទាំងស្រុងឡើយ និងទុនប្រមូលទិញស្រូវដើម្បីកែច្នៃក៏នៅមានកម្រិតទាប។
តាមការប៉ាន់ស្មានដោយក្រសួងកសិកម្មរុក្ខាប្រមាញ់និងនេសាទ បានបង្ហាញថា កម្ពុជាអាចផលិតស្រូវប្រមាណជាង ៨លានតោននៅក្នុងឆ្នាំ២០១៤។ ក្នុងចំណោមបរិមាណស្រូវទាំងអស់នេះ ត្រូវបែកចែកទៅប្រទេសជិតខាង តម្រូវការរបស់ប្រជាពលរដ្ឋ និងតម្រូវការរបស់រោងម៉ាស៊ីនកិនស្រូវដើម្បីកែច្នៃនាំចេញនៅលើ ទីផ្សារអន្តរជាតិ។
តាមការប៉ាន់ស្មានប្រជាពលរដ្ឋកម្ពុជា សរុបត្រូវការស្រូវបរិភោគប្រចាំឆ្នាំប្រមាណជាង ៤លានតោន និងរោងម៉ាស៊ីនកែច្នៃវិញត្រូវការស្រូវប្រមាណ ១លាន ដើម្បីកែច្នៃនាំចេញនៅក្នុងឆ្នាំ២០១៤នេះ និងជាង ៣លានតោនផ្សេងទៀត ជាបរិមាណស្រូវដែលហូរចេញទៅប្រទេសជិតខាងក្រៅផ្លូវការ។ ប៉ុន្តែតម្រូវការស្រូវកែច្នៃរបស់ម្ចាស់រោងម៉ាស៊ីនទាំងនោះ អាចថយចុះ នាពេលបច្ចុប្បន្ន ដោយសារតែ ប្រទេសថៃ កំពុងកើតមានវិបត្តិនយោបាយ។
អ្នកនាំចេញអង្ករកម្ពុជា បានអះអាងថា គម្រោងនាំចេញអង្ករ ៦០ម៉ឺនតោននៅក្នុងឆ្នាំ២០១៤ របស់ខ្លួន នឹងត្រូវបរាជ័យដោយសារតែប្រទេសថៃ បានបញ្ចេញបរិមាណអង្ករជាង ១០លានតោន ហើយលក់ថ្លៃទាបជាងទីផ្សារប្រមាណ ២០% នៅលើទីផ្សារអន្តរជាតិ។ ម៉្យាងវិញទៀត ម្ចាស់រោងម៉ាស៊ីនកិនស្រូវជាច្រើននៅកម្ពុជាវិញ ក៏កំពុងជួបបញ្ហាមានស្តុកស្រូវច្រើន តែមិនអាចបញ្ចេញលក់នៅលើទីផ្សារអន្តរជាតិ។
ប្រធានក្រុមហ៊ុននាំចេញអង្ករមេគង្គ អូរីហ្សា (Mekong Oriza) លោកឧកញ៉ា ហ៊ុន ឡាក់ មានប្រសាសន៍ថា តម្លៃនាំចេញអង្ករកម្ពុជា គឺអាស្រ័យលើទីផ្សារអន្តរជាតិ ជាពិសេសតាមប្រទេសថៃ ដោយសារតែប្រទេសនេះ ជាប្រទេសនាំចេញអង្ករខ្ពស់បំផុតលើពិភពលោក។ ការបញ្ចុះតម្លៃអង្ករនាំចេញរបស់ថៃ បានប៉ះពាល់ដល់វិស័យនាំចេញអង្កររបស់កម្ពុជាដែរ តាមរយៈបាត់បង់ចំណែកទីផ្សារមួយចំនួននៅទីផ្សារអង្ករពិភពលោក ដោយអ្នកបញ្ជាទិញបង្វែរទៅទិញអង្ករពីប្រទេសថៃ ត្រង់តម្លៃមួយទាប។
ទោះជាយ៉ាងណាក៏ដោយ លោកឧកញ៉ា ហ៊ុន ឡាក់ បានបញ្ជាក់ទៀត អ្វីដែលកំពុងកើតឡើងនេះ នឹងប៉ះពាល់ដល់វិស័យស្រូវអង្ករកម្ពុជា នៅក្នុងរយៈពេលខ្លីប៉ុណ្ណោះ។
លោក ហ៊ុន ឡាក់ មានប្រសាសន៍បន្ថែមថា មូលហេតុដែលប្រទេសថៃ បញ្ចេញបរិមាណស្តុកអង្ករលក់នៅលើទីផ្សារអន្តរជាតិ បណ្ដាលមកពីគោលនយោបាយទិញស្រូវពីកសិករខ្ពស់ជាងទីផ្សារពីរដង ដែលបានចាប់អនុវត្តតាំងពីឆ្នាំ២០១១។ ស្របពេលដែលប្រទេសថៃ មានជម្លោះទាក់ទងនឹងរឿងនយោបាយ ក៏បានប៉ះពាល់បន្តដល់គោលនយោបាយស្រូវអង្កររបស់ថៃ ដែលរដ្ឋាភិបាលថៃ ត្រូវតែបញ្ចេញស្ដុកស្រូវអង្ករនេះលក់នៅលើទីផ្សារអន្តរជាតិ ដើម្បីចំណូលថវិកាជាតិ។
