 |
| ព្រះសង្ឃ និមន្តរាប់បាត្រ ក្នុងពិធីបុណ្យដង្ហែ ព្រះបរមអដ្ឋិ
ព្រះបរម រតនកោដ្ឋ នៅខាងមុខ ព្រះបរមរាជវាំង កាលពីព្រឹកថ្ងៃ ទី១០
កក្កដា ឆ្នាំ២០១៤។
RFA/Mom Sophon
|
ពិធីរាប់បាត្រ បង្សុកូល ថ្វាយព្រះវិញ្ញាណក្ខន្ធ ព្រះបរម រតនកោដ្ឋ
RFA | ១០ កក្កដា ២០១៤
គណៈកម្មការ រៀបចំ ព្រះរាជពិធី ដង្ហែព្រះបរម អដ្ឋិព្រះបរម រតនកោដ្ឋ បានរៀបចំ ពិធីរាប់បាត្រ ព្រះសង្ឃ ជាង៣ពាន់អង្គ នៅមុខ ព្រះបរមរាជវាំង នៅព្រឹកថ្ងៃ ទី១០ ខែកក្កដា ដើម្បី ឧទ្ទិសមហា កុសលជូន ព្រះវិញ្ញាណក្ខន្ធ បរមរតនកោដ្ឋ សម្ដេច ព្រះនរោត្តម សីហនុ។ មន្ត្រីរាជការ, ប្រជាពលរដ្ឋ ជាច្រើនរយនាក់ ក៏ចូលរួម ក្នុងព្រះរាជពិធី នៅថ្ងៃមួយ ក្នុងចំណោមថ្ងៃបុណ្យ ៣ថ្ងៃ នោះដែរ។
ក្រោយពិធីរាប់បាត្របញ្ចប់នៅម៉ោងជាង ៨ព្រឹក ព្រះសង្ឃជាង ៣ពាន់អង្គ ដែលនិមន្តមកពីបណ្ដាខេត្ត ក្រុង រាជធានីទូទាំងប្រទេស ត្រូវបានព្រះករុណាសម្ដេចព្រះ មរមនាថ នរោត្តម សីហមុនី និមន្តចូលព្រះបរមរាជវាំង បង្សុកូលថ្វាយនូវព្រះរាជកុសលដល់ព្រះបរមរតនកោដ្ឋ។
ទីប្រឹក្សាក្រសួងធម្មការ និងសាសនា លោក ម៉ុម នាង ដែលមាននាទីជួយសម្របសម្រួលពិធីបុណ្យមានប្រសាសន៍ថា ព្រះមហាក្សត្រព្រះបាទនរោត្តម សីហមុនី មានព្រះរាជវត្តមានក្នុងពិធីនោះ៖ «ក្នុងកិច្ចនិមន្តព្រះសង្ឃ រាប់បាត្រ បង្សុកូល សមាធិ ដើម្បីសរុបថ្វាយនូវព្រះរាជកុសល ចំពោះព្រះបរមរតនកោដ្ឋ ដែលព្រះអង្គជាព្រះបិតាជាតិ ជាព្រះមហាវីរក្សត្រលើទឹកដីកម្ពុជា ដើម្បីឯកភាពជាតិនៅលើទឹកដីនៃកម្ពុជា តាំងពីសង្គមរាស្ត្រនិយមមក។»
ពិធីរាប់បាត្រ និងបង្សុកូលនេះ ដឹកនាំដោយគណៈកម្មការរៀបចំព្រះរាជពិធីដង្ហែព្រះបរមអដ្ឋិ ព្រះករុណា ព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវីររាជបិតាឯករាជ្យ បូរណភាពទឹកដី និងឯកភាពជាតិ ព្រះបរមរតនកោដ្ឋ ដែលមានរដ្ឋមន្ត្រីក្រសួងព្រះបរមរាជវាំង ចៅហ្វាវាំង គង់ សំអុល និងមន្ត្រីក្រសួងធម្មការ និងសាសនា។
លោក ម៉ុម នាង ឲ្យដឹងទៀតថា ព្រះសង្ឃជាង ៣ពាន់អង្គនោះ ត្រូវបែងចែកជា ២៧ក្រុម ហើយព្រះករុណានិមន្តមួយក្រុមម្តងៗ ដើម្បីធ្វើពិធីបង្សុកូលមុខព្រះបរមរតនកោដ្ឋ ដែលតម្កល់នៅលើព្រះទីនាំងមហាមន្ទីរក្នុងព្រះបរមរាជវាំង។
នៅក្នុងពិធីនោះដែរ ស្ត្រីម្នាក់មកពីខណ្ឌសែនសុខ រាជធានីភ្នំពេញ ឈ្មោះ វាសនា ក្នុងចំណោមប្រជាពលរដ្ឋជាច្រើនផ្សេងទៀតដែលចូលរួមឈរមើលព្រះរាជ ពិធីនោះ សម្ដែងការសោកស្ដាយដែលមិនបានចូលរួមរាប់បាត្រព្រះសង្ឃ ដោយពុំមានលុយកាក់ ហើយសមត្ថកិច្ចក៏មិនអនុញ្ញាតឲ្យចូលដែរ ពីព្រោះអ្នកដែលអាចចូលក្នុងពិធីនោះបានទាំងព្រះសង្ឃ និងពុទ្ធបរិស័ទ សុទ្ធតែមានប័ណ្ណអញ្ជើញត្រឹមត្រូវពីក្រុមពិធីការជាស្រេច៖ «ខ្ញុំ ស្រឡាញ់គោរពសម្ដេចតា ចិត្តរបស់ខ្ញុំឃើញខ្ញុំសប្បាយចិត្តនឹងឃើញលោកនិមន្តមក មនុស្សច្រើន ដូចមនុស្សសាមគ្គីគ្នាអ៊ីចឹង ដូចសម្ដេចតាមានព្រះរាជឱង្ការចូលចិត្តបែបហ្នឹង។»
បុរសវ័យចំណាស់ម្នាក់ទៀតមកពីឃុំត្រពាំងជង ស្រុកបាកាន ខេត្តពោធិ៍សាត់ លោក គឹម ផែន មានប្រសាសន៍ថា លោកមានក្តីរីករាយណាស់នៅពេលឃើញពិធីនេះកើតឡើង ទោះបីមិនបានចូលរួមផ្ទាល់ក៏ដោយ៖ «ថ្ងៃនេះ គឺដ៏ឧដុង្គឧត្តមណាស់ គឺមហាកិត្តិយស ដែលប្រជាជនយើងទាំងអស់បានមកសម្ដែងនូវការគោរពចំពោះគុណបំណាច់ដ៏ ថ្លៃថ្លារបស់ព្រះបរមរតនកោដ្ឋ ដែលជាទីសក្ការៈគោរពស្រឡាញ់ស្មើជីវិត ដូច្នេះថ្ងៃបើទោះជាគ្មានការអញ្ជើញ ក៏ត្រូវតែមក ព្រោះជាថ្ងៃដ៏ឧដុង្គឧត្តមណាស់។»
ពិធីរាប់បាត្រ និងពិធីបង្សុកូលនៅថ្ងៃទីមួយ នៃពិធីបុណ្យបីថ្ងៃនេះ បានបញ្ចប់នៅមុនថ្ងៃត្រង់ ហើយចាប់ពីម៉ោង ៤រសៀលថ្ងៃដដែល មានរៀបចំពិធីតាំងសមាធិនៅមុខព្រះបរមរាជវាំង និងពិធីផ្សេងៗទៀតក្នុងព្រះបរមរាជវាំង៕
No comments:
Post a Comment