អ្នកភូមិ អះអាង ថា, វៀតណាម បន្ត ចូលកាប់ឈើ នៅរតនគិរី
RFA | ២៤ សីហា ២០១៤
ជនជាតិ វៀតណាម ទាំងពីរ នាក់នេះ បានចូលមក កាប់ឈើ នៅដីខ្មែរ
ចំណុច ប៉ុស្តិ៍ នគរបាល ការពារព្រំដែន ច្រកអូរថ្មដា
ក្នុងស្រុក អូរយ៉ាដាវ ខេត្ត រតនគិរី កាលពីថ្ងៃ ទី២៥ ខែវិច្ឆិកា
ឆ្នាំ២០១៣។ Photo Provided
អ្នកភូមិ ជនជាតិដើម ភាគតិច ចារ៉ាយ រស់នៅ តំបន់ព្រៃ ខេត្ត រតនគិរី ជាប់ព្រំដែន ប្រទេស វៀតណាម អះអាង ថា, ជនជាតិ វៀតណាម នៅតែ បន្តឆ្លងដែន ចូលមក អាររំលំឈើ ក្នុងដីខ្មែរ, ហើយ ដឹកជញ្ជូន ទៅប្រទេស វៀតណាម ដោយគ្មាន ការទប់ស្កាត់ ពីតម្រួត ព្រំដែនខ្មែរ។
ការចោទប្រកាន់នេះ ធ្វើឡើង នៅថ្ងៃ ទី២៤ ខែសីហា បន្ទាប់ ពីអ្នកល្បាតព្រៃ សហគមន៍ភូមិ ឡំកន ចំនួន ៧នាក់ បានប្រទះ ឃើញជនជាតិ វៀតណាម ៤នាក់ កំពុង ដឹកជញ្ជូន ឈើ តាមម៉ូតូ គ្រប់គ្នា នៅក្នុងព្រៃ ដីខ្មែរ ចម្ងាយ ប្រមាណ ៣គីឡូម៉ែត្រ ពីប៉ុស្តិ៍ ការពារ ព្រំដែនខ្មែរ អូរថ្មដា។
តំណាង សហគមន៍ ភូមិឡំ ឃុំ ប៉ក់ញ៉ៃ ស្រុក អូរយ៉ាដាវ, លោក រចំ ខាំ រៀបរាប់ ថា, កាលពីថ្ងៃ ទី២២ ខែសីហា ជនជាតិ វៀតណាម ទាំងនោះ ព្យាយាម ធ្វើកាំបិត ដំបង វាយតបត ជាមួយ សហគមន៍ ដែលព្យាយាម ឃាត់ខ្លួន ពួកគេ និងវត្ថុតាង ល្មើស។ ពលរដ្ឋ វៀតណាមនោះ បញ្ជាក់ថា, តម្រួតព្រំដែន អូរថ្មដា ជាអ្នកអនុញ្ញាត ឲ្យពួកគេ ចូលកាប់ឈើ។
លោក កត់សម្គាល់ថា, នេះ គឺ ជាបទល្មើស ព្រៃឈើ ថ្មី មួយទៀត ដែលជនជាតិ វៀតណាម ប្រើប្រាស់ មធ្យោបាយ ដឹកជញ្ជូន ទ្រង់ទ្រាយ តូចតាម រយៈម៉ូតូ ជាក្រុមនាំឈើ ចូលទៅទឹកដី វៀតណាម៖ «ដីខ្មែរយើង, ប៉ុន្តែ វា ឆ្លងហួស ប៉ុស្តិ៍ ថ្មដាហ្នឹង។ អត់ហ៊ាន ចាប់ទេ។ អាពួកយួនហ្នឹង, គេ ចង់វាយ ពួកភូមិ ឡំកនហ្នឹង។ គាត់ កាត់កាំបិតមួយ, ហើយ គេ កាន់ឈើ គ្រប់គ្នា តែម្ដង។ ខ្ញុំ សួរពូកយួនៗ ថា, ប៉ុស្តិ៍ បើក ឲ្យខ្ញុំចូល។»
វិទ្យុអាស៊ីសេរីនៅថ្ងៃទី២៤ ខែសីហា បានទូរស័ព្ទទៅមេបញ្ជាការនគរបាលការពារព្រំដែនវរៈ ៦២៣ លោក ងួន សុវណ្ណា សុំបំភ្លឺការចោទប្រកាន់នេះ ប៉ុន្តែទូរស័ព្ទលោកមិនមានអ្នកទទួលការហៅចូល។
