តំបន់ទេសចរណ៍ធម្មជាតិបឹងទន្លេសាប (រូបថត៖ បូ សាវី)
ភ្ញៀវទេសចរខ្មែរ រិះគន់ ក្រុមហ៊ុន ស៊ូជីង យកលុយ ថ្លៃទស្សនា តំបន់បឹងទន្លេសាប
ដោយ៖ បូ សាវី / វីអូឌី | ថ្ងៃអាទិត្យ ទី13 កក្កដា 2014
ភ្ញៀវទេសចរ ដែលទៅទស្សនា បឹងទន្លេសាប ខេត្ដសៀមរាប ប្រតិកម្ម ចំពោះ ក្រុមហ៊ុនស៊ូជីង ដែលថា ក្រុមហ៊ុននេះ យកលុយ ថ្លៃចូលទស្សនា ពីពលរដ្ឋខ្មែរ ម្នាក់ មួយដុល្លារ ខុសពីពេលមុនដែលមិនតម្រូវ ឲ្យពលរដ្ឋខ្មែរ បង់លុយទេ។
លោក ហេង ចៅសាយ ជាអ្នកទៅកំសាន្ដ នៅតំបន់នោះប្រាប់ VOD នៅព្រឹកថ្ងៃនេះ ថា ក្រុមហ៊ុនស៊ូជីង ដែលអភិវឌ្ឍន៍ នៅតំបន់ទេសចរណ៍ធម្មជាតិ សង្កាត់ចុងឃ្នៀសនោះ តម្រូវឲ្យពលរដ្ឋខ្មែរដែលចូលទស្សនា បឹងទន្លេសាប បង់ប្រាក់ ក្នុងម្នាក់ មួយដុល្លារ (ស្មើ៤ពាន់រៀល) ហើយនៅក្នុងសំបុត្រនោះ មិនបានដាក់ចំនួន ទឹកប្រាក់ ត្រឹមត្រូវ នោះឡើយ។ លោក ថា កន្លងមក នៅតំបន់ទេសចរណ៍ បឹងទន្លេសាបនោះ លក់សំបុត្រ ឲ្យតែភ្ញៀវទេសចរណ៍ បរទេស ប៉ុណ្ណោះ ហើយពលរដ្ឋខ្មែរ មិនតម្រូវឲ្យយកលុយនោះទេ "កាលពីមុន គេយក តែភ្ញៀវបរទេសទេ ម្នាក់៣ដុល្លា ឥឡូវហ្នឹង ខ្មែរយើង ក៍យកដែរ យកម្នាក់ មួយដុល្លា ខ្ញុំមិនយល់ព្រម ឲ្យធ្វើអញ្ចឹងទេ ជនជាតិខ្មែរយើងជាម្ចាស់ប្រទេស មានសិទ្ធិដើរ ហើរគ្រប់កន្លែងទាំងអស់ អត់មាន ឲ្យអ្នកឯង មានសិទ្ធិ បង្កើតក្រុមហ៊ុន នៅកន្លែងហ្នឹង យកលុយពីប្រជាពលរដ្ឋ នោះទេ អត់មានទេ។"
ពលរដ្ឋម្នាក់ទៀតសុំមិនបង្ហាញឈ្មោះ ថ្លែងឲ្យដឹងស្រដៀងគ្នាថា ក្រុមហ៊ុនស៊ូជីងនេះ បានបង្ខំឲ្យពលរដ្ឋខ្មែរបង់លុយថ្លៃចូលទស្សនាបឹងទន្លេសាបមានរយៈពេល១ឆ្នាំមកហើយ។ លោកបន្តថា ក្រុមហ៊ុនស៊ូជីង ដែលអភិវឌ្ឍន៍នៅតំបន់នោះ មិនបានផ្ដល់ប្រយោជន៍ដល់ពលរដ្ឋខ្មែរឡើយ មានតែឲ្យជនវៀតណាម និងក្រុមហ៊ុនដែលគ្រប់គ្រងផ្តាច់មុខនៅទីនោះ "អញ្ចឹងរដ្ឋាភិបាលត្រូវគិតគូរឡើងវិញ ព្រោះថា តំបន់ទេសចរណ៍នេះជារបស់ខ្មែរ សំរាប់ពលរដ្ឋខ្មែរ អញ្ចឹងត្រូវផ្ដល់ផលប្រយោជន៍ឲ្យពលរដ្ឋខ្មែរដែលរស់នៅតំបន់នេះ មិនមែនសំរាប់ផ្ដល់ផលប្រយោជន៍ឲ្យក្រុមហ៊ុននិងឲ្យជនជាតិវៀតណាមដែលរស់នៅប៉ុន្មានភូមិនៅតំបន់ចុងឃ្នៀសប៉ុណ្នោះនោះទេ។ រដ្ឋាភិបាល ជាពិសេសអាជ្ញាធរខេត្ដសៀមរាប ត្រូវចាត់វិធានដល់ប្រជាពលរដ្ឋដែលរស់នៅតំបន់នេះ។"
ករណីនេះ អ្នកគ្រប់គ្រងក្រុមហ៊ុនស៊ូជីង នៅសង្កាត់ចុងឃ្នៀស ក្រុងសៀមរាប លោក វ៉ា ឈូដា បដិសេធថា ក្រុមហ៊ុនមិនតម្រូវឲ្យភ្ញៀវខ្មែរបង់លុយចូលទស្សនាបឹងទន្លេសាបនោះទេ ហើយក៍មិនបានប្រើសិទ្ធិអំណាចគំរាមពលរដ្ឋដែរ "អាហ្នឹងអ្នកដែលប្រខូច ពួកហ្នឹងចេះតែចាក់ចុចគ្នា តាមពិតពួកវាដណ្ដើមគ្នា ពួកទីផ្សារដណ្ដើមគ្នាធ្វើទីផ្សារវាចេះតែថា។ យើងវាពិបាក ពេលខ្លះ ពួក តុក តុក វាចេះតែធ្វើទារទឹកតែអញ្ចឹង វាចេះតែឆ្លើយមកលើក្រុមហ៊ុន ហើយក៏មិនបានគំរាមពលរដ្ឋមិនឲ្យលក់ដូរដែរ។"
តំបន់ទេសចរណ៍ធម្មជាតិបឹងទន្លេសាប ស្ថិតនៅសង្កាត់ចុងឃ្នៀស ដែលមានចម្ងាយប្រមាណជាង១០គីឡូម៉ែត្រពីក្រុងសៀមរាប។ តំបន់ទេសចរណ៍លើផ្ទៃទឹកមួយនេះ ក្នុងមួយឆ្នាំៗ មានភ្ញៀវទេសចររាប់លានទៅកំសាន្ដ ដែលមានកន្លែងជាទីគយគន់ដូចជា ថ្ងៃលិចលើផ្ទៃទឹក និងទស្សនា សត្វស្លាបរាប់លានក្បាលជាដើម។
No comments:
Post a Comment