លោក កឹម សុខា ទាមទារ ឲ្យកំណត់ នាយករដ្ឋមន្ត្រី ដឹកនាំ ប្រទេសត្រឹម ២អាណត្តិ ដើម្បី គេចពី របបផ្តាច់ការ
VOD | ១៨ សីហា ២០១៤
អនុប្រធាន គណបក្ស សង្រ្គោះជាតិ លោក កឹម សុខា កាលពីកន្លងទៅ
អនុប្រធាន គណបក្ស សង្គ្រោះជាតិ លោក កឹម សុខា ប្រកាសជាថ្មីក្នុងការគាំទ្រឲ្យមានវិសោធនកម្មរដ្ឋធម្មនុញ្ញ ដោយកំណត់ឲ្យនាយករដ្ឋមន្ត្រី អាចដឹកនាំប្រទេសត្រឹមតែ២អាណត្តិ គឺរយៈពេល១០ឆ្នាំប៉ុណ្ណោះ។
ការប្រកាស បែបនេះ ស្របពេល ដែលក្រុម សង្គមស៊ីវិល ដែលមាន អង្គការ ចំនួន៩ នឹងបើក ការពិភាក្សា លើប្រធានបទ «ការកំណត់ អាណត្តិ នាយករដ្ឋមន្ត្រី» នៅថ្ងៃអង្គារ ស្អែកនេះ ដើម្បី ឈានទៅដល់ ការរៀបចំ សេចក្តីស្នើ វិសោធនកម្ម រដ្ឋធម្មនុញ្ញ ក្នុងការកំណត់ ឲ្យបេក្ខជន នាយករដ្ឋមន្ត្រី អាចធ្វើ ជានាយករដ្ឋមន្ត្រី ត្រឹមតែ ១០ឆ្នាំប៉ុណ្ណោះ។
លោក កឹម សុខា បានសរសេរនៅលើហ្វេសប៊ុករបស់ខ្លួនថា លោកគាំទ្រការទាមទារឲ្យមានការកំណត់អាណត្តិនាយករដ្ឋមន្ត្រីត្រឹម១០ ឆ្នាំ(២អាណត្តិ) ដោយសារការកំណត់អាណត្តិនាយករដ្ឋមន្ត្រីនេះ គឺជាលក្ខខណ្ឌមួយដែលអាចជួយកម្ពុជារួចផុតពីការឈានទៅរករបបផ្តាច់ការ ។លោកបន្តថា លោកតែងតែទាមទារឲ្យមានការចែងក្នុងរដ្ឋធម្មនុញ្ញជាច្រើនឆ្នាំមកហើយ និងបានដាក់បញ្ចូលការកំណត់អាណត្តិនាយករដ្ឋមន្ត្រីនេះក្នុងគោលនយោបាយ របស់គណបក្សចាស់របស់លោក គឺគណបក្សសិទ្ធិមនុស្ស។ លោក បញ្ជាក់ ថា, «នេះជាចំណុចមួយដែលរូបខ្ញុំនិងសមាជិកសភាគណបក្សសង្គ្រោះជាតិដទៃ ទៀតត្រូវបន្តទាមទារ ដើម្បីឲ្យកម្ពុជាឈានទៅរកការផ្លាស់ប្តូរមួយ ដែលបើកឱកាសឲ្យអ្នកនយោបាយទាំងអស់បាន បញ្ចេញថ្វីដៃ ដើម្បីប្រកួតប្រជែងយកសេចក្តីទុកចិត្តពីប្រជាពលរដ្ឋដោយភាពត្រឹមត្រូវ។»
សង្គមស៊ីវិល រួមមានអង្គការឃ្លាំមើលការបោះឆ្នោតហៅកាត់ថា ខុមហ្វ្រែល សមាគមអាដហុក អង្គការសីលការ សមាគមCHRAC អង្គការនិចហ្វ្រិច អង្គការYCC និងKYSDជាដើម នឹងដាក់សេចក្តីស្នើវិសោធនកម្មរដ្ឋធម្មនុញ្ញមាត្រា១១៩ថ្មី ដោយបន្ថែមវាក្យខ័ណ្ឌចំនួនមួយ គឺ «រីរជនមួយរូបជាបេក្ខជន នាយករដ្ឋមន្ត្រី មិនត្រូវជាបេក្ខជនដែលធ្លាប់កាន់តំណែងជានាយករដ្ឋមន្ត្រីចំនួន(0២) អាណត្តិឬរយៈពេល(១០)ឆ្នាំកន្លងមកហើយ...។»
នាយកប្រតិបត្តិអង្គការខុមហ្វ្រែល លោក គល់ បញ្ញា មានប្រសាសន៍ថា ការកំណត់អាណត្តិនាយករដ្ឋមន្ត្រីនេះ មានសារសំខាន់សម្រាប់ប្រទេសកម្ពុជា ហើយប្រទេសប្រជាធិបតេយ្យជាច្រើន កំពុងតែរៀបចំឲ្យមានការកំណត់អាណត្តិនេះ បើទោះជាប្រទេសប្រកាន់របបប្រព័ន្ធសភានិយម ឬប្រព័ន្ធចម្រុះប្រធានាធិបតី-នាយករដ្ឋមន្ត្រីក៏ដោយ។ លោក បញ្ជាក់ថា «ការកំណត់នេះ នឹងធ្វើឲ្យមានលក្ខណៈរលូនសម្រាប់ការផ្លាស់ប្តូរ កុំឲ្យមានវិបត្តិសង្គម ឬឈានដល់សង្គ្រាម ការផ្លាស់ប្តូរដោយធម្មតា ធានាស្ថិរភាពនយោបាយ។ ជួយឲ្យមានក្រុមថ្មី ជំនាន់ថ្មី អាចមកដឹកនាំ...។»
លោក គល់ បញ្ហា បន្ថែមថា ការកំណត់អាណត្តិនាយករដ្ឋមន្ត្រីនេះ នឹងអាចកាត់បន្ថយអំណាចប្រមូលផ្តុំផងដែរ។ លោកឲ្យដឹងទៀតថា ក្រុមសង្គមស៊ីវិល នឹងបន្តជជែកគ្នា ក្រែងមានគំនិតថ្មី ដោយមិនចាំបាច់ធ្វើវិសោធនកម្មរដ្ឋធម្មនុញ្ញ។
ការស្នើសុំជាថ្មីរបស់សង្គមស៊ីវិលនេះ ស្របពេលដែលគណបក្សទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ កំពុងតែពិភាក្សា និងធ្វើវិសោធនកម្មរដ្ឋធម្មនុញ្ញមួយចំនួន ក្រោយពីគណបក្សទាំងពីរ បានព្រមព្រៀងលើកិច្ចព្រមព្រៀងនយោបាយកាលពីថ្ងៃទី២២ខែកក្កដា៕
No comments:
Post a Comment