យ៉ាងនេះក្តី នាយនគរបាលប៉ុស្តិ៍ឃុំប៉ក់ញ៉ៃ លោក ពួយ ច្រូច កត់សំគាល់ថា សហគមន៍បានផ្ដល់ព័ត៌មាន និងសុំកិច្ចអន្តរាគមន៍ពីប៉ូលិសមូលដ្ឋាន។ លោកថា តំបន់នោះឋិតក្នុងព្រៃជាប់នឹងតំបន់ព្រំដែន ហេតុនេះប៉ូលិសមូលដ្ឋានមិនអាចចាត់ការទាន់ពេលវេលាដើម្បីបង្ក្រាប បទល្មើសព្រៃឈើនោះបានទេ៖ «គេរាយការណ៍មកថា ឃើញវៀតណាម ឃើញឈើ ខ្ញុំថា យើងសួរឲ្យច្បាស់មើលអ្នកណាឲ្យចូល។ បើឃើញចូលមកទៀតរាយការណ៍មកខ្ញុំជាបន្ទាន់ ខ្ញុំនឹងទៅចាប់។ បើឃើញហើយអត់រាយការណ៍មកខ្ញុំ ម៉េចខ្ញុំដឹង ព្រោះខ្ញុំមាននៅជិតបងប្អូនប្រជាពលរដ្ឋឯណា។»
របាយការណ៍អង្កេតរបស់មន្ត្រីឃ្លាំមើលបញ្ហាព្រៃឈើសមាគមអាដហុក កាលពីឆ្នាំ២០១២ និង២០១៣ សហគមន៍ភូមិឡំ បានបង្ក្រាបនិងរឹបអូសម៉ាស៊ីនកាត់ឈើ ម៉ូតូ ត្រាក់ទ័រ និងរថយន្តដឹកឈើ រួមទាំងឃាត់ខ្លួនជនជាតិវៀតណាម អ្នកចូលព្រៃកាប់ឈើក្នុងដីខ្មែរប្រមាណ ៥ករណី។ ក្នុងនោះក៏ឃើញមានសមត្ថកិច្ចប៉ូលិសការពារព្រំដែនអូរថ្មដា បានចូលខ្លួនមកសម្របសម្រួលឲ្យសហគមន៍ដោះលែង និងប្រគល់គ្រឿងចក្រទៅឲ្យពលរដ្ឋវៀតណាម នោះវិញ។
មន្ត្រីសម្របសម្រួលអង្គការអាដហុក ខេត្តរតនគិរី លោក ឆាយ ធី ចាត់ទុកទង្វើរបស់សមត្ថកិច្ចព្រំដែនថា ជាចេតនាឃុបឃិតនាំឲ្យមានបទល្មើសព្រៃឈើឆ្លងដែនកើតឡើងមិនឈប់ឈរ។ លោកអំពាវនាវឲ្យអាជ្ញាធរខេត្តស៊ើបអង្កេតនិងទប់ស្កាត់ករណីនេះ៖ «យើង ឃើញកន្លងមកមានការលួចឆ្លងដែនចូល ហើយលើកមុនៗមានទ្រង់ទ្រាយធំរហូតមានត្រាក់ទ័រ រថយន្តរ៉េវជាដើម។ បើសិនជាមិនមានការបណ្ដែតបណ្ដោយឃុបឃិតរវាងមន្ត្រីប៉ុស្តិ៍តាមច្រក របៀងទេ គឺជនជាតិវៀតណាម មិនអាចឆ្លងដែនចូលដោយខុសច្បាប់ ហើយកាប់ឈើដោយខុសច្បាប់ក្នុងទឹកដីខ្មែរយើងបានទេ។»
ចាប់ពីចុងឆ្នាំ២០១២ រហូតបច្ចុប្បន្ន ជនជាតិវៀតណាមប្រមាណ ៩នាក់ ត្រូវបានសហគមន៍ភូមិឡំ រួមជាមួយមន្ត្រីរដ្ឋបាលព្រៃឈើឃាត់ខ្លួនបញ្ជូនទៅតុលាការដោយសារ ឆ្លងដែនចូលកាប់ឈើក្នុងដីខ្មែរនៅចំណុចប៉ុស្តិ៍ការពារព្រំដែន ភ្នំក្រហម និងប៉ុស្តិ៍អូរថ្មដា ក្នុងស្រុកអូរយ៉ាដាវ៕
No comments:
Post a Comment