បក្សសង្គ្រោះជាតិ ចង់ដាក់ថ្ងៃ បាត់បង់ដី កម្ពុជាក្រោម ជាថ្ងៃបុណ្យជាតិ
ដោយ វណ្ណ វិចារ / RFA | ៤ មិថុនា ២០១៤
អនុប្រធាន បក្សសង្គ្រោះជាតិ លោក កឹម សុខា
ថ្លែងក្នុង ពិធីរំលឹកខួប ទី៦៥ នៃការបាត់បង់ ទឹកដី កម្ពុជាក្រោម
នាវត្ត សាមគ្គីរង្សី រាជធានី ភ្នំពេញ កាលពីព្រឹកថ្ងៃ ទី៤ មិថុនា
ឆ្នាំ២០១៤។ RFA/Van Vichar
មេដឹកនាំ គណបក្ស សង្គ្រោះជាតិ ប្រកាសជាថ្មី ថា, បក្សនេះ គាំទ្រ សកម្មភាព របស់ ពលរដ្ឋខ្មែរក្រោម ក្នុងការទាមទារ សិទ្ធិ សេរីភាព ក្នុងនាម ជាម្ចាស់ទឹកដី នៅក្នុងដែនដី ដែលគ្រប់គ្រង ដោយវៀតណាម។
អនុប្រធាន គណបក្ស សង្គ្រោះជាតិ លោក កឹម សុខា ក៏មានបំណង ស្នើច្បាប់ ដាក់ថ្ងៃ ដែលបារាំង កាត់ដី កម្ពុជាក្រោម ឲ្យវៀតណាម ជាថ្ងៃរំលឹក ការឈឺចាប់ របស់ ជាតិខ្មែរ ទាំងមូល ទៀតផង។
លោក កឹម សុខា មានប្រសាសន៍ ថា, បើ បក្សសង្គ្រោះជាតិ ដឹកនាំរដ្ឋាភិបាល នោះ គណបក្សនេះ នឹងចាត់ទុក ដែនដី កម្ពុជាក្រោម ជាខេត្ត របស់ខ្មែរ។ ម្យ៉ាងទៀត លោក នឹងស្នើច្បាប់ ដាក់កំណត់ យកថ្ងៃ ទី៤ ខែមិថុនា ជាថ្ងៃបុណ្យជាតិ, ហើយ អនុញ្ញាត ឲ្យខ្មែរក្រោម ចេញចូល ប្រទេសកម្ពុជា ដោយសេរី មិនចាំបាច់ ប្រើលិខិតឆ្លងដែន និងទទួលស្គាល់ សញ្ញាប័ត្រ របស់ យុវជន ខ្មែរក្រោម ដើម្បី ងាយស្រួល រកការងារធ្វើ នៅស្រុកខ្មែរ ជាដើម។
ចំណែក ប្រធាន គណបក្ស សង្គ្រោះជាតិ លោក សម រង្ស៉ី វិញ បានចោទ ថា, គណបក្ស ប្រជាជនកម្ពុជា ព្រមតាម វៀតណាម ចំនួន ៣ចំណុច, រួមមាន៖ ព្រម ឲ្យវៀតណាម បង្ខិតព្រំដែន ស្រេចតែ អំពើចិត្ត, ព្រម ឲ្យនិគម ជាតិវៀតណាម ចូលមករស់នៅ ក្នុងប្រទេស កម្ពុជា ដោយសេរី, និងព្រម រួមដៃគ្នា ជាមួយ វៀតណាម ដើម្បី គាបសង្កត់ ខ្មែរក្រោម។
លោក បន្តថា បារាំង កាត់ដីខ្មែរ ឲ្យវៀតណាម មកពីវៀតណាម ប្រើយុទ្ធសាស្ត្រ ស្បែកខ្លា គឺ ប្រើវិធីបញ្ជូន ពលរដ្ឋគេ ឲ្យមករស់នៅ មុនរហូត ដល់ពល រដ្ឋវៀតណាម ច្រើនជាងខ្មែរ។ លោក សម រង្ស៉ី បន្តថា, បើសិន ជាគណបក្ស សង្គ្រោះជាតិ ជាប់ឆ្នោត, នោះ ពលរដ្ឋ កម្ពុជាក្រោម នឹងត្រូវ បានទទួល អត្តសញ្ញាណប័ណ្ណ ជាតិខ្មែរ ទាំងអស់។
ព្រះរាជតំណាង ព្រះបរម
រាជវាំង សម្តេច ស៊ីសុវត្ថិ ពង្សនារី មុនីពង្ស យាងចូលរួម ពិធីរំលឹកខួប ទី៦៥ នៃការបាត់បង់ កម្ពុជាក្រោម នាវត្ត សាមគ្គីរង្សី រាជធានី ភ្នំពេញ
នៅព្រឹកថ្ងៃ ទី៤ មិថុនា ឆ្នាំ២០១៤។ RFA/Uon Chhin
ឆ្លើយតបនឹងបញ្ហានេះ មន្ត្រីអ្នកនាំពាក្យរដ្ឋសភា លោក ឈាង វុន មានប្រសាសន៍ថា លោកមិនតបចំពោះការលើកឡើងរបស់លោក សម រង្ស៉ី ឡើយ ព្រោះថា មេបក្សប្រឆាំងរូបនេះនិយាយដើម្បីតែកេងចំណេញនយោបាយប៉ុណ្ណោះ។ លោកបញ្ជាក់ថា លោក កឹម សុខា អាចស្នើច្បាប់កំណត់យកថ្ងៃទី៤ ខែមិថុនា ជាថ្ងៃបុណ្យជាតិបាន ដ៏រាបណាបក្សនេះជាប់ឆ្នោតជាមុនសិន។