បន្ថែមលើនេះ អគ្គលេខាធិការរងនៃសម្ព័ន្ធអ្នកផលិតស្រូវនិងនាំចេញអង្ករកម្ពុជា លោក វ៉ាន់ ដេវីដ វិចិត្រ មានប្រសាសន៍ថា ឥទ្ធិពលរបស់ថៃ បានប៉ះពាល់ដល់ទីផ្សារអង្ករនៅលើពិភពលោក និងប៉ះពាល់បន្តដល់ការនាំចេញអង្កររបស់កម្ពុជា ស្ទើរតែទាំងស្រុង។ ការរងឥទ្ធិពលពីថៃ មិនបានធ្វើតម្លៃស្រូវនៅកម្ពុជា ធ្លាក់ថ្លៃគំហុកឡើយ ដោយសារតែការហូរចេញស្រូវក្រៅផ្លូវការទៅប្រទេសជិតខាងនៅតែមាន សកម្មភាពដដែល ជាពិសេសទៅប្រទេសវៀតណាម។ តាមការប៉ាន់ស្មាន ការចេញស្រូវទៅប្រទេសជិតខាងមានប្រមាណ ៣លានតោន។
ប្រធានសហព័ន្ធស្រូវអង្ករកម្ពុជា លោក សុខ ពុទ្ធីវុធ មានប្រសាសន៍ថា ស្ថានភាពធ្វើអាជីវកម្មលើវិស័យស្រូវអង្កររបស់កម្ពុជា នៅពេលបច្ចុប្បន្ន ជួបប្រទះនឹងការប្រជែងផ្នែកតម្លៃនៅលើទីផ្សារអន្តរជាតិ និងម្ចាស់រោងម៉ាស៊ីនភាគច្រើន ក៏ប្រឈមមុខនឹងការបង់អត្រាការប្រាក់ទៅស្ថាប័នហិរញ្ញវត្ថុ ស្របពេលសកម្មភាពផលិតរបស់ខ្លួនមានតិចតួច។
លោកបញ្ជាក់ទៀតថា តាមបទពិសោធន៍នាំចេញអង្ករកើនឡើងខ្ពស់កាលពីឆ្នាំ២០១៣ កន្លងទៅ បានជំរុញអ្នករកស៊ីអង្ករមួយចំនួនបានខ្ចីលុយពីធនាគារដើម្បី ពង្រីកការនាំចេញ ប៉ុន្តែការបង្កើតដើមទុនវិនិយោគបន្ថែមនោះ ក៏បានក្លាយជាហានិភ័យធំដែរនៅក្នុងឆ្នាំ២០១៤នេះ។
ទោះជាយ៉ាងណា ក្រៅពីបញ្ហានយោបាយនិងការបញ្ចេញលក់អង្កររបស់ថៃ យ៉ាងគំហុកនៅឆ្នាំ២០១៤ នេះ កម្ពុជាក៏ប្រឈមនឹងការប្រកួតប្រជែងដោយផ្ទាល់លើការនាំចូលអង្ករ នៅក្នុងទីផ្សារអឺរ៉ុបដែរ ដោយសារតែអឺរ៉ុបកំពុងពិចារណា លុបបំបាត់ការរួចពន្ធនាំចូលអង្ករពីកម្ពុជា តាមរយៈការស្នើសុំរបស់ប្រទេសអ៊ីតាលី។
បញ្ហាទាំងអស់បានក្លាយជាក្ដីបារម្ភរបស់អ្នកនាំចេញអង្ករនិង រដ្ឋាភិបាលកម្ពុជា ដែលអាចប៉ះពាល់ដល់គោលដៅនាំចេញ អង្ករកម្ពុជាដែលត្រូវសម្រេចឲ្យបាននៅឆ្នាំ២០១៥។ របាយការណ៍របស់ច្រកចេញចូលតែមួយនៃការនាំចេញអង្ករកម្ពុជា បានបង្ហាញថា ការនាំចេញអង្ករកម្ពុជា នៅលើទីផ្សារអន្តរជាតិនៅក្នុងឆ្នាំ២០១៣ សម្រេចបាន ៤០ម៉ឺនតោន ប៉ុន្តែនៅរយៈពេល ៥ខែ ដើមឆ្នាំ២០១៤ សម្រេចបាន ១៥ម៉ឺនតោនប៉ុណ្ណោះ ដែលសហព័ន្ធស្រូវអង្ករកម្ពុជា ជឿជាក់ថា ការនាំចេញអង្ករមួយលានតោននៅឆ្នាំក្រោយនេះ ស្ថិតនៅក្នុងភាពស្រពេចស្រពិល ឬអាចបរាជ័យ៕
No comments:
Post a Comment