តើ កត្តាអ្វីខ្លះ ដែលថា, គណបក្ស ប្រជាជនកម្ពុជា គាបសង្កត់ គណបក្ស សង្គ្រោះជាតិ?
RFA | ៩ សីហា ២០១៤
លោក សម រង្ស៊ី ប្រធាន គណបក្ស សង្គ្រោះជាតិ ចូលប្រជុំ សភា កាលពីថ្ងៃ ទី៨ ខែសីហា ឆ្នាំ២០១៤។ RFA/Yeang Socheametta
គណបក្ស សង្គ្រោះជាតិ ធ្លាប់បានបង្ហាញ ជំហរ យ៉ាងរឹងមាំ ក្នុងការប្រយុទ្ធ តទល់ ជាមួយ គូបដិបក្ខ ដ៏ធំ នៅក្នុង ការប្រកួតប្រជែង នយោបាយ នៅក្នុងការបោះឆ្នោត នីតិកាល ទី៥នេះ។ ក៏ប៉ុន្តែ លទ្ធផល នៃការបោះឆ្នោត ធ្វើឲ្យ គណបក្ស ប្រឆាំង ដ៏ធំមួយនេះ ខកចិត្ត និងប្រកាស មិនទទួល លទ្ធផល បោះឆ្នោត ដោយចោទប្រកាន់ ថា គ.ជ.ប. មិនឯករាជ្យ និងមានភាព មិនប្រក្រតី នៃការរៀបចំ ការបោះឆ្នោតនោះ។
គណបក្ស សង្គ្រោះជាតិ បានរៀបចំ ឈុតឆាក របស់ខ្លួន ដើម្បី ដឹកនាំតទល់ ជាមួយ គណបក្ស ប្រជាជនកម្ពុជា ដោយទាមទារ រកយុត្តិធម៌ ជូនម្ចាស់ឆ្នោត ឡើងវិញ។ ក៏ប៉ុន្តែ ការរៀបចំ ឈុតឆាកដឹកនាំ ប្រជាពលរដ្ឋ ធ្វើបាតុកម្ម ជាបន្តបន្ទាប់នេះ មិនទទួលបាន ជោគជ័យ នៅឡើយ ដោយសារ តែ មានការគាបសង្កត់ ពីគណបក្ស កាន់អំណាច ឯកបក្ស។
តើ កត្តាអ្វីខ្លះ ដែលថា, គណបក្ស ប្រជាជនកម្ពុជា គាបសង្កត់ គណបក្ស សង្គ្រោះជាតិ ដើម្បី ចាប់បង្ខំ ឲ្យគណបក្សនេះ ទទួលយកលទ្ធផល ចរចានោះ?
ការគំរាមកំហែងពីគណបក្សកាន់អំណាច មានឥទ្ធិពលមកលើបក្សប្រឆាំង ឬគណបក្សដែលត្រូវចូលប្រកួតប្រជែងក្នុងការបោះឆ្នោតជ្រើសតាំង តំណាងរាស្ត្រប្រមាណ ៤អាណត្តិមកហើយ។
អាណត្តិចុងក្រោយនេះ គណបក្សប្រឆាំងដ៏មានប្រជាប្រិយភាពចំនួនពីរ គឺគណបក្ស សម រង្ស៊ី និងគណបក្សសិទ្ធិមនុស្ស បានចាប់យកយុទ្ធសាស្ត្ររួបរួមគ្នាជាកម្លាំងតែមួយ និងបានប្ដូរឈ្មោះទៅជាគណបក្សសង្គ្រោះជាតិ នៅមុនពេលចូលរួមប្រកួតប្រជែងបោះឆ្នោត កាលពីថ្ងៃទី២៨ កក្កដា ឆ្នាំ២០១៣ ដើម្បីកៀរគរកម្លាំងមហាជនជាខ្នងបង្អែក ចង់ដណ្ដើមយកជម្នះឲ្យបាននូវការគំរាមកំហែង