ប្រជាពលរដ្ឋ មានជម្លោះ ដីធ្លី ខេត្តក្រចេះ ចេញមុខតវ៉ា សុំអន្តរាគមន៍ ពីនាយករដ្ឋមន្ត្រី
VOD | ៥ សីហា ២០១៤
ប្រជាពលរដ្ឋមានជម្លោះដីធ្លីខេត្តក្រចេះ ចេញមុខតវ៉ាសុំអន្តរាគមន៍ពីនាយករដ្ឋមន្ត្រី(រូបថតដោយតាំង វីដា)
អ្នកភូមិ នៅស្រុកស្នួល ខេត្តក្រចេះ ប្រមាណ ១០០នាក់ នៅព្រឹក ថ្ងៃអង្គារនេះ ដង្ហែជាក្បួន តាមផ្លូវ ក្បែរសួន បទុមវត្តី ដើម្បី សុំអន្តរាគមន៍ ពីលោកនាយករដ្ឋមន្ត្រី ហ៊ុន សែន រឿងជម្លោះដីធ្លី។
នៅម៉ោង ជាង៨ និង៣០ នាទីនេះ ប្រជាពលរដ្ឋ បានដើរកាន់ បដា ឆ្ពោះទៅកាន់ផ្ទះ នាយករដ្ឋមន្ត្រី ក្បែរវិមាន ឯករាជ្យ, តែ សមត្ថកិច្ចរាប់រាយនាក់ បានឈរយាម កាមនៅទីនោះ និងឃាត់ មិនឲ្យ ធ្វើដំណើរ តទៀត ត្រង់ចំណុច ក្បែរនាគ បាញ់ទឹក។ អាជ្ញាធរ បានហៅ តំណាង ប្រជាពលរដ្ឋ ឲ្យចូលជួប ដើម្បី ដាក់ញត្តិ, តែ ប្រជាពលរដ្ឋ មិនទាន់ សម្រេច យ៉ាងណា នៅឡើយទេ។
ប្រជាពលរដ្ឋ សុំអន្តរាគមន៍ ពីលោក នាយករដ្ឋមន្ត្រី ដើម្បី ឲ្យអាជ្ញាធរ ពាក់ព័ន្ធ ពន្លឿន ធ្វើប័ណ្ណកម្ម សិទ្ធិដី ដល់ពួកគាត់ ៣៨០គ្រួសារ ដែលមាន ទំហំដី ប្រមាណ ១,៥៦២ ហិកតា នៅស្រុកស្នួល ខេត្តក្រចេះ ដែលកំពុង ប្រឈម នឹងការបណ្តេញចេញ ពីអាជ្ញាធរខេត្ត។
ពលរដ្ឋឲ្យដឹងថា ក្នុងចំណោមពួកគាត់៣៨០គ្រួសារនោះ មាន៣២៩គ្រួសារ ត្រូវបានក្រុមនិស្សិតចុះវាស់វែងកំណត់ព្រំដីរួចរាល់ហើយ កាលពីជាង២ឆ្នាំមុន ប៉ុន្តែនៅថ្ងៃទី៨ ខែកក្កដា ឆ្នាំ២០១៤ សុរិយោដីខេត្ត បែរជាចេញសេចក្តីសម្រេច កាត់ដីអ្នកភូមិនៅតំបន់នោះដាក់ជាដីរដ្ឋទៅវិញ ទើបផ្ទុះការតវ៉ាដល់រាជធានីភ្នំពេញ។VODមិនទាន់អាចសុំការអត្ថាធិប្បាយពីអាជ្ញាធរ ភ្លាមៗលើបញ្ហានេះនៅឡើយទេ។
កន្លងទៅលោកនាយករដ្ឋមន្ត្រីហ៊ុន សែន ធា្លប់កាត់ដីទំហំ៧៥០ហិកតានៅស្រុកស្នួលខេត្តក្រចេះនេះ ទៅក្រុមអ្នកតវ៉ាជាង៤០០គ្រួសារ ដើម្បីបញ្ចប់ជម្លោះ។ប្រជាពលរដ្ឋ លើកឡើងថា អាជ្ញាធរបានដុតផ្ទះប្រជាពលរដ្ឋ ដើម្បីបើកផ្លូវឲ្យក្រុមហ៊ុនវៀតណាមអភិវឌ្ឍន៍៕
No comments:
Post a Comment