បក្សសង្គ្រោះជាតិ ព្រមចូលសភា ជាមួយ បក្សប្រជាជន
RFA | ២២ កក្កដា ២០១៤
ប្រធាន គណបក្ស សង្គ្រោះជាតិ លោក សម រង្ស៊ី (ឆ្វេង)
ចាប់ដៃ ជាមួយ លោកនាយករដ្ឋមន្ត្រី ហ៊ុន សែន
ក្រោយជំនួប ចរចា នាវិមាន ព្រឹទ្ធសភា នៅថ្ងៃ ទី២២ កក្កដា ២០១៤។ RFA/Tin Zakariya
គណបក្ស ទាំងពីរ បានបញ្ចប់ បញ្ហាជម្លោះ នយោបាយហើយ នៅថ្ងៃ ទី២២ កក្កដា នេះ បន្ទាប់ ពីអូសបន្លាយពេល ជិត១ឆ្នាំ កន្លងមក។ ការព្រមព្រៀងគ្នា រវាង ថ្នាក់ដឹកនាំ កំពូល ក្នុងការចរចានេះ នៅបន្ទាប់ បេក្ខជន តំណាងរាស្ត្រ ជាប់ឆ្នោត គណបក្ស សង្គ្រោះជាតិ ចំនួន ៧នាក់ និងសកម្មជន មួយរូបទៀត ត្រូវ តុលាការ ចាប់ខ្លួន ដាក់ពន្ធនាគារ។
អ្នកវិភាគលើកឡើងថា ការចរចាត្រូវរ៉ូវគ្នានៅពេលនេះ គ្រាន់តែបានបញ្ចប់នៃភាពតានតឹងផ្នែកនយោបាយក្នុងរយៈពេលបច្ចុប្បន្ន ប៉ុណ្ណោះ តែការដោះស្រាយពីបញ្ហាសង្គម និងការកែទម្រង់គណៈកម្មាធិការជាតិរៀបចំការបោះឆ្នោត (គ.ជ.ប) ឲ្យឯករាជ្យពិតប្រាកដនោះ នឹងមិនមាននោះឡើយ។
សេចក្តីថ្លែងការណ៍រួមមាន ៧ចំណុច បានចេញផ្សាយជាសាធារណៈ ក្រោយពេលអ្នកដឹកនាំគណបក្សឈ្នះឆ្នោតទាំងពីរ បានជួបចរចាគ្នាជាង ៥ម៉ោង បង្ហាញថា គណបក្សទាំងពីរយល់ព្រមចូលធ្វើការជាមួយគ្នានៅក្នុងរដ្ឋសភា ដើម្បីដោះស្រាយបញ្ហានានា និងមានការបែងចែកតួនាទីឲ្យគណបក្សប្រឆាំងនៅក្នុងរដ្ឋសភាផង។
មេដឹកនាំកំពូលគណបក្សទាំងពីរ លោកនាយករដ្ឋមន្ត្រី ហ៊ុន សែន និង លោក សម រង្ស៊ី មិនបានថ្លែងអ្វីទៅកាន់អ្នកសារព័ត៌មាននៅក្រៅបន្ទប់ចរចា ដែលប្រើពេលជាង ៥ម៉ោងនាព្រឹទ្ធសភា នៅថ្ងៃទី២២ កក្កដា នេះទេ។
មេដឹកនាំកំពូលទាំងពីរ ឲ្យសួរទៅអ្នកនាំពាក្យគណបក្ស ដែលធ្វើសន្និសីទសារព័ត៌មានសម្រាប់ឲ្យអ្នកសារព័ត៌មានសួរអំពីលទ្ធផល នៃការចរចានេះ។ លោកនាយករដ្ឋមន្ត្រី ហ៊ុន សែន គ្រាន់តែឆ្លើយយ៉ាងខ្លីថា ការចរចាទទួលបានជោគជ័យហើយ ក្នុងទឹកមុខញញឹមមុននឹងដើរចូលឡាន។ លើសពីនេះទៀត លោក ហ៊ុន សែន ថែមទាំងឲ្យអ្នកសារព័ត៌មានជួយទះដៃអបអរ ចំពោះលទ្ធផលចរចាជោគជ័យទៀតផង។
នៅក្នុងការចរចាមានរយៈពេលជាង ៥ម៉ោងនេះ លទ្ធផលនៃការចរចា គឺគណបក្សសង្គ្រោះជាតិ យល់ព្រមចូលសភា។ ថ្នាក់ដឹកនាំកំពូលនៃគណបក្សទាំងពីរ នឹងចូលគាល់ព្រះមហាក្សត្រនៅថ្ងៃទី២៤ កក្កដា ដើម្បីថ្វាយអំពីលទ្ធផលនៃការចរចានេះ បន្ទាប់មកបេក្ខជនតំណាងរាស្ត្រជាប់ឆ្នោតរបស់គណបក្សសង្គ្រោះជាតិ ទាំង ៥៥រូប នឹងចូលស្បថនៅក្នុងព្រះបរមរាជវាំង។
