លោក ស ខេង និងលោក កឹម សុខា ជួប​លោក សុរិយា ស៊ូប៊ែឌី ពី​បញ្ហា​មួយ​ចំនួន ដាច់​ដោយ​ឡែក ​ពី​គ្នា​

RFA | ២០ មិថុនា ២០១៤

អ្នក​រាយការណ៍ ​ពិសេស ​នៃ​ឧត្ដម​ស្នងការ​ អង្គការ​ សហប្រជាជាតិ ​ទទួល​បន្ទុក​ ផ្នែក​សិទ្ធិ​មនុស្ស​ ប្រចាំ​កម្ពុជា លោក សុរិយា ស៊ូប៊ែឌី (Surya Subedi) ចេញ​មក​ ទទួល​ញត្តិ ​របស់ ​សហជីព​ នៅ​ខាង​មុខ ​ការិយាល័យ ​នា​រាជធានី ​ភ្នំពេញ នៅ​ថ្ងៃ​១៣ មករា ឆ្នាំ​២០១៤។  RFA/Morm Moniroth

លោក សុរិយា ស៊ូប៊ែឌី (Surya Subedi) អ្នក​រាយការណ៍ ​ពិសេស​អង្គការ​សហប្រជាជាតិ ទទួល​បន្ទុក​ សិទ្ធិ​មនុស្ស នៅ​ថ្ងៃ​សុក្រ ទី​២០ ខែ​មិថុនា ជួប​ជាមួយ​ មន្ត្រី​ជាន់​ខ្ពស់ ​គណបក្ស ​ប្រជាជន​កម្ពុជា លោក​ឧបនាយក​រដ្ឋមន្ត្រី ស ខេង និង​ជា​រដ្ឋមន្ត្រី​ ក្រសួង​ មហាផ្ទៃ ​នៅ​ទីស្ដីការ ​ក្រសួង​មហាផ្ទៃ ដោយ​ពិភាក្សា ​ពី​ស្ថានភាព​ ពលករ​ ចំណាក​ស្រុក ​ពី​ថៃ, សិទ្ធិមនុស្ស, សិទ្ធិ ​នៃ​ការ​ បញ្ចេញ​មតិ និង​ស្ថានភាព ​ទីលាន​ ប្រជាធិបតេយ្យ,​ ការ​កែ​ទម្រង់ គ.ជ.ប., ច្បាប់​ គ្រប់​គ្រង ​អង្គការ ​សង្គម​ស៊ីវិល, និង​ច្បាប់​ ឧក្រិដ្ឋ​កម្ម​ តាម​ប្រព័ន្ធ ​បច្ចេកវិទ្យា (Cyber Law)។

លោក សុរិយា ស៊ូប៊ែឌី ក៏ជួបពិភាក្សា ជាមួយ ​បក្សប្រឆាំង ដែរ។  ក្នុងជួប ជាមួយ ​​អនុ​ប្រធាន ​គណបក្ស​ សង្គ្រោះ​ជាតិ លោក កឹម សុខា ពិភាក្សា ​ពី​បញ្ហា គោរព​ សិទ្ធិ​មនុស្ស​ នៅ​កម្ពុជា មាន​បញ្ហា​ដីធ្លី និង​ករណី ​រដ្ឋាភិបាល ​យោធា​ថៃ បញ្ជូន​ពលករ​ខ្មែរ ​មក​កម្ពុជា វិញ។  ទី​២ រាយការណ៍​ អំពី ​ការ​កែ​ទម្រង់ ​ការ​បោះ​ឆ្នោត​ នៅ​កម្ពុជា, និយាយ​ ពី​ដំណើរ ​ការ​ជាប់​គាំង ​នៃ​ការ​ចរចា​ នៃ​គណបក្ស​ ទាំង​ពីរ, និង​ទី​៣ គណបក្ស​ សង្គ្រោះ​ជាតិ នឹង​រាយការណ៍ ​អំពី​ ការ​កែ​ទម្រង់ ​ប្រព័ន្ធ​យុត្តិធម៌។