លោកស្រី Gabriela Knaul (ឆ្វេង) អ្នករាយការណ៍ពិសេស របស់អង្គការសហប្រជាជាតិ ទទួលបន្ទុកឯករាជ្យភាពនៃចៅក្រម និងមេធាវី (រូបថត៖ តាំង វីដា)
អ្នករាយការណ៍ពិសេស UN អំពាវនាវ ព្រះមហាក្សត្រ កុំ ឡាយព្រះហស្ថលេខា លើសេចក្តីព្រាងច្បាប់ តុលាការ
ដោយ៖ តាំង វីដា / វីអូឌី | ថ្ងៃអង្គារ ទី15 កក្កដា 2014
អ្នករាយការណ៍ពិសេស របស់ អង្គការ សហប្រជាជាតិ ទទួលបន្ទុក ឯករាជ្យភាព នៃចៅក្រម និងមេធាវី នៅថ្ងៃអង្គារនេះ អំពាវនាវ ដល់ព្រះមហាក្សត្រ កម្ពុជា លើកកម្ពស់ ឯករាជ្យភាព នៃប្រព័ន្ធតុលាការ ដោយពិចារណាជាថ្មី មុនឡាយព្រះហស្ថលេខា លើសេចក្តីព្រាងច្បាប់ ទាំង៣ នៃតុលាការ។
សេចក្តីព្រាងច្បាប់ ទាំងនោះ រួមមាន ច្បាប់ ស្តីពី ការរៀបចំ និងការប្រព្រឹត្តទៅ នៃឧត្តមក្រុមប្រឹក្សានៃអង្គចៅក្រម, ច្បាប់ ស្តីពី លក្ខន្តិកៈ នៃចៅក្រម និងព្រះរាជអាជ្ញា និងច្បាប់ ស្តីពី ការរៀបចំ និងការប្រព្រឹត្តទៅ នៃអង្គការ តុលាការ។
លោកស្រីបន្តថា ការមិនបានបែងចែកស្ថាប័នទាំងពីរនេះ ឲ្យដាច់ពីគ្នា គឺនាំឲ្យការអនុវត្តតួនាទីរបស់ចៅក្រម និងព្រះរាជអាជ្ញា មិនអាចដំណើរការប្រកបដោយឯករាជ្យភាព។
លោកស្រី Gabriela បារម្ភថា សេចក្តីព្រាងច្បាប់ទាំងនោះ អាចនឹងរឹតបន្តឹងលើសិទ្ធិរបស់ចៅក្រម និងព្រះរាជអាជ្ញា ចំពោះសេរីភាពនៃការបញ្ចេញមតិ និងកង្វះនៃការការពារសុវត្ថិភាពរបស់ស្ថាប័នតុលាការ ក្នុង ការជ្រើសរើស ការដកចេញ និងនីតិវិធីនៃការដាក់វិន័យលើចៅក្រមជាដើម។លោកស្រី ឲ្យដឹងថា លោកស្រី បានដាក់លិខិតស្នើឲ្យស្ថាប័នសភាពិចារណាជាថ្មីលើពង្រៀងច្បាប់ទាំងនេះ ហើយក៏ជំរុញឲ្យព្រះមហាក្សត្រ កុំឡាយព្រះហស្តលេខា លុះណាសេចក្តីព្រាងច្បាប់ មានការចូលរួមផ្តល់មតិយោបល់ពីគ្រប់ភាគីពាក់ព័ន្ធ។
អ្នកសម្របសម្រួលគម្រោងសង្កេតការណ៍សវនការនៃមជ្ឈមណ្ឌលសិទ្ធិមនុស្សកម្ពុជា លោក ឌុច ពិសិដ្ឋ ឲ្យដឹងដែរថា ក្រុមអង្គការសង្គមស៊ីវិល ក្រុមអ្នកវិនិយោគិន និងក្រុមប្រទេសជាម្ចាស់ជំនួយ មានក្តីព្រួយបារម្ភ បន្ទាប់ពីពិនិត្យលើសេចក្តីព្រាងច្បាប់ទាំងបីនេះ ដែលពួកគេយល់ថា មិនអាចធានាបាននូវឯករាជ្យដល់ស្ថាប័នតុលាការឡើយ។ លោកថា បើទោះបីជាសេចក្តីព្រាងច្បាប់នេះ បានចែងកំណត់ឲ្យចៅក្រម និងព្រះរាជអាជ្ញា ត្រូវប្រកាន់ដាច់ខាតនូវឥរិយាបថអព្យាក្រឹតក្នុងវិស័យនយោបាយក្តី តែកត្តានេះនៅតែមិនមានភាពច្បាស់លាស់ ដោយសារមិនមានការកំណត់ពីទណ្ឌកម្មជាក់លាក់ណាមួយ ប្រសិនជាចៅក្រម ឬព្រះរាជអាជ្ញា មានជាប់ពាក់ព័ន្ធនឹងសកម្មភាពនយោបាយ នាំឲ្យការអនុវត្តការងារ មិនមានឯករាជ្យភាព។
VOD មិនអាចសុំការឆ្លើយពីមន្ត្រីព្រះបរមរាជវាំង លោក អ៊ុំ ដារ៉ាវុធ ពាក់ព័ន្ធនឹងព្រះរាជតម្រិះរបស់ព្រះមហាក្សត្រលើការស្នើសុំនេះបាននៅឡើយទេ។ចំណែករដ្ឋសភា និងព្រឹទ្ធសភា ក៏មិនទាន់មានប្រតិកម្មអ្វីទាក់ទងនឹងសំណើរបស់សង្គមស៊ីវិលជាតិ និងអន្តរជាតិ ឲ្យមានការពិនិត្យលើសេចក្តីព្រាងច្បាប់ទាំងបីនេះ។
គួរបញ្ជាក់ថា សេចក្តីព្រាងច្បាប់នៃតុលាការទាំងបីនេះ ត្រូវបានអនុម័តដោយរដ្ឋសភាកម្ពុជា នៅខែឧសភា ឆ្នាំ២០១៤ ពិនិត្យ និងយល់ព្រមដោយព្រឹទ្ធសភានៅខែមិថុនា ឆ្នាំ២០១៤ និងត្រូវបានប្រកាសថា ស្របរដ្ឋធម្មនុញ្ញដោយក្រុមប្រឹក្សាធម្មនុញ្ញ នៅខែកក្កដា ឆ្នាំ២០១៤។ បច្ចុប្បន្ននេះ សេចក្តីព្រាងច្បាប់ស្ថិតក្នុងដំណាក់កាលចុងក្រោយនៃការត្រួតពិនិត្យ ហើយនឹងត្រូវឡាយព្រះហស្តលេខាប្រកាសឲ្យប្រើដោយព្រះមហាក្សត្រ ព្រះបាទនរោត្តម សីហមុនី៕
No comments:
Post a Comment