គណបក្ស ទាំងពីរ ព្រមព្រៀង បញ្ចប់វប្បធម៌ គុំគួន និងលាបពណ៌គ្នា
RFA | ៨ សីហា ២០១៤
លោក ហ៊ុន សែន (ស្ដាំ) និងលោក សម រង្ស៊ី
ថ្លែងទៅកាន់ អ្នកកាសែត បន្ទាប់ ពីប្រជុំ នៅមន្ទីរ រដ្ឋសភា ថ្ងៃ ទី៨
ខែសីហា ឆ្នាំ២០១៤។ RFA/Yeang Socheametta
លោកនាយករដ្ឋមន្ត្រី ហ៊ុន សែន ស្នើឲ្យ ប្រជាពលរដ្ឋខ្មែរ កត់ត្រា ទុក នវពាក្យសម្ដី របស់ ប្រធាន គណបក្ស សង្គ្រោះជាតិ លោក សម រង្ស៊ី ដែលលើកឡើង ថា, អ្នកនយោបាយ ខ្មែរ គួរបញ្ចប់ នូវវប្បធម៌ គុំគួន ឬវប្បធម៌ «ទឹក ឡើង, ត្រីស៊ី ស្រមោច; ទឹក ហោច, ស្រមោច ស៊ីត្រី»។
លោក ហ៊ុន សែន ក៏ទាមទារ ឲ្យបក្សប្រឆាំង ឈប់ហៅ ថ្នាក់ដឹកនាំ គណបក្ស ប្រជាជនកម្ពុជា ថា, ជាអាយ៉ង របស់យួន។ ការថ្លែង របស់លោក ហ៊ុន សែន នេះ ធ្វើឡើង ក្នុងសម័យប្រជុំ សភា ដែលមាន ការចូលរួម របស់ តំណាងរាស្ត្រ គណបក្ស សង្គ្រោះជាតិ ទាំង ៥៥រូប ដើម្បី ពិភាក្សា និងអនុម័ត លើសេចក្តី ស្នើវិសោធនកម្ម ប្រការ ៦ថ្មី នៃបទបញ្ជា ផ្ទៃក្នុង រដ្ឋសភា ដែលបក្សទាំងពីរ បានព្រមព្រៀងគ្នា កាលពីពេល ថ្មីៗនេះ។
ស្ថានភាព នយោបាយនៅកម្ពុជា ហាក់ធូរស្រាល មួយកម្រិត ថែមទៀត បន្ទាប់ ពីតំណាងរាស្ត្រ គណបក្ស សង្គ្រោះជាតិ ព្រមចូលប្រជុំ សភា ដែលពួកគេ បានធ្វើ ពហិការ អស់រយៈពេល ជិតមួយឆ្នាំ កន្លងមកហើយ។ ការចូលប្រជុំ សភា របស់ តំណាងរាស្ត្របក្ស ប្រឆាំង ពេលនេះ ធ្វើឲ្យសភា ដែលគេ ចោទប្រកាន់ ថា ជាសភា ឯកបក្ស ឬសភា មិនគ្រប់ទឹកនោះ ក្លាយទៅ ជាសភាពហុបក្ស និងគ្រប់ទឹក។ ក្រៅតែ ពីធ្វើ ឲ្យស្ថាប័ន នីតិប្បញ្ញត្តិ មួយនេះ ជាស្ថាប័នគ្រប់ទឹកនោះ មេដឹកនាំ គណបក្ស នយោបាយ ទាំង២ ក៏បង្ហាញជំហរ ដោះស្រាយ បញ្ហា ដោយសន្តិវិធី និងបញ្ឈប់វប្បធម៌ ស្អប់គ្នា ទៅវិញ ទៅមក។
