ពលរដ្ឋ ប្រតិកម្ម នឹងកាដាក់ បម្រាម របស់ ក្រសួង
RFA | ១៨ កក្កដា ២០១៤
កម្លាំង សមត្ថកិច្ច ប៉ូលិស ពង្រាយ នៅមុខ សាលាដំបូង រាជធានី
ភ្នំពេញ ថ្ងៃដែលតុលាការ សាកសួរ តំណាងរាស្ត្រ គណបក្ស សង្គ្រោះជាតិ
៥នាក់ កាលពីថ្ងៃ ទី១៧ ខែកក្កដា ឆ្នាំ២០១៤។ RFA/Mom Sophon
ពលរដ្ឋ ជាសកម្មជន ដីធ្លី និងមន្ត្រី សង្គមស៊ីវិល ប្រតិកម្ម ចំពោះ ការដាក់បម្រាម ពីក្រសួងមហាផ្ទៃ ទៅមន្ត្រី ក្រោមឱវាទ គ្រប់ខេត្ត-ក្រុង ទាំងអស់ ឲ្យរឹតបន្តឹង កុំ ឲ្យមានការ ជួបជុំគ្នា ធ្វើបាតុកម្ម,កូដកម្ម, និងការតវ៉ា ទាមទារនានា ដោយគ្មាន ការអនុញ្ញាត ពីអាជ្ញាធរ មូលដ្ឋាន។ ពួកគាត់ បានហៅ បម្រាមនេះ ថា ជាកាត់ផ្តាច់ សិទ្ធិសេរីភាព ពួកគាត់ ចេញពីសង្គម ប្រជាធិបតេយ្យ។
មេដឹកនាំ សហជីពកម្មករ និងប្រជាពលរដ្ឋដែលកំពុងមានទំនាស់ដីធ្លី បង្ហាញជំហរថា ពួកគេនឹងមិនគោរពទៅតាមបទបញ្ជារបស់អាជ្ញាធរមូលដ្ឋាន ដែលអនុវត្តទៅតាមការចង្អុលបង្ហាញពីក្រសួងមហាផ្ទៃ ហាមមិនឲ្យជួបជុំតវ៉ានោះ។
ក្រុមនេះថា ការស្រែកឃ្លានយុត្តិធម៌ គេចចេញពីការគាបសង្កត់រំលោភយកដីធ្លីពួកគាត់ គឺជាកត្តាសំខាន់ជាងការដាក់បម្រាម គំរាមចាប់ចងពលរដ្ឋដាក់គុកដោយគ្មានរកដំណោះស្រាយទៅទៀត។
ក្រសួងមហាផ្ទៃ កាលពីល្ងាចថ្ងៃទី១៦ កក្កដា បានចេញលិខិតមួយបញ្ជាទៅអភិបាលរាជធានីខេត្ត ដោយស្នើឲ្យចាត់វិធានការស្របតាមគោលការណ៍ច្បាប់ ដើម្បីទប់ស្កាត់សកម្មភាពញុះញង់អុជអាល បង្កឲ្យមានអំពើហិង្សា ដែលជ្រកក្រោមរូបភាពនៃការប្រមូលផ្តុំធ្វើបាតុកម្ម កូដកម្ម និងការទាមទារតវ៉ានានា ដើម្បីប៉ុនប៉ងបង្កឲ្យមានអស្ថិរភាពនយោបាយ និងប៉ះពាល់ដល់សន្តិសុខសណ្ដាប់ធ្នាប់របៀបរៀបរយក្នុងសង្គម។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា និងប្រធានសហភាពការងារកម្ពុជា លោក អាត់ ធន់។ លោកមានប្រសាសន៍ថា សារាចរណែនាំ ឬសេចក្តីបង្គាប់នេះ ធ្វើឡើងផ្ទុយនឹងច្បាប់រដ្ឋធម្មនុញ្ញ និងច្បាប់បាតុកម្ម កូដកម្មដោយសន្តិវិធី។ លោកបន្តថា កន្លងមកកម្មករ និងសកម្មភាពតវ៉ារបស់ប្រជាពលរដ្ឋ ធ្វើឡើងស្របច្បាប់អហិង្សា ដើម្បីស្វែងរកដំណោះស្រាយ ប៉ុន្តែភាគីពាក់ព័ន្ធមិនបានផ្តល់នូវយុត្តិធម៌ទេក្នុងការដោះស្រាយ នោះ ផ្ទុយទៅវិញ ពួកគាត់ភាគច្រើនត្រូវទទួលរងនូវការចោទប្រកាន់ត្រឡប់មកវិញ ព្រមទាំងបិទសិទ្ធិមិនឲ្យតវ៉ា ដោយប្រើកម្លាំងសមត្ថកិច្ចបង្ក្រាបរាល់ការតវ៉ាទាំងនោះថែមទៀត។