លោក អេង ឆៃអ៊ាង មន្ត្រីគណបក្សសង្គ្រោះជាតិ បញ្ជាក់ថា ដោយសារគោលការណ៍គណបក្សដាក់ឲ្យ លោក កឹម សុខា ជាអនុប្រធានគណបក្ស នឹងធ្វើជាប្រធានរដ្ឋសភានៅពេលឈ្នះឆ្នោតនោះ ដូច្នេះ លោក កឹម សុខា នឹងធ្វើជាអនុប្រធានទី១ នៃរដ្ឋសភា បន្ទាប់ពីបានចូលស្បថនៅក្នុងព្រះបរមរាជវាំងក្នុងពេលឆាប់ៗនេះ។
ចំពោះ លោក សម រង្ស៊ី វិញ ដែលលោកមិនមានឈ្មោះឈរជាបេក្ខជនតំណាងរាស្ត្រនៅក្នុងបញ្ជីបោះ ឆ្នោត កាលពីថ្ងៃទី២៨ កក្កដា នោះ នៅក្នុងការចរចានេះ មិនបានបញ្ជាក់ថា លោកនឹងទទួលបានតួនាទីអ្វីនៅឡើយ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា ករណី លោក សម រង្ស៊ី នេះ មិនមែនយកតួនាទីជារឿងសំខាន់នោះទេ គឺគណបក្សសង្គ្រោះជាតិ គិតសំខាន់ទៅលើបញ្ហាប្រទេសជាតិជាកត្តាចម្បង។
កិច្ចព្រមព្រៀងបន្ទាប់ពីចរចារវាងគណបក្សទាំងពីរនោះ មានចំនួន ៧ប្រការសំខាន់ៗ ក្នុងនោះរួមមាន សមាសភាពគណៈកម្មាធិការជាតិរៀបចំការបោះឆ្នោត មាន ៩រូប ក្នុងនោះ ៤រូបជ្រើសរើសដោយគណបក្សប្រជាជនកម្ពុជា និង ៤រូបផ្សេងទៀត ជ្រើសរើសដោយគណបក្សសង្គ្រោះជាតិ ហើយសមាសភាព១ទៀត គឺត្រូវជ្រើសរើសដោយមានការព្រមព្រៀងគ្នារវាងគណបក្សដែលមានអាសនៈ ក្នុងរដ្ឋសភា។ គណៈកម្មាធិការជាតិរៀបចំការបោះឆ្នោត មានថវិកាស្វយ័តសម្រាប់ដំណើរការ។ ក្នុងករណីដែលខកខានមិនបានរៀបចំសមាសភាពគណៈកម្មាធិការជាតិរៀបចំការ បោះឆ្នោត សមាសភាពគណៈកម្មាធិការជាតិរៀបចំការបោះឆ្នោត ដែលមានស្រាប់ ត្រូវបន្តការងាររបស់ខ្លួន និងមានសមត្ថកិច្ចដើម្បីចាត់ចែងរៀបចំការបោះឆ្នោតតាមច្បាប់។
ចំពោះការរៀបចំក្បាលម៉ាស៊ីនរដ្ឋសភាវិញ ការបែងចែកតួនាទីដឹកនាំនៅក្នុងគណៈកម្មាធិការអចិន្ត្រៃយ៍រដ្ឋសភា តាមរូបមន្ត ៧ ទល់ ៦ ដោយត្រូវបង្កើតបន្ថែមគណៈកម្មការជំនាញថ្មីមួយទៀត ហើយមានសមាសភាពប្រធានសភាមកពីគណបក្សប្រជាជនកម្ពុជា អនុប្រធានទី១មកពីគណបក្សសង្គ្រោះជាតិ និងអនុប្រធានសភាទី២ មកពីគណបក្សប្រជាជនកម្ពុជា។
គណៈកម្មការបង្កើតថ្មីជាគណៈកម្មការទី១០ មានឈ្មោះថា គណៈកម្មការអង្កេត បោសសម្អាត និងប្រឆាំងអំពើពុករលួយ ដោយបំបែកពីគណៈកម្មការទី៤ ហើយដូរឈ្មោះគណៈកម្មការទី៤ មកជាគណៈកម្មការមហាផ្ទៃ ការពារជាតិ និងមុខងារសាធារណៈ។
គណៈកម្មការដែលគណបក្សប្រជាជនកម្ពុជា ធ្វើជាប្រធាន និងធ្វើជាលេខាធិការ រួមមាន គណៈកម្មការទី២ គណៈកម្មការទី៤ គណៈកម្មការទី៥ គណៈកម្មការទី៦ និងគណៈកម្មការទី៩។ គណៈកម្មការដែលគណបក្សសង្គ្រោះជាតិ ធ្វើជាប្រធាន និងធ្វើជាលេខាធិការ រួមមាន គណៈកម្មការទី១ គណៈកម្មការទី៣ គណៈកម្មការទី៧ គណៈកម្មការទី៨ និងគណៈកម្មការទី១០។ គណៈកម្មការនីមួយៗមានសមាជិក ៩រូប ហើយគណៈកម្មការណាដែលគណបក្សណាធ្វើជាប្រធាន សមាជិកមកពីគណបក្សនោះមាន ៥រូប និងគណបក្សផ្សេងទៀត ៤រូប។ ចំពោះស្ថាប័នព្រឹទ្ធសភាវិញ គណបក្សទាំងពីរក៏ព្រមព្រៀងគ្នារៀបចំក្បាលម៉ាស៊ីនឡើងវិញដែរ។