រហូតប្រើពាក្យស្លោកថា "ទិញមិនលក់ សម្លុតមិនខ្លាច បំបែកមិនក៏បាន»។ ប៉ុន្តែពាក្យនេះ វាហាក់រសាត់ទៅឆ្ងាយបន្តិចម្តងៗទៅហើយ គឺក្រោយពីគណបក្សប្រឆាំងធំមួយនេះ ដែលមានតំណាងរាស្ត្រ ៥៥រូប ដើរចូលសភា កាលពីព្រឹកថ្ងៃទី៨ ខែសីហា ឆ្នាំ២០១៤។
នៅមុនមានការត្រូវរ៉ូវគ្នាចូលប្រជុំសភានេះ ប្រព័ន្ធតុលាការត្រូវគេមើលឃើញថា ជាតួអង្គមួយ ឬជាឧបករណ៍សំខាន់របស់បក្សកាន់អំណាច ដើម្បីជាន់កបន្ថែមពីលើកងកម្លាំងសមត្ថកិច្ច ដើម្បីឲ្យភាគីម្ខាងទៀត មិនអាចឲ្យងើបមុខរួច ទោះបីជាមិនបានគំរាមសម្លាប់បុគ្គលឥស្សរជននយោបាយដូចអាណត្តិមុនៗ ក្តី។
អ្នកឃ្លាំមើលស្ថានការណ៍នយោបាយ សង្គមស៊ីវិល និងប្រជាពលរដ្ឋ ចង់ឲ្យបក្សនយោបាយទាំងសងខាងចូលធ្វើការរួមគ្នា ដោយភាពឯករាជ្យ ឬមិនស្ថិតក្នុងស្ថានភាពគំរាមកំហែងណាមួយឡើយ។
ទាក់ទងបញ្ហានេះ ប្រធានអង្គការ និកហ្វិច (Nicfec) លោកបណ្ឌិត ហង្ស ពុទ្ធា មើលឃើញថា ក្នុងដំណាក់កាលចុងក្រោយនេះ គណបក្សនយោបាយដែលមានអាសនៈក្នុងសភា ដាច់ចិត្តចូលប្រជុំរួមគ្នានោះ គឺដោយសារគណបក្សជាប់ឆ្នោតស្ថិតនៅក្នុងភាពទាល់ច្រករៀងៗខ្លួន៖ «ពីព្រោះ គណបក្សទាំងពីរបានសម្ដែងសក្ដានុពលរៀងខ្លួនហើយ ហើយទីបញ្ចប់ ខ្លួនឯងមិនអាចទៅជាមនុស្សផ្តាច់មុខបាន នៅក្នុងការងារនយោបាយ។ អ៊ីចឹងមានតែងាកមករកការចរចា ដើម្បីផលប្រយោជន៍នៃបក្សទាំងពីរផង និងរួមគ្នាស្ថាបនាជាតិផង។»
លោកមើលឃើញថា ការទាល់ច្រកនេះ កើតមានទាំងសងខាង។ គណបក្សប្រជាជនកម្ពុជា ទោះបីជាអ្នកកាន់រដ្ឋាភិបាល មានសិទ្ធិអំណាចច្រើនជាងគេ ប៉ុន្តែក៏នៅតែរងសម្ពាធខ្លះដែរ ដូចមានសម្ពាធពីសហគមន៍អន្តរជាតិ ការផ្អាកផ្តល់ជំនួយ ការផ្តាច់ខ្លួនរបស់អ្នកវិនិយោគទុនធំៗ ដោយមានបក្សប្រឆាំងនៅក្រៅរដ្ឋាភិបាល និងក្រៅសភា ដែលធ្វើឲ្យរាំងស្ទះដល់ដំណើរការដឹកនាំរដ្ឋាភិបាល ពិសេសធ្វើឲ្យកំណើនសេដ្ឋកិច្ចជាតិមានការលំបាក។ ក្រៅពីនេះទៀត