សមាជិក សភា បក្សប្រឆាំង ប្រកាសថា នឹងកោះហៅ លោក ហោ ណាំហុង បំភ្លឺរឿង ខ្មែរក្រោម
ឧបនាយករដ្ឋមន្ត្រី រដ្ឋមន្ត្រីក្រសួងការបរទេសកម្ពុជា លោក ហោ ណាំហុង ថ្លែងក្នុងសន្និសីទកាសែតនាខេត្តស្រះកែវ ប្រទេសថៃ ក្រោយជួបជាមួយរដ្ឋមន្ត្រីការបរទេសថៃ នាខេត្តបន្ទាយមានជ័យ នៅថ្ងៃទី២៨ តុលា ឆ្នាំ២០១៣។
RFA
តំណាងរាស្ត្រគណបក្សសង្គ្រោះជាតិ គ្រោងកោះហៅរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ចូលបំភ្លឺក្នុងរដ្ឋសភា ជុំវិញបញ្ហាដែលវៀតណាម បំភ្លៃប្រវត្តិសាស្ត្រ។ ការអះអាងនេះ ធ្វើឡើងដោយសមាជិកគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មានរដ្ឋសភា មកពីគណបក្សសង្គ្រោះជាតិ នៅក្នុងចំណោមក្រុមបាតុករដែលទាមទារឲ្យវៀតណាម សុំអភ័យទោសជាសាធារណៈ នាល្ងាចថ្ងៃទី១២ ខែសីហា។
សមាជិកគណៈកម្មាធិការកណ្ដាលគណបក្សសង្គ្រោះជាតិ បីនាក់រួមមាន លោក ម៉ោញ សាផាន លោក យ៉យ ចំរើន និងលោក អ៊ុំ សំអាន បង្ហាញវត្តមានក្នុងបាតុកម្មប្រឆាំងនឹងសម្ដីអ្នកនាំពាក្យស្ថានទូតវៀតណាម នៅខាងមុខស្ថានទូតវៀតណាម។
សមាជិកសភាទើបស្បថរួចថ្មីៗ លោក អ៊ុំ សំអាន ប្រកាសប្រាប់ក្រុមបាតុករថា បើវៀតណាម នៅតែមិនសុំទោសជាសាធារណៈតាមការទាមទាររបស់បាតុករ ហើយក្រសួងការបរទេសកម្ពុជា នៅតែស្ងាត់ច្រៀបដូចគេចុកនោះ លោកនឹងកោះហៅ លោក ហោ ណាំហុង មកបំភ្លឺក្នុងរដ្ឋសភាតែម្តង។ លោកបន្តថា ក្រសួងការបរទេសកម្ពុជា ត្រូវតែទទួលខុសត្រូវចំពោះប្រយោជន៍ជាតិ ហើយអ្នកដែលត្រូវប្រតិកម្មមុនគេនោះ គឺក្រសួងការបរទេស មិនមែនពលរដ្ឋទេ។ ដូចនេះ អ្នកតំណាងរាស្ត្រនឹងដេញដោលបញ្ហានេះនៅក្នុងរដ្ឋសភា។
ទោះជាបែបណាក្តី តំណាងក្រសួងការបរទេស និងសហប្រតិបត្តិការអន្តរជាតិ លោក ឡុង វិសាលោ ឆ្លើយថា រឿងរ៉ាវនេះមិនពាក់ព័ន្ធនឹងលោកឡើយ។ មន្ត្រីការទូតជាន់ខ្ពស់របស់កម្ពុជា រូបនេះថែមទាំងបន្ទោសចំពោះការធ្វើបាតុកម្ម កាលពីថ្ងៃទី១១ ខែសីហា ទៀតផង។
ចំពោះបាតុកម្មទាមទារឲ្យវៀតណាម សុំអភ័យទោសជាសាធារណៈជាលើកទី៣ នៅថ្ងៃទី១២ នេះ ចាប់ផ្ដើមតាំងពីម៉ោង ៨ព្រឹក ដល់ម៉ោង ៤កន្លះល្ងាច។ ក្រុមបាតុករដាក់វេនគ្នាស្រែករិះគន់មន្ត្រីស្ថានទូតវៀតណាម ក្នុងនោះបាតុករខ្លះបាននិយាយឌឺដងទៅអ្នកតំណាងរាស្ត្រដែលទើបចូលស្បថក្នុងសភាថ្មីៗនោះទៀតផង។ បាតុករនិយាយថា អ្នកតំណាងរាស្ត្របានរាស្ត្របោះឆ្នោតឲ្យពាក់អាវធំក្រវ៉ាត់ក អង្គុយក្នុងម៉ាស៊ីនត្រជាក់ បែរជាភ្លេចគិតពីប្រយោជន៍ជាតិ។
