មនុស្ស យ៉ាងតិច ១០នាក់ របួស ខណៈប៉ះទង្គិច នៅមុខស្ថានទូត វៀតណាម
ដោយ៖ ណាត សុភាព / វីអូឌី | ថ្ងៃអង្គារ ទី8 កក្កដា 2014
មនុស្ស យ៉ាងហោចណាស់ ១០នាក់ រងរបួស នៅគ្រាប៉ះទង្គិច ដោយហិង្សា រវាង ក្រុមសមត្ថកិច្ច និងក្រុមពលរដ្ឋខ្មែរ ដែលទៅដាក់ញត្តិ នៅស្ថានទូត វៀតណាម នៅព្រឹកថ្ងៃអង្គារនេះ ដើម្បីឲ្យ សុំទោស ចំពោះសម្តី របស់ អ្នកនាំពាក្យ ស្ថានទូតនេះ ដែលថា ទឹកកម្ពុជាក្រោម ជា របស់ខ្លួនតាំងពី យូរណាស់ មកហើយ។
សាក្សី បានអះអាង ប្រាប់អ្នកសារព័ត៌មាន នៅកន្លែង តវ៉ានោះ ថា ក្រុមកងសន្តិសុខ ខណ្ឌចំការមន បានដេញវាយ លើក្រុមយុវជន និងបេក្ខជនជាប់ឆ្នោត តំណាងរាស្ត្រ គណបក្ស សង្គ្រោះជាតិ លោក ម៉ែន សុថាវរិន្ទ្រ ដែលមានដើមកំណើត ជាខ្មែរកម្ពុជាក្រោម រួមទាំងព្រះសង្ឃ ជាច្រើនអង្គ ដែលព្យាយាម ចូលរួមតវ៉ា នៅលើកំណាត់ផ្លូវ ព្រះមុនីវង្ស។
អនុប្រធានផ្នែកសិទ្ធិមនុស្សនៃសមាគម អាដហុក លោក ណៃ វ៉ង់ដា ដែលតាមដានករណីនេះថ្លែងថា ការរារាំងពីសំណាក់អាជ្ញាធរទៅលើក្រុមបាតុករ ដែលយកញតិ្តដាក់នៅស្ថានទូតវៀតណាមនោះ ហើយបង្កឲ្យមានហិង្សាបែបនេះ គឺមិនមានផលចំណេញដល់រដ្ឋាភិបាលនិងប្រជាជនខ្មែរទេ។
VOD មិនអាចសុំការបំភ្លឺពីអ្នកនាំពាក្យក្រសួងមហាផ្ទៃ លោក ខៀវ សុភ័គ បានទេ នៅថ្ងៃអង្គារនេះ។
ព្រះតេជគុណ យី តារា គង់នៅវត្តសាមគ្គីរង្សី ក្នុងរាជធានីភ្នំពេញ មានថេរដីកាថា កងប្រដាប់អាវុធ កាន់កាំភ្លើង ដំបងឆក់ និងខែល ប្រមាណ៤០០នាក់ បានឡោមព័ទ្ធ ដើម្បីរារាំងព្រះសង្ឃ សិស្ស និស្សិត និងពុទ្ធបរិស័ទ មិនឲ្យទៅចូលរួមបាតុកម្មជាមួយសហព័ន្ធនិស្សិតបញ្ញវន្តកម្ពុជា នៅមុខស្ថានទូតវៀតណាមនោះទេ។
ការតវ៉ាដែលដឹកនាំដោយលោក ម៉ៅ ពិសេស សហព័ន្ធនិស្សិតបញ្ញវន្តកម្ពុជានេះ ដោយសារតែមន្ត្រីនាំពាក្យស្ថានទូតវៀតណាមប្រចាំកម្ពុជា លោក ត្រឹង វ៉ានថុង បានអះអាងប្រាប់សារព័ត៌មានក្នុងស្រុកថា «បារាំងមិនបានកាត់ទឹកដីខ្មែរ កម្ពុជាក្រោមឲ្យវៀតណាមទេ គឺកម្ពុជាក្រោម ជាទឹកដីរបស់វៀតណាម តាំងពីយូរយារណាស់មកហើយ»។
ប៉ុន្តែតាមឯកសារប្រវត្តិសាស្ត្របញ្ជាក់ថា កាលថ្ងៃទី០៤ ខែមិថុនា ឆ្នាំ១៩៤៩ អាណានិគមនិយមបារាំង បានអនុម័តច្បាប់មួយ ដោយសម្រេចកាត់ទឹកដីខ្មែរកម្ពុជាក្រោម ចំនួន២១ខេត្តក្រុង ទៅឲ្យវៀតណាមត្រួតត្រា ដោយមិនបានសួរមតិប្រជាពលរដ្ឋខ្មែរជាម្ចាស់ស្រុក ឬថ្នាក់ដឹកនាំនៃកម្ពុជា នាសម័យនោះឡើយ៕
No comments:
Post a Comment