វិបត្តិសង្គមជាច្រើនកើតមាន ទាំងវិបត្តិអត់ការងារ យុវជនជាច្រើនធ្វើចំណាកស្រុក វិបត្តិដីធ្លី អ្នករងគ្រោះដីធ្លីធ្វើបាតុកម្មជាបន្តបន្ទាប់ មានអំពើពុករលួយ ជាដើម។ ចំណែកខាងគណបក្សសង្គ្រោះជាតិ វិញ ក្រៅពីការធ្វើបាតុកម្ម គឺពុំមានលទ្ធផលអ្វីដើម្បីមកបំពេញចិត្តអ្នកគាំទ្រខ្លួន ដោយសារតែការរាំងខ្ទប់ពីរដ្ឋាភិបាលឯកបក្ស ការប្រើកងកម្លាំងប្រដាប់អាវុធដើម្បីបង្ក្រាប រហូតដល់ការបិទទីលានប្រជាធិបតេយ្យ ជាដើម។ ដូច្នេះ ជម្រើសចុងក្រោយមានតែការចរចាបញ្ចប់បញ្ហា និងបង្ខំចិត្តទទួលយកលទ្ធផលនៃការចរចានោះ ទោះបីជាខ្លួនមិនបានពេញចិត្ត ១០០% ក្ដី។
នៅរាល់ការចរចាម្តងៗ គណបក្សកាន់អំណាចតែងតែមានប្រៀបជាង និងបានប្រើពាក្យស៊កសៀតឌឺដងអោយគណបក្សដៃគូ ដោយប្រើយុត្តិសាស្ត្រលួងលោមផង បង្ខំផង ដែលទម្លាប់ទាំងនេះ គណបក្សប្រជាជន ធ្លាប់ប្រើបានជោគជ័យតាំងពីជំនាន់គណបក្សហ៊្វុនស៊ិនប៉ិច មកម្ល៉េះ ដែលទីបំផុតគណបក្សដ៏ធំដែលធ្លាប់ដឹកនាំរដ្ឋាភិបាលមួយនេះ រលាយអាសនៈនៅក្នុងរដ្ឋសភា។ ព្រឹត្តិការណ៍ដែលងាយចំណាំជាងគេ គឺការចរចាចុងក្រោយ កាលពីថ្ងៃទី២២ កក្កដា រវាងថ្នាក់ដឹកនាំកំពូលគណបក្សទាំងពីរ។
មន្ត្រីជាន់ខ្ពស់របស់គណបក្សប្រជាជនកម្ពុជា បានព្រលយពាក្យមុនការចរចាចាប់ផ្ដើមថា បើការចរចាលើកនេះមិនត្រូវគ្នាទេ សូមរង់ចាំជួបគ្នានៅឆ្នាំ២០១៨ បន្តទៀត គឺការបោះឆ្នោតអាណត្តិក្រោយ ហើយចំពោះអ្នកជាប់ឃុំទាំង ៨នាក់របស់គណបក្សសង្គ្រោះជាតិ នោះ កុំសង្ឃឹមរួចខ្លួន គឺត្រូវអនុវត្តតាមច្បាប់ ឬនីតិវិធីរបស់តុលាការ នឹងអាចចាប់ខ្លួនបន្តទៀត ព្រមទាំងមានការដាក់ជាសំណួរប្រយោលចោលថា តើចង់ចូលគុក ឬចង់ចូលសភា? នេះជាការបង្ហើបឲ្យដឹងពីមន្ត្រីជាន់ខ្ពស់គណបក្សសង្គ្រោះជាតិ មួយរូប។
