«ការត្រូវរ៉ូវគ្នា រវាង អ្នកនយោបាយ នឹងធ្វើ ឲ្យការអភិវឌ្ឍ សេដ្ឋកិច្ច កើនឡើង»
វិទ្យុ អាស៊ី សេរី | ២៣ កក្កដា ២០១៤
រដ្ឋមន្ត្រី ក្រសួង ពាណិជ្ជកម្ម លោក ស៊ុន ចាន់ថុល មានប្រសាសន៍ នៅវិមានសន្តិភាព នៅថ្ងៃ ទី១៨ ខែកុម្ភៈ ឆ្នាំ២០១៤។ RFA/An Sithav
រដ្ឋមន្ត្រី ក្រសួង ពាណិជ្ជកម្ម អះអាង នៅថ្ងៃ ទី២៣ កក្កដា ថា, ការចរចា ត្រូវរ៉ូវគ្នា រវាង អ្នកនយោបាយ គឺ ជាចំណុច ចាប់ផ្ដើម ថ្មីមួយ ក្នុងការអភិវឌ្ឍ សេដ្ឋកិច្ច ឡើងវិញ តាមរយៈ ការទាក់ទាញ អ្នកវិនិយោគ បរទេស និងការធ្វើ ពាណិជ្ជកម្ម អន្តរជាតិ។ ទោះបី ជាភាព ជាប់គាំង នយោបាយ បានដោះស្រាយ យ៉ាងណា ក៏ដោយ ក៏មាន ស្ថាប័ន ស្រាវជ្រាវ អន្តរជាតិ ជាច្រើន បានព្យាករ កំណើនសេដ្ឋកិច្ច ក្នុងឆ្នាំ២០១៤ នេះ ថា នឹងធ្លាក់ចុះ។
ភាពជាប់គាំង នយោបាយ កម្ពុជា បានអូសបន្លាយ អស់រយៈពេល ជិតមួយឆ្នាំ មកនេះ បានប៉ះពាល់ ដល់ការវិនិយោគ និងការចុះបញ្ជី ធ្វើអាជីវកម្ម នៅក្នុងប្រទេស កម្ពុជា។ តួលេខ របស់ ក្រសួងពាណិជ្ជកម្ម បានបង្ហាញ ថា, ការចុះបញ្ជី ពាណិជ្ជកម្មថ្មី បានធ្លាក់ចុះ ១២% នៅកំឡុង ក្នុងឆ្នាំ២០១៣។ ប៉ុន្តែ ថ្នាក់ដឹកនាំ ក្រសួង ពាណិជ្ជកម្ម កម្ពុជា សង្ឃឹមថា, ការចរចា រកដំណោះស្រាយ រវាង គណបក្ស នយោបាយ ដែលជាប់ឆ្នោត នៅពេលនេះ នឹងជំរុញ កំណើន នៃអាជីវកម្ម និងពាណិជ្ជកម្ម។
រដ្ឋមន្ត្រី ក្រសួង ពាណិជ្ជកម្ម លោក ស៊ុន ចាន់ថុល មានប្រសាសន៍ប្រាប់ វិទ្យុ អាស៊ី សេរី តាមទូរស័ព្ទ នៅថ្ងៃ ទី២៣ កក្កដា ថា, ការចង់បាន របស់ អ្នកវិនិយោគ បរទេស គឺ ស្ថិរភាព នយោបាយ។ ការមកអង្គុយ រកដំណោះស្រាយ រវាង អ្នកនយោបាយ គឺ ជាសញ្ញា ល្អមួយ សម្រាប់ វិស័យពាណិជ្ជកម្ម កម្ពុជា តាមរយៈ ការទាក់ទាញ អ្នកវិនិយោគ បរទេស។ នៅអំឡុងពេល ជាប់គាំង នយោបាយ មានអ្នកវិនិយោគ មួយចំនួន បានផ្អាក សកម្មភាព របស់គេ និងមួយចំនួនទៀត បានដក ការវិនិយោគ ចេញ ពីប្រទេស កម្ពុជា។
