បក្សប្រឆាំង រំពឹង ថា, សមាជិក គ.ជ.ប. ទី៩ នឹងត្រូវ បានជ្រើសរើស មុនពេល ចូលស្បថ
វិទ្យុ អាស៊ី សេរី | ២៥ កក្កដា ២០១៤
លោក សម រង្ស៊ី និងលោក កឹម សុខា មេដឹកនាំ គណបក្ស សង្គ្រោះជាតិ
ជួបជាមួយ អ្នកគាំទ្រ ប្រមាណ ២ម៉ឺននាក់ នៅទីលាន ប្រជាធិបតេយ្យ
រាជធានីភ្នំពេញ កាលពីរសៀលថ្ងៃ ទី២៦ ខែសីហា ឆ្នាំ២០១៣។ Photo: RFA
ប្រធាន គណបក្ស សង្គ្រោះជាតិ រំពឹងថា នឹងមាន ការជួបពិភាក្សាគ្នា មួយទៀត ក្នុងពេល ឆាប់ៗនេះ រវាង គណបក្សលោក និងគណបក្ស ប្រជាជនកម្ពុជា ដើម្បី ជ្រើសរើស សមាជិក ទី៩ នៃគណៈកម្មាធិការ ជាតិ រៀបចំ ការបោះឆ្នោត (គ.ជ.ប.) ទៅតាម កិច្ចព្រមព្រៀង កាលពីថ្ងៃ ទី២២ ខែកក្កដា។ ការកំណត់ សមាជិក ទី៩ ត្រូវ ចាត់ទុកថា ជាចំណុចគន្លឹះ មួយ ក្នុងចំណោម ចំណុច មួយចំនួនទៀត ដែលជាលក្ខខណ្ឌ សម្រាប់ គណបក្សនេះ ក្នុងការស្បថ ចូលសភា។
គណបក្ស សង្គ្រោះជាតិ ពុំទាន់ កំណត់ថ្ងៃ ចូលធ្វើសច្ចា ប្រណិធាន នៅចំពោះ ព្រះភក្ត្រព្រះមហាក្សត្រ ឲ្យពិតប្រាកដ នៅឡើយ បើ ទោះជា ប្រធាន គណបក្ស សង្គ្រោះជាតិ លោក សម រង្ស៊ី ត្រូវបាន គណៈកម្មាធិការ ជាតិ រៀបចំ ការបោះឆ្នោត បានទទួលស្គាល់ ជាបេក្ខជន ជាប់ឆ្នោត តំណាងរាស្ត្រ មណ្ឌលកំពង់ចាម, ហើយ បើ ទោះជា រដ្ឋសភា ប្រកាសថា នឹងបើកសម័យប្រជុំ ពេញអង្គ នៅថ្ងៃ ទី២៨ កក្កដា ខាងមុខ ដើម្បី ប្រកាសសុពលភាពលោក សម រង្ស៊ី ជាសមាជិក រដ្ឋសភា ក៏ដោយ។
ប្រធាន គណបក្ស សង្គ្រោះជាតិ លោក សម រង្ស៊ី មានប្រសាសន៍ នៅថ្ងៃ ទី២៦ កក្កដា ថា, លោក នឹងទៅ រដ្ឋសភា នៅថ្ងៃ ទី២៨ ខែកក្កដា ខាងមុខ ដើម្បី ចូលរួម ក្នុងពិធីប្រកាស សុពលភាព រូបលោក ជាសមាជិក សភា មណ្ឌល កំពង់ចាម។ លោក ថា, ចំណែក រឿងចូលស្បថនោះ គឺ វា អាស្រ័យ ទៅលើ កិច្ចការ ដែលគណបក្ស ទាំង២ កំពុងធ្វើ, ថា តើ ធ្វើទាន់ ឬមិនទាន់ ឬក៏យ៉ាងណានោះ។
លោក សម រង្ស៊ី៖ «មានគណៈកម្មការ ៣ ដែលត្រូវ រៀបចំ វិសោធនកម្ម បទបញ្ជាផ្ទៃក្នុង រដ្ឋសភា, វិសោធនកម្ម ច្បាប់បោះឆ្នោត, វិសោធនកម្ម រដ្ឋធម្មនុញ្ញ តែម្ដង។ រដ្ឋធម្មនុញ្ញ នៅក្រោយគេ ពីព្រោះ ស្មុគស្មាញ, យូរ, ទាមទារ ពេលវេលា យូរ ជាងគេ។ ហើយ ការងារ មួយទៀត គឺ ឯកភាពគ្នា រវាង គណបក្ស ទាំង២ ក្នុងការជ្រើសរើស បេក្ខជន ដើម្បី ធ្វើជាសមាជិក ទី៩ នៃគណៈកម្មាធិការ ជាតិ រៀបចំ ការបោះឆ្នោត។»
ទោះជាយ៉ាងណាក៏ដោយ លោក សម រង្ស៊ី អះអាងថា ដំណើរការការងារកំពុងរលូនទៅមុខ ព្រោះលោកថា គណបក្សទាំង២ បានបង្ហាញសុឆន្ទៈសហការល្អ និងទុកចិត្តគ្នាទៅវិញទៅមក។ លោក សម រង្ស៊ី បន្ថែមថា គណបក្សសង្គ្រោះជាតិ និងគណបក្សប្រជាជនកម្ពុជា នឹងមានគម្រោងជួបពិភាក្សាគ្នាក្នុងពេលដ៏ខ្លីខាងមុខ ដើម្បីស្វែងរកការឯកភាពគ្នាទៅលើបេក្ខភាពសម្រាប់បេក្ខជនទី៩ នៃគណៈកម្មាធិការជាតិរៀបចំការបោះឆ្នោត។ លោក សម រង្ស៊ី ថ្លែងដោយជឿជាក់ថា គណបក្សទាំង២ នឹងមានការឯកភាពគ្នា ហើយនឹងមានការចូលស្បថជាមិនខាន។
