វិភាគ៖ តើ លោក ហ៊ុន សែន អាចបំបិទមាត់ ប្រជាពលរដ្ឋ ខ្មែរ មិនឲ្យ ហៅបក្សប្រជាជន កម្ពុជា ថា «អាយ៉ងយួន» បានទេ?
VOD | ១៨ សីហា ២០១៤
ស្តាប់សំឡេង៖ |
ចម្លងទុក |
ក្រុមបាតុករ
គ្រវី ទង់ជាតិ កម្ពុជា នៅមុខស្ថានទូត វៀតណាម
នៅពេល ពួកគេ ធ្វើបាតុកម្ម ទាមទារ ឲ្យអ្នកនាំពាក្យ ស្ថានទូតនេះ សុំទោស ជាសាធារណៈ
(រូបថត៖ ញឹម សុខន)
ក្រោយពេល គណបក្ស សង្គ្រោះជាតិ ត្រូវ បានគាបសង្កត់ ឲ្យចូលសភា ទាំងបង្ខំ ក្នុងកិច្ចប្រជុំ សភាដំបូង កាលពីថ្ងៃ ទី៨ សីហា ២០១៤, លោក ហ៊ុន សែន បានមាន ប្រសាសន៍ ថា, ផ្អែកលើស្មារតី នៃកិច្ចព្រមព្រៀង ជាមួយ គណបក្ស សង្គ្រោះជាតិ លោក សង្ឃឹម ថា នឹងលែងមាន ការហៅ គណបក្ស ប្រជាជនកម្ពុជា ថា ជាអាយ៉ងយួន បន្តទៀត «ហើយ ខ្ញុំ ក៏សង្ឃឹម យ៉ាងមុតមាំ ថា, ពួកខ្ញុំ ជាគណបក្សប្រជាជន មិនក្លាយទៅ ជាអាយ៉ងយួន ទៀតទេ បើយោង ទៅលើអ្វី ដែលជាសម្ដី របស់ -- បើ ឯកឧត្តម ឲ្យខ្ញុំ ធ្វើជាយួន អស់ទៅហើយ ទៅជាវៀតណាម អស់ទៅហើយ, អុីចឹង មានន័យ ថា យើង នៅតែ ជាសត្រូវ ជាមួយគ្នា, គ្រាន់តែ មកនិយាយ យកល្អ រៀងខ្លួន។»
ផ្អែកលើប្រសាសន៍របស់លោកហ៊ុន សែន ប៉ុណ្ណេះ តើអាចបញ្ឈប់ប្រជាពលរដ្ឋខ្មែរមិនឲ្យហៅគណបក្សប្រជាជនកម្ពុជា ឬហៅលោកហ៊ុន សែន ថាជាអាយ៉ងយួនបានដែរឬទេ?
អ្នកវិភាគនយោបាយ លោកបណ្ឌិតឡៅ ម៉ុងហៃ មានប្រសាសន៍ថា រដ្ឋាភិបាលមួយដែលបង្កើតដោយយោធាបរទេស ដែលចូលមកឈ្លានពាន គេហៅថា ជារដ្ឋាភិបាលអាយ៉ង។ លោកបណ្ឌិតឡៅ ម៉ុងហៃ បានលើកឧទាហរណ៍ពីរទាក់ទងនឹងរដ្ឋាភិបាលអាយ៉ងនេះ គឺរដ្ឋម៉ាន់ជូកូ នៅភាគឦសានប្រទេសចិន ដែលបង្កើតដោយយោធាជប៉ុននៅក្នុងសម័យសង្គ្រាមលោកលើកទី២ ពេលនោះគេហៅរដ្ឋម៉ាន់ជូកូថាជាអាយ៉ងជប៉ុន ចំណែកឯនៅអឺរ៉ុបវិញ ក្នុងសម័យសង្គ្រាមលោកលើកទី២ផងដែរ អាល្លឺម៉ង់បានឈ្លានពានប្រទេសណ័រវ៉េស ហើយបានបង្កើតរដ្ឋាភិបាលមួយនៅទីនោះ គេក៏ហៅថារដ្ឋាភិបាលអាយ៉ងអាល្លឺម៉ង់។ ចំណែកឯនៅកម្ពុជាវិញ លោកបណ្ឌិតបន្តថា គេហៅថារដ្ឋាភិបាលអាយ៉ងយួនតាំងពីក្រោយថ្ងៃ៧ មករា ឆ្នាំ១៩៧៩ម្ល៉េះ ព្រោះវាបង្កើតឡើងដោយទ័ពវៀតណាមដែលចូលឈ្លានពានកម្ពុជា ហើយមេដឹកនាំបច្ចុប្បន្នបន្តពីសម័យនោះមកដល់បច្ចុប្បន្ន «កាល ប្រទេសយួន កងទ័ពយួនហ្នឹងចូលឈ្លានពានប្រទេសកម្ពុជា បានបង្កើតរបបសាធារណរដ្ឋប្រជាមានិតកម្ពុជាទៅ អ៊ីចឹងហើយបានជាគេប្រៀបធៀបនៅក្នុងប្រវត្តិសាស្ត្រហើយ គេហៅពីមុនៗមកហ្នឹងក៏ជារដ្ឋាភិបាលអាយ៉ងអ៊ីចឹងទៅ។ អាហ្នឹងវាមានប្រវត្តិសាស្ត្រ ហើយដែលចោទប្រកាន់គេថាហៅខុស ក៏មិនត្រូវដែរ។»
