បឹងដែលឧទ្ធម្ភាគចក្រធ្លាក់(រូបភាពពីហ្វេសប៊ុក)
លោក ទៀ បាញ់ មិនទាន់ អាចបញ្ជាក់ ពីមូលហេតុ នៃការធ្លាក់ ឧទ្ធម្ភាគចក្រ បណ្តាលឲ្យ មនុស្ស៥នាក់ ស្លាប់
ដោយ៖ ស៊ុន ណារិន / វីអូឌី | ថ្ងៃចន្ទ ទី14 កក្កដា 2014
រដ្ឋមន្ត្រី ក្រសួង ការពារជាតិ លោក ទៀ បាញ់ បញ្ជាក់ថា ឧទ្ធម្ភាគចក្រយោធា មួយគ្រឿង បានធ្លាក់ នៅព្រឹកថ្ងៃចន្ទនេះ បណ្តាលឲ្យ មនុស្ស៥នាក់ ស្លាប់ តែមិនទាន់ អាចបញ្ជាក់ ពីមូលហេតុ នៃការធ្លាក់ បាននៅឡើយទេ។
លោក ទៀ បាញ់ ប្រាប់ VOD ថា លោក កំពុងតែបញ្ជាកម្លាំង ចុះទៅជួយសង្គ្រោះ តែបញ្ជាក់ថា មនុស្ស៥នាក់ ស្លាប់។ លោក ថា ឧទ្ធម្ភាគចក្រ ដែលធ្លាក់នោះ ជា របស់ប្រទេសចិន ហើយទុកសម្រាប់ ហ្វឹកហ្វឺន យោធា ៩០៤។ លោក មិនទាន់អាចបញ្ជាក់ ពីមូលហេតុ នៃការធ្លាក់ឧទ្ធម្ភាចក្រនោះ នៅឡើយទេ។
លោក អ៊ុល សំអុល នាយប៉ុស្តិ៍នគរបាល សង្កាត់ព្រៃស ប្រាប់ VOD ថា ឧទ្ធម្ភាគចក្រ ១គ្រឿង បានធ្លាក់ ក្នុងភូមិព្រៃស សង្កាត់ព្រៃស ខណ្ឌដង្កោ ដែលបណ្តាលឲ្យ មនុស្ស៥នាក់ ស្លាប់ និង១នាក់ រងរបួស បញ្ជូនទៅមន្ទីរពេទ្យ។ លោក បន្តថា ឧទ្ធម្ភាគចក្រនោះ ត្រូវបានប្រើប្រាស់ ដើម្បី ហ្វឹកហាត់ទាហាន ពីរបីថ្ងៃ មកហើយ។
សេចក្តីរាយការណ៍ដំបូង ឲ្យដឹងថា ក្នុងចំណោម យានិក៥ រូប ដែលស្លាប់នោះ មាននាយទាហានជាន់ខ្ពស់មួយរូប គឺ មេបញ្ជាការ កងឧទ្ធម្ភាគចក្រ និង ស្នងការរង បច្ចេកទេស ១រូប៕
No comments:
Post a Comment