កម្ពុជា យល់ព្រម ឲ្យយន្តហោះ វៀតណាម ហោះកាត់ ដែនអាកាស របស់ខ្លួន
RFA | ២៥ សីហា ២០១៤
កម្ពុជា បានអនុញ្ញាត ឲ្យយន្តហោះ ដឹកអ្នកដំណើរ វៀតណាម ហើរកាត់ ដែនអាកាស ខ្មែរ ក្រោមកិច្ច ព្រមព្រៀង រវាង លោក សុខ អាន ឧបនាយករដ្ឋមន្ត្រី កម្ពុជា ជាមួយ រដ្ឋមន្ត្រី ក្រសួង ដឹកជញ្ជូន វៀតណាម លោក ឌិញ ឡាថាំង (Dinh La Thang) ដែលធ្វើឡើង កាលពីថ្ងៃ ទី២១ សីហា នៅភ្នំពេញ។
កិច្ចព្រមព្រៀងនេះ ធ្វើឡើង តាមសំណើ របស់ ភាគី វៀតណាម ដែលធ្វើ ឲ្យការហោះហើរ របស់ វៀតណាម សន្សំ ពេលវេលា និងសន្សំ ប្រាក់ចំណាយ លើប្រេង ហោះហើរ បានច្រើន ដែលភាគី ទាំងពីរ បានហៅ ផ្លូវហោះហើរ បង្កើតថ្មីនេះ ថា, ជាលក្ខណៈ អនុគ្រោះ ដែលនឹងអនុញ្ញាត ឲ្យយន្តហោះ វៀតណាម ហោះ ពីភាគ ខាងជើង, គឺ ទីក្រុង ហាណូយ (Hanoi) មកទីក្រុង ព្រៃនគរ ឬទីក្រុង ហូជីមិញ (Ho Chi Minh) និងពីហាណូយ ទៅកាន់ កោះត្រល់ ដែលវៀតណាម ហៅថា កោះ ភូកុក (Phu Quoc) អាចហោះ ត្រង់កាត់ ដែនអាកាស កម្ពុជា បាន។ នេះ បើ តាមសារព័ត៌មាន វៀតណាម តាមសរសេរ ជាភាសា អង់គ្លេស ផ្សាយតាម អិនធើណែត ឈ្មោះថា វៀតណាម ណែត ប៊្រីឌ (VietNamNet Bridge)។
សារព័ត៌មានដដែលឲ្យដឹងថា ជើងហោះហើរបង្កើតថ្មីនេះ ធ្វើឲ្យអាកាសចរណ៍ធន់ប៊ូអិង(Boeing) ៧៧៧ វៀតណាម អាចចំណេញពេលវេលាហោះហើរ ២៦ នាទី ក្នុងផ្លូវហោះពីហាណូយមកទីក្រុងហូជីមិញ។ បើគិតជាប្រាក់វិញ គឺចំណេញស្មើ២៥ ភាគរយនៃថ្លៃដើម និងកាត់បន្ថយចំណាយថ្លៃដើមចំនួន៣៨ ភាគរយ ក្នុងការហោះហើរពីក្រុងហាណូយមកកោះត្រល់។
កិច្ចព្រមព្រៀងថ្មីរវាងកម្ពុជាវៀតណាមនេះ ក៏អាចឲ្យវៀតណាមហោះត្រង់ទៅប្រទេសឡាវកាត់តាមដែនអាកាសកម្ពុជាបាន ដែរ។ ចំណែកភាគីកម្ពុជាក៏ដូច្នោះដែរ គឺអាចហោះតាមផ្លូវត្រង់បង្កើតថ្មីនេះបានដូចគ្នា៕
No comments:
Post a Comment