ក្នុងការចាប់ផ្ដើមដំបូងបំផុតនៃការចរចា គឺនិយាយអំពីការដោះលែងអ្នកទាំង ៨នាក់នោះ ហើយបញ្ហានេះហើយដែលនាំឲ្យមានជាលទ្ធផលត្រូវរ៉ូវគ្នាយ៉ាង ប្រញាប់ប្រញាល់ លើភាពជាប់គាំងផ្នែកនយោបាយដឹកនាំប្រទេស ដែលអូសបន្លាយជិតមួយឆ្នាំមកហើយនោះ។ ក្រោយការចរចាបានបញ្ចប់តែប៉ុន្មានម៉ោងប៉ុណ្ណោះ មនុស្ស ៨នាក់របស់គណបក្សសង្គ្រោះជាតិ ត្រូវដោះលែងដោយឈរលើស្មារតីយោគយល់គ្នា ទូទាត់កាត់កងក្នុងការចរចានោះ ដោយទុកច្បាប់ចោលមួយឡែកសិន។ នៅក្រោយបញ្ចប់ការចរចា លោក សម រង្ស៊ី បានឆ្លើយប្រាប់អ្នកកាសែតយ៉ាងខ្លីថា ការទទួលយកលទ្ធផលនេះដោយសារតែអស់ជម្រើស។
លោកបណ្ឌិត ហង្ស ពុទ្ធា ថា តាមរយៈពាក្យសម្ដីតំណាងគណបក្សប្រជាជនកម្ពុជា ពេលខ្លះ បានរុញឲ្យគណបក្សសង្គ្រោះជាតិ មានភាពទាល់ច្រក និងបង្ហាញនូវភាពដាច់ខាតថា ត្រូវតែមានគណបក្សប្រជាជនកម្ពុជា ក្នុងការដោះស្រាយបញ្ហាជាតិ និងដោះស្រាយអោយគណបក្សសង្គ្រោះជាតិ មានឱកាសអង្គុយធ្វើការក្នុងរដ្ឋសភា ដោយមិនឆ្លុះបញ្ចាំងពីឥទ្ធិពលរបស់គណបក្សប្រឆាំងនោះទេ។
ចំណែកក្នុងដំណាក់កាលនៃការរៀបចំបំពេញបន្ថែមនូវលក្ខន្តិកៈតាម កិច្ចព្រមព្រៀង ដែលជាលទ្ធផលនៃការចរចាដែលមានចំណុចគោលធំៗ ដូចការកែទម្រង់ គ.ជ.ប. ការរៀបចំធ្វើវិសោធនកម្មលើមាត្រាមួយចំនួននៃរដ្ឋធម្មនុញ្ញ ការធ្វើវិសោធនកម្មបទបញ្ជាផ្ទៃក្នុងនៃរដ្ឋសភានោះ មានភាពចម្រូងចម្រាសគ្នាច្រើន។ បញ្ហានេះ ទំនងជាធ្វើឲ្យគណបក្សប្រជាជនកម្ពុជា ខ្លាចគណបក្សសង្គ្រោះជាតិ ង៉ក់ងមិនចូលប្រជុំសភា ឬអូសបន្លាយពេលវេលាវែងឆ្ងាយទៅមុខទៀត។
ស្ថិតក្នុងដំណាក់កាលនេះ តុលាការចាប់ផ្ដើមរវល់ជាមួយនឹងគណបក្សទាំងពីរនេះទៀតហើយ ដោយសុខៗ ចៅក្រមសាលាដំបូងរាជធានីភ្នំពេញ បានចេញដីកានាំខ្លួនយុវជនសង្គ្រោះជាតិ ៣នាក់ ដើម្បីសាកសួរ ហើយឃុំខ្លួនបណ្ដោះអាសន្ននៅពន្ធនាគារព្រៃស កាលពីថ្ងៃទី២ ខែសីហា។ បន្ថែមលើនេះទៀត សាលាដំបូងរាជធានីភ្នំពេញ ក៏ចេញដីកាកោះហៅថ្នាក់ដឹកនាំជាន់ខ្ពស់ នៃគណបក្សសង្គ្រោះជាតិ ៩រូបទៀត ក្នុងនោះមាន លោក កឹម សុខា ផង ឲ្យចូលខ្លួនទៅបំភ្លឺនៅសាលាដំបូងរាជធានីភ្នំពេញជាថ្មី ចាប់ពីថ្ងៃទី៨ ដល់ថ្ងៃទី១៣ សីហា ដើម្បីសាកសួរលើរឿងចាស់ គឺការដឹកនាំធ្វើបាតុកម្មកាលពីថ្ងៃទី១៥ កក្កដា កន្លងទៅ។