ថ្លែងនៅក្នុងសម័យប្រជុំរដ្ឋសភា នៅព្រឹកថ្ងៃទី៨ ខែសីហា ប្រធានគណបក្សសង្គ្រោះជាតិ លោក សម រង្ស៊ី លើកឡើងថា វាដល់ពេលដែលអ្នកនយោបាយខ្មែរ ត្រូវរួមរស់ និងធ្វើការជាមួយគ្នា ដើម្បីការពារ និងកសាងប្រទេសកម្ពុជា ហើយ។ លោក សម រង្ស៊ី បន្តថា វប្បធម៌ថ្មីមួយដែលអ្នកនយោបាយខ្មែរត្រូវបង្កើតនោះ គឺវប្បធម៌សន្ទនា ដោយឈរលើស្មារតីគោរពគ្នាទៅវិញទៅមក ដើម្បីស្វែងរកដំណោះស្រាយដោយសន្តិវិធី សម្រាប់ប្រទេសជាតិ។ ក្រៅតែពីលើកឡើងបែបនេះ ដែលមើលទៅហាក់ធ្វើឲ្យ លោក ហ៊ុន សែន សប្បាយចិត្តនោះ លោក សម រង្ស៊ី ក៏មិនភ្លេចសម្ដែងការអរគុណចំពោះ លោក ហ៊ុន សែន ចំពោះស្មារតីយោគយល់ និងសហការរបស់លោក ដើម្បីអាចឈានទៅដល់ការបញ្ចប់វិបត្តិនយោបាយនៅពេលនេះ។
លោក សម រង្ស៊ី៖ «វប្បធម៌សហការធ្វើការជាមួយគ្នា ជជែកគ្នា មិនដណ្ដើមយកឈ្នះយកចាញ់ទេ មិនសំខាន់ទេ អ្នកណាឈ្នះ អ្នកណាចាញ់ អ្វីដែលសំខាន់ យើងត្រូវរកគំនិតដែលល្អ គំនិតដែលត្រឹមត្រូវ គំនិតដែលជួយការពារប្រទេសជាតិយើង គំនិតដែលជួយកសាងប្រទេសជាតិយើងឲ្យរុងរឿង។ ដូច្នេះ គំនិតដែលល្អនេះ អាចទទួលការគាំទ្រពីគ្រប់គណបក្សទាំងអស់។ ដូច្នេះមិនមែនគណបក្សណាចង់យកឈ្នះគណបក្សណាដាច់ខាតទេ៕»
បន្ទាប់ពីអង្គុយស្តាប់យ៉ាងយកចិត្តទុកដាក់ការថ្លែងរបស់ លោក សម រង្ស៊ី លោក ហ៊ុន សែន បានថ្លែងឆ្លើយតបទៅកាន់សមាជិកបក្សប្រឆាំង ដែលកំពុងបាញ់ភ្នែកមករកលោកនោះ ហាក់ជារបៀបឌឺដងទៅវិញ។ លោក ហ៊ុន សែន ចាប់ផ្តើមដោយថ្លែងស្វាគមន៍ចំពោះវត្តមានរបស់តំណាងរាស្ត្របក្ស ប្រឆាំង និងចំពោះស្មារតីរួបរួម មិនគុំគួនគ្នារបស់មេបក្សនេះ។ ទោះជាយ៉ាងណា លោក ហ៊ុន សែន ដោយមិនបង្អង់យូរ ឆ្លើយតបបែបចំអកទៅវិញថា ប្រសិនបើបក្សប្រឆាំងប្រកាន់យកស្មារតីនេះតាំងពីក្រោយការបោះ ឆ្នោតមកម្ល៉េះ សភាពការណ៍នយោបាយនៅកម្ពុជា មានលក្ខណៈប្រសើរពេញមួយឆ្នាំមកហើយ។
