លោក កឹម សុខា ថា សំណុំរឿង របស់លោក នៅតុលាការ គឺ ត្រូវ បានបញ្ចប់ហើយ នៅថ្ងៃនេះ
RFA | ១១ សីហា ២០១៤
លោក កឹម សុខា អនុប្រធាន គណបក្ស សង្គ្រោះជាតិ នៅមុខសាលាដំបូង រាជធានីភ្នំពេញ កាលពីថ្ងៃ ទី២៥ ខែកក្កដា ឆ្នាំ ២០១៤។ RFA/Tin Zakariya
អនុប្រធាន សង្គ្រោះជាតិ លោក កឹម សុខា មានប្រសាសន៍ នៅថ្ងៃ ទី១១ សីហា ថា, មេធាវី ការពារក្ដី របស់លោក គឺ លោក ចាន់ ចេន ចូលខ្លួន ទៅបំភ្លឺ នៅតុលាការ តាមកាលកំណត់ នៅព្រឹកថ្ងៃ ទី១១ សីហានេះ។
លោក បញ្ជាក់ថា មេធាវី របស់លោក បានប្រាប់លោក ថា, ដោយសារ តែ លោក មានអភ័យឯកសិទ្ធិ តុលាការ បានបញ្ចប់ សំណុំរឿង របស់លោក ទាក់ទង នឹងការទទួល ខុសត្រូវ លើការធ្វើបាតុកម្ម កាលពីថ្ងៃ ទី១៥ កក្កដា ឆ្នាំ២០១៤។
លោក កឹម សុខា អះអាងថា, ចំពោះយុវជន គណបក្ស សង្គ្រោះជាតិ ទាំង៣នាក់នោះ ក៏នឹងត្រូវ ដោះលែង នៅថ្ងៃ ទី១១ សីហា នេះដែរ បើសិនជា នីតិវិធី របស់ តុលាការ ធ្វើទាន់។
លោក បញ្ជាក់ថា មេធាវីរបស់យុវជនទាំងបីនាក់នេះ បានដាក់លិខិតទៅសាលាឧទ្ធរណ៍នៅព្រឹកថ្ងៃទី ១១សីហា ដើម្បីសុំដោះលែងនៅក្រៅឃុំបណ្ដោះអាសន្ន។ លោកបន្តថា ជាគោលការណ៍ យុវជនទាំង៣នាក់ និងករណីតំណាងរាស្ត្រគណបក្សសង្គ្រោះជាតិទាំងអស់ ត្រូវបានសម្របសម្រួលផ្នែកនយោបាយរួចរាល់ហើយ នៅមុនពេលតំណាងរាស្ត្រគណបក្សសង្គ្រោះជាតិចូលប្រជុំសភា កាលពីថ្ងៃទី៨សីហា។ លោក កឹម សុខា លើកឡើងថា យុវជនទាំងបីនាក់នេះ ក៏មានលិខិតពីលោក ឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ដើម្បីសម្របសម្រួលផ្នែកនយោបាយឲ្យ យុវជនគណបក្សសង្គ្រោះជាតិនៅក្រៅឃុំបណ្ដោះអាសន្ន៕
No comments:
Post a Comment