ដោយឡែក មន្ត្រីជាន់ខ្ពស់គណបក្សប្រជាជនកម្ពុជា លោក ឈាង វុន មានប្រសាសន៍ថា លោកពុំទាន់ទទួលបានព័ត៌មាននេះនៅឡើយ។
ជុំវិញបញ្ហានេះដែរ អ្នកវិភាគនយោបាយឯករាជ្យលោកបណ្ឌិត សុខ ទូច មានប្រសាសន៍ថា ការទាមទាររបស់គណបក្សសង្គ្រោះជាតិ ឲ្យមានការឯកភាពទៅលើបេក្ខភាពទី៩ នៃគណៈកម្មាធិការជាតិរៀបចំការបោះឆ្នោតជាមុន មុននឹងចូលសភា គឺជាការត្រឹមត្រូវ និងជាការប្រុងប្រយ័ត្នទុកជាមុនរបស់បក្សប្រឆាំង។ លោកថា ការទាមទារនេះ មិនមែនជារឿងធ្ងន់ធ្ងរទេ ហើយវាអាចដោះស្រាយបាន ប្រសិនបើអ្នកនយោបាយមានឆន្ទៈ។
លោកបណ្ឌិត សុខ ទូច ក៏ជឿជាក់ថា គណបក្សប្រជាជនកម្ពុជា និងគណបក្សសង្គ្រោះជាតិ នឹងអាចស្វែងរកបេក្ខភាពមួយដែលពួកគេពេញចិត្តទាំងសង្ខាង៖ «អ្នក ណាជាតួអង្គទី៩ ហ្នឹង អ៊ីចឹងអាចគណបក្សសង្គ្រោះជាតិ គាត់លើកមួយមក គណបក្សប្រជាជនលើកបុគ្គលហ្នឹងមួយមក លើកហើយយល់ព្រមចរចាគ្នាឲ្យបានត្រឹមត្រូវជាមុន ព្រោះយើងបង្កើតគណៈកម្មការ៣ហ្នឹង គណៈកម្មការមួយសិក្សាពី គ.ជ.ប. ឲ្យយល់អាហ្នឹងសិន អាបទបញ្ជាផ្ទៃក្នុង វិសោធនកម្មរដ្ឋធម្មនុញ្ញជារឿងក្រោយទេ សំខាន់ណាស់ គ.ជ.ប នេះ ព្រោះ គ.ជ.ប នេះ គឺជាបញ្ហាជាប់ស្ទះដែលគ្រប់ភាគីគណបក្សដែលឈ្នះហើយ មិនដែលទទួលលទ្ធផល អ៊ីចឹងយើងត្រូវរៀបចំ គ.ជ.ប ហ្នឹង ឲ្យហើយសិន ហើយបេក្ខជនទី៩ គឺជាបេក្ខជនសំខាន។»
នៅក្នុងកិច្ចព្រមព្រៀងស្ដីពីដំណោះស្រាយនយោបាយរវាងគណបក្សប្រជាជន កម្ពុជា និងគណបក្សសង្គ្រោះជាតិ កាលពីថ្ងៃទី២២ កក្កដា គណបក្សទាំង២ បានឯកភាពគ្នាទៅលើសមភាពគណៈកម្មាធិការជាតិរៀបចំការបោះឆ្នោតមាន ចំនួន ៩រូប ក្នុងនោះសមាសភាព ៤រូប ជ្រើសរើសដោយគណបក្សប្រជាជនកម្ពុជា ៤រូប ដោយគណបក្សសង្គ្រោះជាតិ និង ១រូបទៀត ត្រូវជ្រើសរើសដោយមានការព្រមព្រៀងគ្នារវាងគណបក្សទាំង២។
តែទោះជាយ៉ាងណា គណបក្សទាំង២មិនបានកំណត់ពេលវេលាឲ្យច្បាស់លាស់ពីការជ្រើសរើស បេក្ខភាពសមាជិក គ.ជ.ប. ថាតើត្រូវធ្វើឡើងមុនបក្សប្រឆាំងចូលសភា ឬក្រោយពេលបក្សប្រឆាំងចូលសភាឡើយ។ កិច្ចព្រមព្រៀងក៏បញ្ជាក់ដែរថា ក្នុងករណីដែលខកខានមិនបានរៀបចំសមាសភាព គ.ជ.ប. ថ្មី សមាសភាព គ.ជ.ប ដែលមានស្រាប់ត្រូវបន្តការងាររបស់ខ្លួនបន្តទៀត។ ត្រង់ចំណុចនេះហើយដែលគណបក្សប្រជាជនកម្ពុជា ហាក់មានប្រៀបជាងគណបក្សសង្គ្រោះជាតិ។ និយាយបែបផ្សេង បាល់កំពុងតែស្ថិតនៅក្នុងជើងរបស់គណបក្សប្រជាជនកម្ពុជា៕
No comments:
Post a Comment