លោក ហ៊ុន សែន ថ្លែងចំអកផ្ទួនៗទៀតថា អ្វីដែលបានសម្រេចក្នុងកិច្ចព្រមព្រៀងរវាងគណបក្សទាំង២ កាលពីថ្ងៃទី២២ ខែកក្កដា ឆ្នាំ២០១៤ វាមិនខុសគ្នាប៉ុន្មានទៅនឹងស្មារតីនៃការចរចា កាលពីថ្ងៃទី១៧ ខែកញ្ញា ឆ្នាំ២០១៣ នោះទេ។ លើសពីនេះ លោក ហ៊ុន សែន ចាត់ទុកការចូលសភារបស់បក្សប្រឆាំងពេលនេះ ថាជាការភ្ញាក់ខ្លួនរបស់ពួកគេ។ លោក ហ៊ុន សែន មិនបានបង្អង់ត្រឹមនេះទេ លោកថា ការប្រជុំសភានៅពេលនេះ និងនៅថ្ងៃខាងមុខ គឺដើម្បីដោះស្រាយបញ្ហាឲ្យសមាជិកតំណាងរាស្ត្រគណបក្សប្រឆាំងដែរនេះ លោកក៏សំដៅលើការបោះឆ្នោតជ្រើសតាំង លោក កឹម សុខា ឲ្យទៅកាន់តំណែងជាអនុប្រធានសភាផងដែរ។ ក្រៅពីនេះ លោកទទូចឲ្យបក្សប្រឆាំងឈប់ហៅលោកថាជាអាយ៉ងយួន ទៀតទៅ។
លោក ហ៊ុន សែន៖ «ហើយខ្ញុំក៏សង្ឃឹមយ៉ាងមុតមាំថា ពួកយើងខ្ញុំជាគណបក្សប្រជាជន មិនក្លាយទៅជាអាយ៉ងយួន ទៀតទេ។ បើឯកឧត្តមឲ្យខ្ញុំទៅជាយួន អស់ទៅហើយ អ៊ីចឹងមានន័យថា យើងនៅតែជាសត្រូវជាមួយគ្នា គ្រាន់តែមកនិយាយល្អរៀងខ្លួន។ អ៊ីចឹងបានជាខ្ញុំអំពាវនាវ សូមព្រះតេជព្រះគុណ ព្រះសង្ឃគ្រប់ព្រះអង្គ និងប្រជាជនទូទាំងប្រទេស កត់ត្រាទុកនូវសម្ដីទាំងឡាយដែលបានលើកឡើង៕»
ទោះជាយ៉ាងណាក៏ដោយ លោក ហ៊ុន សែន ក៏មិនភ្លេចថ្លែងអំណរគុណចំពោះការយោគយល់របស់ លោក សម រង្ស៊ី ដែលធ្វើឲ្យការប្រជុំសភាពហុបក្សលេចចេញជារូបរាងឡើង។ ព្រមជាមួយគ្នា លោកក៏ច្រានចោលការចោទប្រកាន់ដែលថា លោកបានសូកប៉ាន់លុយទៅ លោក សម រង្ស៊ី លោក អេង ឆៃអ៊ាង និងលោក គួយ ប៊ុនរឿន ចំនួន ២០លានដុល្លារ ជាថ្នូរនឹងការធ្វើឲ្យចូលសភានេះ។
ចំណែកអ្នកវិភាគនយោបាយឯករាជ្យ លោកបណ្ឌិត សុខ ទូច វិញ លោកគាំទ្រការថ្លែងរបស់ លោក ហ៊ុន សែន ដែលថា លទ្ធផលដែលបក្សប្រឆាំងទទួលបាននៅពេលនេះ គឺមិនខុសគ្នាច្រើននឹងអ្វីដែលបក្សកាន់អំណាចប្រកាសផ្តល់ឲ្យពី មុនមកទេ។ ប៉ុន្តែលោកថា ការចូលសភារបស់បក្សប្រឆាំងពេលនេះ គឺដោយសារពួកគេខ្លាចការគំរាមកំហែងរបស់បក្សកាន់អំណាច បន្ទាប់ពីមានការចាប់ខ្លួនតំណាងរាស្ត្រ និងសកម្មជនជាបន្តបន្ទាប់មក។ ចំពោះការថ្លែងលុបបំបាត់វប្បធម៌គុំគួនគ្នា ឬការហាមឃាត់មិនឲ្យហៅអ្នកនយោបាយថាអាយ៉ង ជាដើមនោះ លោកបណ្ឌិត សុខ ទូច ថាវាមិនចាំបាច់ទេ ប៉ុន្តែអ្វីដែលសំខាន់នោះ គឺអ្នកនយោបាយ គួរនាំគ្នាអនុវត្តច្បាប់រដ្ឋធម្មនុញ្ញឲ្យបានខ្ជាប់ខ្ជួន ប្រសើរជាង។