នាយកប្រតិបត្តិសមាគមខ្មែរកម្ពុជាក្រោម លោក ថាច់ សេដ្ឋា ថ្លែងថា ខ្មែរក្រោមមិនមែនទាមទារទឹកដីដែលបាត់មកវិញទេ ប៉ុន្តែគ្រាន់តែទាមទារសិទ្ធិសេរីភាពជាម្ចាស់ទឹកដីប៉ុណ្ណោះ។ រឿងទាមទារដីខ្មែរមកវិញ ឬអត់នោះ ជារឿងរបស់រាជរដ្ឋាភិបាលរបស់ព្រះមហាក្សត្រ និងពលរដ្ឋទូទាំងប្រទេស។
ទោះជាបែបណាក្តី អ្នកវិភាគឯករាជ្យ លោកបណ្ឌិត ឡៅ ម៉ុងហៃ មិនគាំទ្រគំនិតចង់ដាក់ថ្ងៃនេះ ជាថ្ងៃបុណ្យជាតិទេ។ លោកបន្តថា ខ្មែរក្រោមអាចតវ៉ាសុំសិទ្ធិជាម្ចាស់ស្រុកនៅក្នុងវៀតណាម ហើយខ្មែរសុរិន្ទក៏ដូចគ្នាដែរ ចំណែករដ្ឋាភិបាលកម្ពុជា គ្រាន់តែចាំការពារ និងគាំទ្រជាការស្រេច។
ក្នុងថ្ងៃរំលឹកខួបនៃការបាត់បង់ទឹកដីកម្ពុជាក្រោម ឆ្នាំនេះ មានព្រះសង្ឃជាង ១ពាន់អង្គ និងពុទ្ធបរិស័ទជាច្រើនរយនាក់ទៀតចូលរួមច្រើនកុះករនៅវត្ត សាមគ្គីរង្សី រាជធានីភ្នំពេញ។ យុវជនខ្មែរក្រោម និងយុវជនគណបក្សសង្គ្រោះជាតិ បានតុបតែងគូរមុខ និងលើកទង់ចងបដាបង្ហាញពីទឹកចិត្តស្រលាញ់ដីកម្ពុជាក្រោម។ ចំណែកឯអាជ្ញាធររដ្ឋាភិបាលវិញ បានបញ្ជូនកម្លាំងសម្ងាត់ឲ្យតាមដានព្រឹត្តិការណ៍នេះ។ តំណាងសហគមន៍ខ្មែរក្រោម ក៏បានអញ្ជើញតំណាងគណបក្សហ៊្វុនស៊ិនប៉ិច និងគណបក្សប្រជាជនកម្ពុជា ឲ្យចូលរួមដែរ ប៉ុន្តែមិនឃើញមានវត្តមានគណបក្សទាំងពីរចូលរួមឡើយ។
ទោះជាបែបណាក្តី ព្រះមហាក្សត្របានបញ្ជូនព្រះរាជតំណាងមួយព្រះអង្គឲ្យយាងជាកិត្តិយស ក្នុងពិធីនេះ។ ព្រះរាជតំណាងព្រះមហាក្សត្រ សម្ដេច ស៊ីសុវត្ថិ ពង្សនារី មុនីពង្ស មិនមានសវនីយ៍ពីថ្ងៃខួបនៃការបាត់បង់ទឹកដីកម្ពុជាក្រោមបន្តិចឡើយ ដោយព្រះអង្គគ្រាន់តែមានបន្ទូលថា នេះជាពិធីរាប់បាត្រព្រះសង្ឃជាង ១ពាន់អង្គប៉ុណ្ណោះ។ លើសពីនេះ អ្នកអង្គម្ចាស់បាននាំយកព្រះរាជអំណោយរបស់ព្រះមហាក្សត្រ និងព្រះមាតា ជាទឹកប្រាក់ចំនួន ៣ពាន់ដុល្លារ មកឧបត្ថម្ភដល់ខ្មែរកម្ពុជា ដើម្បីរៀបចំពិធីនេះ។ នៅពេលដែលយាងដំណើរត្រឡប់ទៅព្រះបរមរាជវាំងវិញ ម៉ូតូនាំក្បួនព្រះទីន័ងព្រះរាជតំណាងព្រះមហាក្សត្រ ក៏ធាក់មិនឆេះទៀត នាំឲ្យពលរដ្ឋដែលចូលរួមពិធីនោះនាំគ្នារុញម៉ូតូនោះមួយសន្ទុះទើប អាចបន្តដំណើរទៅមុខរួច។
គោលបំណងនៃការកំណត់យកថ្ងៃទី៤ ខែមិថុនា ជាទិវាកាន់ទុក្ខរបស់ជាតិខ្មែរនោះ មកពីចង់ឲ្យកូនខ្មែរចងចាំប្រវត្តិសាស្ត្រ សំដែងការដឹងគុណចំពោះបុព្វបុរសដែលហ៊ានលះបង់ជីវិតដើម្បីជាតិ៕
No comments:
Post a Comment