លោក ស៊ុន ចាន់ថុល មានប្រសាសន៍ បន្ថែមទៀត ថា, ទំហំ វិនិយោគ និងទំហំ នៃការនាំចេញ មិនទាន់អាច ប៉ាន់ស្មានបាន នៅឡើយ ព្រោះ វា ជាប់ទាក់ទង នឹងកត្តា ខាងក្រៅ។
បន្ថែមលើនេះ អគ្គនាយក សភា ពាណិជ្ជកម្ម លោកឧកញ៉ា ងួន ម៉េងតិច មានប្រសាសន៍ ថា, អំឡុងពេល ជាប់គាំង នយោបាយ ដែលអូសបន្លាយ អស់រយៈពេល ជិតមួយឆ្នាំ មិនបានប៉ះពាល់ ដល់វិស័យ ពាណិជ្ជកម្ម នាំចេញ និងនាំចូល របស់ កម្ពុជា ធ្ងន់ធ្ងរឡើយ។ ប៉ុន្តែ ស្ថិរភាព នយោបាយ នៅពេលនេះ ជាការលើកទឹកចិត្ត បន្ថែម ចំពោះ វិនិយោគិន និងពាណិជ្ជករ ក្នុងការបណ្ដាក់ ទុន នៅប្រទេស កម្ពុជា។
ទោះជាយ៉ាងណា ក៏ដោយ ភាពជាប់គាំង នយោបាយ កន្លងមក បានបណ្ដាល ឲ្យមាន មនុស្សស្លាប់, របួស, ការបំផ្លិចបំផ្លាញ ទ្រព្យសម្បត្តិ ក្រុមហ៊ុន ឬរោងចក្រ, និងការឡើងថ្លៃ ម្ហូបអាហារ។ តាមការប៉ាន់ស្មាន ដោយធនាគារ អភិវឌ្ឍ អាស៊ី បង្ហាញថា, ការខូចខាត ទ្រព្យសម្បត្តិ ក្រុមហ៊ុន មានចំនួន ជិត ១០០លាន ដុល្លារ អាមេរិក។
ម៉្យាងវិញទៀត ទោះបី អ្នកនយោបាយ បានត្រូវរ៉ូវគ្នា ក៏ដោយ ប៉ុន្តែ ការព្យាករ កំណើន សេដ្ឋកិច្ច កម្ពុជា នឹងថយចុះ មកត្រឹម ៧% នៅក្នុងឆ្នាំ ២០១៤, ហើយ កំណើន នៃការនាំចេញ សំលៀកបំពាក់ ក៏បាន ធ្លាក់ចុះ មកត្រឹម ៨.៧%។ កំណើន វិស័យ សេវាកម្ម ក៏ថយចុះ មកត្រឹម ៧% និងកំណើន វិស័យ កសិកម្ម បានថយចុះ មកត្រឹម ២%។ ដោយឡែក លំហូរ វិនិយោគផ្ទាល់ ពីបរទេស មានការធ្លាក់ចុះ បន្តិចបន្តួច បើ ធៀប នឹងឆ្នាំ២០១៣ សមាមាត្រ នឹងទំហំ ១.៣០០លាន ដុល្លារ អាមេរិក។
អ្នកវិភាគ សេដ្ឋកិច្ច បានលើកឡើង ថា, ឧបសគ្គ ចម្បង ដែលអ្នក នយោបាយ ទាំងពីរ ត្រូវ ដោះស្រាយ ឲ្យបាន បន្ទាប់ ពីត្រូវរ៉ូវគ្នា ហើយនោះ គឺ ការកាត់បន្ថយ គម្លាត អ្នកមាន និងអ្នកក្រ ឬការបែងចែក ផល ពីកំណើន សេដ្ឋកិច្ច ប្រកប ដោយស្មើភាពគ្នា៕
No comments:
Post a Comment