លោកបណ្ឌិត សុខ ទូច៖ «ពាក្យអាយ៉ងយួន ហ្នឹង វាចេញពីណាមក អាយ៉ងយួន ហ្នឹង វាមិនមែនចេញពីគណបក្សប្រឆាំងទេ វាជាប្រវត្តិសាស្ត្រមកហើយ នៅពេលណាដែលគណបក្សណាមួយយល់ឃើញថា គណបក្សនោះមិនបានបម្រើស្អីដែលជាផលប្រយោជន៍របស់គេ គេយល់ថា អាហ្នឹងជាអាយ៉ងរបស់បរទេសហើយ អាហ្នឹងវាផុសចេញពីណាមក វាផុសចេញពីប្រជាជន។ យើងបារម្ភខ្លាចអ្នកនយោបាយទាំង២ហ្នឹងត្រូវគ្នា ហើយបង្កើតច្បាប់មួយថា អ្នកណាហៅកញ្ជះយួន ឬក៏អាយ៉ងយួន ហ្នឹង ត្រូវតែជាប់ទោស។ អាហ្នឹងខ្លាចប្រើប្រព័ន្ធតុលាការ ដូចដែលប្រើប្រាស់ប្រព័ន្ធតុលាការសម្លុតគណបក្សប្រឆាំង ឲ្យចូលសភាអ៊ីចឹង។»
ការចូលសភារបស់បក្សប្រឆាំង ដើម្បីអនុម័តលើសេចក្តីស្នើវិសោធនកម្មប្រការ៦ថ្មី នៃបទបញ្ជាផ្ទៃក្នុងសភា គឺគ្រាន់តែជាជំហានចាប់ផ្តើមតូចមួយ ក្នុងការអនុវត្តតាមស្មារតីកិច្ចព្រមព្រៀងរវាងគណបក្សទាំង២ កាលពីថ្ងៃទី២២ កក្កដា ប៉ុណ្ណោះ។ បន្ទាប់ពីនេះ ពួកគេនឹងត្រូវបោះឆ្នោតជ្រើសតាំងសមាសភាពថ្នាក់ដឹកនាំសភា អនុម័តសេចក្តីស្នើវិសោធនកម្មរដ្ឋធម្មនុញ្ញ និងបោះឆ្នោតជ្រើសតាំងសមាសភាពគណៈកម្មាធិការជាតិរៀបចំការបោះឆ្នោត ថ្មី ជាដើម។
លោក បាន គីមូន អគ្គលេខាធិការអង្គការសហប្រជាជាតិ ប្រកាសស្វាគមន៍ចំពោះកិច្ចប្រជុំសភាលើកដំបូងដែលមានវត្តមាន តំណាងរាស្ត្របក្សទាំងពីរ ក្នុងថ្ងៃនេះ និងការបើកទីលានប្រជាធិបតេយ្យឡើងវិញ។ លោក បាន គីមូន ជំរុញឲ្យគណបក្សទាំងពីរប្រឹងប្រែង កែទម្រង់ និងពង្រឹងស្ថាប័ន ដែលជំរុញដំណើរការប្រជាធិបតេយ្យទាំងឡាយ ដើម្បីផលប្រយោជន៍ប្រជាពលរដ្ឋខ្មែរទាំងអស់៕
No comments:
Post a Comment