ការឌឺដងនោះ ត្រូវបានស្ងាត់ទៅវិញ នៅពេលដែលអ្នកតំណាងរាស្ត្របក្សប្រឆាំងបង្ហាញខ្លួននៅទីនោះ។ បាតុកម្មនៅថ្ងៃទី១២ ខែសីហា នេះ ឈានដល់ដុតទង់ជាតិវៀតណាម។ ព្រះសង្ឃមានដើមកំណើតខ្មែរកម្ពុជាក្រោមមួយអង្គ មានថេរដីកាថា ព្រះអង្គជាអ្នកទទួលខុសត្រូវក្នុងទង្វើនេះ ដោយហេតុថា ព្រះអង្គខ្ញាល់នឹងមន្ត្រីស្ថានទូតវៀតណាម ប្រមាថមើលងាយជាតិសាសន៍ និងបំភ្លៃប្រវត្តិសាស្ត្រខ្មែរ។ ប៉ុន្តែចលនាបំផ្លាញទង់ជាតិវៀតណាម នេះ បានរួញតូចទៅវិញ បន្ទាប់ពីពលរដ្ឋជាច្រើន អង្វរករអ្នកចង់ដុតទង់ជាតិវៀតណាម ឲ្យបញ្ឈប់ ក្រោមហេតុផលថាមិនចង់បញ្ឆេះអំពើហិង្សារវាងជាតិសាសន៍ទាំងពីរ។
ទាក់ទងនឹងការធ្វើបាតុកម្មប្រឆាំងស្ថានទូតវៀតណាម នេះ មិនត្រូវបានស្ថានទូតវៀតណាម បញ្ចេញប្រតិកម្មឡើយ។ ប៉ុន្តែប្រទេសវៀតណាម បែរជាហៅអតីតប្រមុខរដ្ឋសាធារណរដ្ឋប្រជាមានិតកម្ពុជា ដែលតែងតាំងដោយវៀតណាម បច្ចុប្បន្នកាន់ការជាប្រធានរដ្ឋសភាកម្ពុជា លោក ហេង សំរិន ឲ្យទៅទស្សនកិច្ចជាផ្លូវការនៅប្រទេសវៀតណាម រយៈពេលបីថ្ងៃ ចាប់ពីថ្ងៃទី១៨ ដល់ថ្ងៃទី២០ ខែសីហា។ សេចក្តីជូនដំណឹងរបស់រដ្ឋសភាកម្ពុជា បញ្ជាក់ថា លោក ហេង សំរិន នឹងត្រូវជជែកពិភាក្សាជាមួយមន្ត្រីសំខាន់ៗរបស់បក្សកុម្មុយនីស្តវៀតណាម ៤រូបរួមមាន លេខាបក្សកុម្មុយនីស្តវៀតណាម ង្វៀន ភូត្រុង (Nguyen PhuTrong) ប្រធានរដ្ឋ លោក ជឿង តាន់សាង (Truong TanSang) នាយករដ្ឋមន្ត្រី លោក ង្វៀន តាន់យុង (Ngugen Tan Dung) និងប្រធានរដ្ឋសភា លោក ង្វៀន ស៊ីងហ៊ុង (Nguyen SinhHung)។ ក្រៅពីនេះ ប្រធានរដ្ឋសភាកម្ពុជា ក៏នឹងត្រូវទស្សនា និងស្វែងយល់កន្លែងប្រវត្តិសាស្ត្រសំខាន់ៗនៅទីក្រុងហាណូយ ទៀតផង។
កាលពីថ្ងៃទី៨ ខែឧសភា លោក សម រង្ស៉ី និងលោក ហ៊ុន សែន សន្យាគ្នាក្នុងរដ្ឋសភាថា ឈប់ប្រើយុទ្ធសាស្ត្រទឹកឡើងត្រីស៊ីស្រមោច ទឹកហោចស្រមោចស៊ីត្រី។ ប្រមុខបក្សទាំងពីរ ក៏សន្យាថា នឹងរួមគ្នាដោះស្រាយបញ្ហាជាតិ ដើម្បីភាពរុងរឿងនៃកម្ពុជា ទៀតផង។ លោក ហ៊ុន សែន ស្នើឲ្យបក្សប្រឆាំងឈប់ហៅបក្សកាន់អំណាចថាអាយ៉ងយួន តែបាតុករប្រឆាំងនឹងទូតវៀតណាម ក៏ស្នើឲ្យរដ្ឋាភិបាលចាត់វិធានការចេញកំណត់ការទូតទៅវៀតណាម ដើម្បីបញ្ជាក់ពីភាពស្អាតស្អំរបស់គណបក្សប្រជាជនកម្ពុជា។ បាតុកម្មថ្ងៃទី៣ នឹងចាប់ផ្ដើមនៅទីលានប្រជាធិបតេយ្យ វេលាម៉ោង ៧ព្រឹក ហើយបាតុករគ្រោងដង្ហែមកកាន់ស្ថានទូតវៀតណាម ជាថ្មី៕
No comments:
Post a Comment