ការកោះហៅនេះ អ្នកឃ្លាំមើលផ្នែកសិទ្ធិមនុស្ស សម្ដែងការភ្ញាក់ផ្អើល នៅពេលគណបក្សទាំងពីរចរចាជាកញ្ចប់ ដើម្បីបញ្ចប់ជម្លោះនយោបាយរួចទៅហើយ។ ការកោះហៅជាថ្មីនេះ អាចមកពីគណបក្សសង្គ្រោះជាតិ នៅរារែកមិនទាន់ចង់ចូលប្រជុំសភាភ្លាមៗ ក្រោយពីចរចាត្រូវរ៉ូវគ្នាកាលពីថ្ងៃទី២២ កក្កដា នោះ។
ព្រឹត្តិការណ៍នេះ ហាក់ធ្វើឲ្យគណបក្សសង្គ្រោះជាតិ ភ័យស្លន់ស្លោ ហើយកោះហៅតំណាងរាស្ត្ររបស់ខ្លួនចូលស្បថក្នុងវាំង ក្រោមអធិបតីភាពព្រះមហាក្សត្រ និងមានប្រធានរដ្ឋសភា លោក ហេង សំរិន ប្រធានកិត្តិយសនៃគណបក្សប្រជាជនកម្ពុជា ចូលរួមជាសាក្សីផង។ នៅក្រោយពេលស្បថរួច នៅខាងព្រះបរមរាជវាំង អនុប្រធានគណបក្សសង្គ្រោះជាតិ លោក កឹម សុខា ហាក់ទទួលស្គាល់ថា អ្វីៗធ្វើឡើងដោយមានការគំរាមកំហែង ហើយទីបំផុត បាននាំគ្នាចូលប្រជុំសភានៅថ្ងៃទី៨ សីហា៖ «យើងដឹងហើយថា អំពើគំរាមកំហែងយើងដឹងទាំងអស់គ្នា ប៉ុន្តែគណបក្សសង្គ្រោះជាតិ បានកំណត់ខ្លួនឯងហើយថា អតិបរិមា តិចផុតដែលយើងត្រូវទទួល គឺអី? គឺ គ.ជ.ប.។»
ម្យ៉ាងទៀត លោកថា ការចូលស្បថនេះជាការបំពេញនូវអ្វីដែលបានសន្យា មានអភ័យឯកសិទ្ធិពេញលេញ ដែលអាចឲ្យគណបក្សលោកធ្វើការតស៊ូមតិដោយអហិង្សាតទៅទៀត ដោយអត់មានប្រព័ន្ធតុលាការណាយកមកគំរាមកំហែងឲ្យភ័យខ្លាចបន្តទៅ ថ្ងៃមុខទៀត។ ប៉ុន្តែមុនការកំណត់ពេលចូលប្រជុំសភាមួយថ្ងៃ គឺថ្ងៃទី៨ សីហា បក្សសង្គ្រោះជាតិ ហាក់មានការរារែក។