ចំពោះកាលបរិច្ឆេទបោះឆ្នោតឃុំសង្កាត់ និងបោះឆ្នោតជាតិអាណត្តិទី៦ តំណាងគណបក្សប្រជាជនកម្ពុជា លោក ព្រុំ សុខា មានប្រសាសន៍ថា មិនមានការបោះឆ្នោតឡើងវិញ ចំពោះការបោះឆ្នោតអាណត្តិទី៥ តែគណបក្សទាំងពីរព្រមព្រៀងរៀបចំបញ្ជីឈ្មោះបោះឆ្នោតជាថ្មី និងរៀបចំការបោះឆ្នោតអាចថានៅមុនអាណត្តិសម្រាប់ការបោះឆ្នោត អាណត្តិទី៦ អាស្រ័យលើការរៀបចំបញ្ជីឈ្មោះឆ្នោតថ្មីរួចរាល់។
នៅក្នុងការចរចានេះ គណបក្សសង្គ្រោះជាតិ ក៏បានលើកពីការដោះលែងបេក្ខជនតំណាងរាស្ត្រជាប់ឆ្នោត ៧នាក់ និងសកម្មជនរបស់ខ្លួនម្នាក់ទៀតដែរ។ លោក ព្រុំ សុខា បញ្ជាក់ថា ការដោះលែងអាស្រ័យលើនីតិវិធីរបស់តុលាការ ដែលដោះលែងសមាជិកគណបក្សសង្គ្រោះជាតិ ទាំងនោះឲ្យនៅក្រៅឃុំជាបណ្ដោះអាសន្ន ទៅតាមសំណើរបស់មេធាវីរបស់ពួកគាត់។
\
នៅក្រោយពេលបញ្ចប់ការចរចាបិទទ្វាររយៈពេលជាច្រើនម៉ោងនេះ លោកនាយករដ្ឋមន្ត្រី ហ៊ុន សែន បានដើរចាប់ដៃមន្ត្រីគណបក្សសង្គ្រោះជាតិ ទាំង ៨រូបនោះនៅក្រៅបន្ទប់ចរចា។ ក្រោយមក មេដឹកនាំគណបក្សទាំងពីរបានបំបែកគ្នារៀងៗខ្លួន។
អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត កែម ឡី មានប្រសាសន៍ថា ជាលទ្ធផលនៃការចរចានេះឃើញថា គណបក្សទាំងពីរអាចបញ្ចប់ជម្លោះនយោបាយ និងធ្វើឲ្យភាពតានតឹងផ្នែកនយោបាយបន្ធូរបន្ថយវិញ។ លោក កែម ឡី បញ្ជាក់ថា ការចរចានេះ គណបក្សសង្គ្រោះជាតិ ងាកចេញពីការទាមទាររបស់ខ្លួនកន្លងមក ហើយក៏មិនធានាថា គ.ជ.ប នៅពេលខាងមុខឯករាជ្យនោះដែរ។
អ្នកវិភាគបានហៅការចរចានេះថា ជាការចរចាចាប់បង្ខំ ពីព្រោះកម្លាំងគណបក្សសង្គ្រោះជាតិ បានធ្លាក់ចុះនៅពេលសមាជិករបស់ខ្លួនត្រូវបានរដ្ឋាភិបាលចាប់ដាក់ ពន្ធនាគារ នៅក្នុងដំណើរការចរចានេះ។ ហើយលទ្ធផលនៃការចរចានេះ មិនធានាថា ឲ្យរដ្ឋាភិបាលដឹកនាំប្រទេសមានគុណភាព ប្រសិទ្ធភាព ក្នុងការដោះស្រាយវិបត្តិនោះឡើយ ពិសេសទៅលើការបោះឆ្នោតឲ្យមាននិយាមអន្តរជាតិ ស្របទៅតាមប្រទេសប្រជាធិបតេយ្យមួយចំនួននោះ មិនអាចទៅរួចនោះទេ។
រីឯទីលានប្រជាធិបតេយ្យវិញ លោក ព្រុំ សុខា លើកឡើងថា រដ្ឋាភិបាលនឹងបើកឡើងវិញនៅបន្ទាប់ពីបេក្ខជនតំណាងរាស្ត្រជាប់ ឆ្នោតគណបក្សសង្គ្រោះជាតិ ចូលស្បថក្នុងព្រះបរមរាជវាំង និងចូលប្រជុំសភានៅពេលឆាប់ៗខាងមុខនេះ៕
No comments:
Post a Comment