កិច្ចពិភាក្សារយៈពេល ១ ព្រឹក បានធ្វើឡើង ដោយមានការចូលរួមពីមន្ត្រីតំណាងមកពីក្រសួងការងារ សមាគមរោងចក្រកាត់ដេរនៅកម្ពុជា GMAC តំណាងអង្គការពលកម្មអន្តរជាតិ ILO និងកម្មកររោងចក្រកាត់ដេរ។ កិច្ចពិភាក្សា នៅព្រឹកថ្ងៃអាទិត្យនេះ នៅភោជនីយដ្ឋាន រ៉ុកគ្រីល នៅជិតផ្សារថ្មី រៀបចំដោយមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ CCIM។ កិច្ចពិភាក្សា បានលើកឡើងអំពីឧបត្តិហេតុដួលសន្លប់នៅក្នុងឧស្សាហកម្មកាត់ដេរ និងវិធានការថែទាំសុខភាព និងសុវត្ថិភាព នៅតាមរោងចក្រ។
គិតមកត្រឹម ៦ ខែ ដើមឆ្នាំ២០១៤ មានកម្មកររោងចក្រកាត់ដេរ ជិត ៩០០ នាក់ បានដួលសន្លប់ នៅកន្លែងធ្វើការ។ នេះបើតាមទិន្នន័យរបស់ក្រសួងការងារ។ តួលេខនេះ បានឡើងហួសចំនួនសរុប នៃកម្មកររោងចក្រ ដែលបានសន្លប់ ក្នុងឆ្នាំ២០១៣ ដោយមានចំនួន ៨២៣ នាក់។ តាមសេចក្តីប្រកាសព័ត៌មាន ចំនួនកម្មកររោងចក្រដួលសន្លប់ កើនឡើងនៅរយៈពេល ៦ ខែ ឆ្នាំ២០១៤ រហូតដល់ជិត ៩០០ នាក់ ធ្វើឲ្យមានការបារម្ភអំពីលក្ខខណ្ឌការងារ នៅក្នុងវិស័យកាត់ដេរ ដែលបានផ្តល់នូវចំណូលនាំចេញច្រើនជាងគេនៅកម្ពុជា។
ក្រៅពីកម្មករដួលសន្លប់ ក៏បានរបាយការណ៍បង្ហាញថា នៅឆ្នាំ២០១៣ ក៏មានកម្មករ ស្លាប់ ២ នាក់ ហើយនៅដើមឆ្នាំ២០១៤ មានអ្នកស្លាប់ ៣ នាក់។ កម្មកររោងចក្រ ដែលស្លាប់ទាំងនោះ គឺបន្ទាប់ពីដួលសន្លប់នៅពេលធ្វើការ។
របាយការណ៍របស់ ILO បានបង្ហាញពីមូលហេតុជាច្រើន ដែលនាំឲ្យកម្មកររោងចក្រកាត់ដេរដួលសន្លប់ នៅពេលធ្វើការ រួមមាន៖ ដោយសារតែកំដៅឡើងខ្លាំងក្នុងរោងចក្រ ខ្វះខ្យល់ចេញចូល សារជាតិគីមី និងកម្មករ ធ្វើការថែមម៉ោងច្រើន ជាដើម។
រីឯសហជីពកម្មករ និងសង្គមស៊ីវិល បានបន្ទោសលើប្រាក់ខែកម្មករទាប ដែលនាំឲ្យកម្មករ ត្រូវធ្វើការថែមម៉ោង ចំណាយលើម្ហូបអាហារត្បិតត្បៀត រួមទាំងខ្វះវិធានការតឹងរឹងពីក្រសួងការងារលើរោងចក្រ ដែលមានបរិស្ថានក្តៅហប់ ជាដើម។
តំណាងក្រសួងការងារ និងសមាគមរោងចក្រកាត់ដេរ ទទួលស្គាល់នូវមូលហេតុ នៃការដួលសន្លប់របស់កម្មកររោងចក្រ ដែលរបាយការណ៍បានបង្ហាញខាងលើ។ ប៉ុន្តែលោក អ៊ុក ចាន់ធូ ប្រធាននាយកដ្ឋានអធិការកិច្ចការងារ របស់ក្រសួងការងារ និងបណ្តុះបណ្តាលវិជ្ជាជីវៈ លើកឡើងថា ក្រសួងការងារ មិនព្រងើយកន្តើយទេ។ ក្នុងនោះ ក្រសួងបានបង្កើតគណៈកម្មការទប់ស្កាត់ និងស្រាវជ្រាវការដួលសន្លប់របស់កម្មកររោងចក្រ កាលពីឆ្នាំ២០១១ ហើយមន្ត្រីអធិការកិច្ច ក៏បានចុះត្រួតពិនិត្យសហគ្រាសគ្រឹះស្ថានការងារ និងរោងចក្រកាត់ដេរ ជាប្រចាំ។
តាមតំណាងក្រសួងការងារ និងសមាគមរោងចក្រកាត់ដេរ កម្មករដួលសន្លប់ច្រើន អាចមកពីកម្មករទទួលទានអាហារខ្វះជីវជាតិ ហូបចុកត្បិតត្បៀត សន្សំលុយផ្គត់ផ្គង់គ្រួសារ ទុកលុយទិញមាស និងទិញម្ស៉ៅក្រេម ហើយមានអ្នកខ្លះ ដើរលេង សេពគ្រឿងស្រវឹង នាំឲ្យអត់ងងុយ ជាដើម។
ចំណែកលោក កាំង ម៉ូនីកា អគ្គលេខាធិការរង សមាគមរោងចក្រកាត់ដេរនៅកម្ពុជា GMAC បានលើកឡើងថា ការធ្វើការថែមម៉ោងជាផ្នែកមួយ នាំឲ្យកម្មករដួលសន្លប់។ ប៉ុន្តែកត្តាចម្បង អាចមកពីកម្មករសន្សំសំចៃលុយលើម្ហូបអាហារប្រចាំថ្ងៃ៕
No comments:
Post a Comment