ប្រធានផ្នែកស៊ើបអង្កេត នៃសមាគមការពារសិទ្ធិមនុស្សអាដហុក លោក នី ចរិយា មានប្រសាសន៍ថា ការដែលប្រជាពលរដ្ឋរិះគន់អ្នកដឹកនាំប្រទេស គឺជាសារនយោបាយមួយ ដែលធ្វើឲ្យអ្នកដឹកនាំនោះពិនិត្យមើលខ្លួនឯងឡើងវិញ តើមេដឹកនាំនោះធ្វើការធានាឯករាជភាពរបស់ប្រទេសខ្លួនបានឬទេ « ថ្មីៗនេះ វៀតណាមបានអំពាវនាវឲ្យរដ្ឋាភិបាលកម្ពុជា ដាក់ទោសទៅលើប្រជាពលរដ្ឋកម្ពុជា ដែលបានធ្វើការតវ៉ា ទាក់ទងទៅនឹងការឲ្យវៀតណាមសុំទោស ហើយនិងបានធ្វើការដុតទង់ជាតិវៀតណាមអីជាដើមហ្នឹងណា៎ ហើយខ្ញុំយល់ថា ប្រសិនបើការស្នើនេះ ហើយកម្ពុជានឹងអនុវត្តតាម កិច្ចការអស់អ៊ីចឹងៗហើយ ដែលធ្វើឲ្យប៉ះពាល់ទៅដល់អារម្មណ៍របស់ប្រជាជន ហើយធ្វើឲ្យប្រជាជនមានការវាយតម្លៃ។»
លោកនី ចរិយា មានប្រសាសន៍បន្ថែមថា អ្វីដែលសំខាន់គឺនៅលើកិច្ចការរបស់អ្នកដឹកនាំប្រទេសនោះ ថាតើខ្លួនធ្វើឲ្យឃើញថា ជាម្ចាស់ប្រទេសពិតប្រាកដ ឬក៏មិនធ្វើឲ្យក្លាយទៅជាម្ចាស់ប្រទេសពិតប្រាកដទេ។ បានន័យថា វាអាស្រ័យលើសកម្មភាពរបស់អ្នកដឹកនាំខ្លួនឯង។
ទាក់ទងនឹងករណីនេះ តើប្រជាពលរដ្ឋខ្មែរមានមតិយ៉ាងណា?
ពលរដ្ឋខ្មែរម្នាក់ ដែលចូលរួមធ្វើបាតុកម្មនៅមុខស្ថានទូតវៀតណាម កាលពីថ្ងៃទី១២ សីហា ដើម្បីទាមទារឲ្យអ្នកនាំពាក្យស្ថានទូតនេះ សុំទោសចំពោះការបំភ្លៃប្រវត្តិសាស្ត្រទាក់ទងនឹងទឹកដីកម្ពុជាក្រោម អ្នកស្រីលីណា មានប្រសាសន៍ថា អ្នកស្រីមានការឈឺចាប់ចំពោះទង្វើរបស់លោកហ៊ុន សែន ដែលមិនគិតផលប្រយោជន៍ខ្មែរ ហើយបណ្ដែតបណ្ដោយឲ្យជនជាតិវៀតណាមរស់នៅ និងទាញផលប្រយោជន៍ច្រើនពីប្រទេសកម្ពុជា ដែលអ្នកស្រីគិតថា កត្តាទាំងនេះហើយជាកត្តាដែលនាំឲ្យគេហៅថា ជាអាយ៉ងយួន «ហេតុអី គាត់មិនទទួលស្គាល់នូវការពិតរបស់គាត់ទៅ? បើគាត់ទទួលស្គាល់ការពិតផន់គាត់ទៅមានអី។ គាត់ថា កុំឲ្យខ្មែរហៅគាត់ថាអាយ៉ងយួន។ មកពីគាត់បម្រើយួន គាត់មិនមែនបម្រើប្រជាពលរដ្ឋខ្មែរទេ។ បើគាត់បម្រើប្រជាពលរដ្ឋខ្មែរ មិនមែនប្រជាពលរដ្ឋខ្មែរយំស្រែក។»
យុវជនខ្មែរ ដែលហាក់ដូចជាមានអ្នកគាំទ្រច្រើនលើបណ្ដាញទំនាក់ទំនងសង្គម កញ្ញា ធី សុវណ្ណថា កាលពីថ្ងៃ១១ សីហា បានបង្ហោះឃ្លីបវីដេអូខ្លីមួយ នៅលើទំព័រហ្វេសប៊ុក ដែលមានខ្លឹមសារថា បើមិនចង់ឲ្យគេហៅថាអាយ៉ងយួនទេ ទាល់តែគិតផលប្រយោជន៍ខ្មែរឲ្យបានច្រើនជាងគិតប្រយោជន៍បរទេស « ចង់ផ្ដាំទៅលោកហ៊ុន សែន កុំសង្ឃឹមថា គេឈប់ហៅខ្លួនឯងថាអាយ៉ងយួន បើខ្លួនឯងនៅដើរតួជាអាយ៉ងយួនអ៊ីចឹង។ ហើយបើចង់កុំឲ្យគេហៅ ចេះដេញយួនអន្តោប្រវេសន៍ទៅស្រុកវិញ ហើយយកដីសម្បទានហ្នឹងមកវិញផង។»
ជារួម ផ្អែកតាមមតិរបស់អ្នកសង្កេតការណ៍នយោបាយ និងអ្នកច្បាប់ ក៏ដូចជាប្រជាពលរដ្ឋខ្មែរ ឃើញថា ការដែលប្រជាពលរដ្ឋហៅមេដឹកនាំណាម្នាក់ ថាជាអាយ៉ងបរទេស គឺអាស្រ័យលើកិច្ចការរបស់មេដឹកនាំប្រទេសនោះ៕
No comments:
Post a Comment