លោកបន្តថា ជាការប្រសើរ រដ្ឋាភិបាលគួរតែបង្កើនជម្រើសដោះស្រាយឲ្យចំសាច់រឿង ឬឲ្យចំគោលដៅ ប្រសើរជាជាងការបង្កើនការទប់ស្កាត់ជាទូទៅ។
ចំណែកសកម្មជនដីធ្លីនៅតំបន់បឹងកក់ លោកស្រី យ៉ោម បុប្ផា វិញមើលឃើញថា ទង្វើបែបនេះរបស់រដ្ឋាភិបាលបង្ហាញថា កម្ពុជា កំពុងតែរឹតត្បិតសេរីភាពក្នុងការជួបជុំតស៊ូមតិ ដើម្បីស្វែងរកយុត្តិធម៌ដែលពលរដ្ឋកំពុងជួបប្រទះយ៉ាងធ្ងន់ធ្ងរ។
លោកស្រីបន្តថា ពួកគាត់មិនចាប់អារម្មណ៍នឹងបម្រាមទាំងអស់នោះទេ ពីព្រោះបម្រាមបែបនេះមិនមែនជាលើកទីមួយទេ គឺកើតមានតាំងពីក្រោយពេលបោះឆ្នោតរួច តាំងពីបិទទីលានប្រជាធិបតេយ្យ រហូតមិនឲ្យពលរដ្ឋជួបជុំគ្នាចាប់ពី ១០នាក់ឡើងទៅ។
យ៉ាងណាក៏ដោយចុះ មន្ត្រីនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍នៅថ្ងៃទី១៧ កក្កដា ថា អាជ្ញាធរតាមមូលដ្ឋាននីមួយៗ នឹងអនុវត្តតាមការណែនាំរបស់រដ្ឋាភិបាល ដើម្បីថែរក្សាការពារសន្តិភាព ស្ថិរភាពសង្គម និងសន្តិសុខសណ្ដាប់ធ្នាប់សាធារណៈក្នុងសង្គម។
លោកបញ្ជាក់ថា ការប្រមូលផ្តុំធ្វើបាតុកម្ម កូដកម្ម តវ៉ាទាំងអស់ ត្រូវតែមានការស្នើសុំ និងមានការអនុញ្ញាតជាមុន ទើបអាចធ្វើទៅបាន។
ទាក់ទងនឹងបម្រាមនេះដែរ មន្ត្រីជាន់ខ្ពស់នៃអង្គការលីកាដូ (Licadho) លោក អំ សំអាត មានប្រសាសន៍ថា ការលើកឡើងរបស់មន្ត្រីសាលាក្រុងបែបនេះ គឺផ្ទុយពីច្បាប់បាតុកម្ម កូដកម្មដោយសន្តិវិធី។
លោកបន្តថា បើអាជ្ញាធរអនុវត្តដូច្នេះមែននោះ សិទ្ធិសេរីភាពក្នុងការតស៊ូមតិរបស់ពលរដ្ឋ នឹងត្រូវកាត់ផ្តាច់ទាំងស្រុងតែម្តង ហើយពេលនោះប្រទេសកម្ពុជា លែងជាប្រទេសប្រជាធិបតេយ្យទៀតហើយ។
ការដាក់បម្រាមមិនឲ្យជួបជុំតវ៉ា ឬសម្ដែងមតិជាថ្មីទៀតនេះ ក្រោយផ្ទុះអំពើហិង្សានៅក្បែរទីលានប្រជាធិបតេយ្យ រវាងក្រុមសន្តិសុខសាលាខណ្ឌដូនពេញ ជាមួយប្រជាពលរដ្ឋ និងសកម្មជនគណបក្សសង្គ្រោះជាតិ ដែលទាមទារឲ្យដោះលែងទីលានប្រជាធិបតេយ្យឡើងវិញ កាលពីព្រឹកថ្ងៃទី១៥ កក្កដា កន្លងទៅនេះ៕
No comments:
Post a Comment