លោកនាយករដ្ឋមន្ត្រី ហ៊ុន សែន ឃើញសភាពការណ៍បែបនេះ កាលពីថ្ងៃទី៧ សីហា លោកបានព្រមានជាសាធារណៈថា នឹងមិនបោះឆ្នោតគាំទ្របេក្ខជនអនុប្រធានរដ្ឋសភា និងគណៈកម្មាធិការរដ្ឋសភាមួយចំនួនទៀត ប្រសិនបើគណបក្សសង្គ្រោះជាតិ បន្តមិនព្រមបញ្ចប់ដំណើរការដោះស្រាយវិបត្តិនយោបាយជាមួយនឹងបក្ស ប្រជាជនកម្ពុជា ដោយចូលប្រជុំសភាតាមថ្ងៃកំណត់នោះទេ។ លោកបន្តថា លោកបានចលនាហើយថាឲ្យសមាជិកសមាជិកាគណបក្សប្រជាជនកម្ពុជា បោះឆ្នោតគាំទ្របេក្ខភាពដាក់មកពីគណបក្សសង្គ្រោះជាតិ តាមការសន្យា ប៉ុន្តែបើសិនជាបក្សប្រជាជនកម្ពុជា មិនបោះឆ្នោតឲ្យទេ មួយអាណត្តិនេះ គណបក្សសង្គ្រោះជាតិ គ្មានឱកាសធ្វើអនុប្រធានរដ្ឋសភា និងគណៈកម្មការទាំងអស់នៅក្នុងរដ្ឋសភា៖ «អ៊ីចឹងត្រូវពឹងផ្អែកទាំង ស្រុងលើសន្លឹកឆ្នោតគណបក្សប្រជាជន ហើយវាចាំបាច់ត្រូវមានវត្តមានរបស់ខ្ញុំ តាំងពីការចាប់ផ្ដើម អ៊ីចឹងទេសូមឲ្យយល់ពីការលំបាករបស់ខ្ញុំផង ត្រេតត្រត តែមិនស្រួលខ្ញុំធ្វើចលនាតែបងប្អូនមិនព្រមបោះ ខ្ញុំមិនដឹងធ្វើម៉េចដែរ។»
ទាក់ទងនឹងការគំរាមកំហែងនេះដែរ អ្នកវិភាគឯករាជ្យ លោកបណ្ឌិត សុខ ទូច មានប្រសាសន៍ថា គណបក្សទាំងពីរនេះមានការគំរាមកំហែងគ្នាទៅវិញទៅមកដូចគ្នា ដោយប្រើយុទ្ធសាស្ត្រផ្សេងៗគ្នា។ គណបក្សសង្គ្រោះជាតិ ប្រើកម្លាំងមហាជនធ្វើបាតុកម្ម ចំណែកគណបក្សប្រជាជន បិទទីលានប្រជាធិបតេយ្យ ដែលជាកន្លែងជួបជុំមហាជនសំខាន់ និងប្រើកម្លាំងសមត្ថកិច្ចវាយបង្ក្រាប ហើយចុងក្រោយ ប្រើប្រព័ន្ធតុលាការក្នុងការដោះស្រាយបញ្ហា ហើយការគំរាមនាដំណាក់កាលចុងក្រោយនេះ ធ្វើឲ្យការទាមទាររបស់គណបក្សប្រឆាំងភាគច្រើនត្រូវរលាយ៖ «ការ គំរាមកំហែងរបស់បក្សសង្គ្រោះជាតិ មានឥទ្ធិពលពីរ។ ទីមួយ ធ្វើឲ្យអ្នកនយោបាយភ្ញាក់កំណើត ថាអ្វីៗរបស់ខ្លួនមិនមែនអមតៈទៀតទេ។ ទីពីរ ប្រជាជនមានឆន្ទៈចង់បង្ហាញអំពីអំណាចប្រជាជន ថាពួកគាត់ជាម្ចាស់អំណាច ឯគណបក្សប្រជាជន លោកមានសម្ពាធតែមួយគត់ គឺសម្ពាធទៅលើអ្នកទាំង ៥៥នាក់ តែគាត់អត់មានសម្ពាធទៅលើប្រជាជនទេ។ ប្រជាជនបញ្ជាក់ថា លោកអត់ខ្លាចទេ ឲ្យតែមានមេដឹកនាំត្រឹមត្រូវ ប្រជាជននៅតែងើបឡើងធ្វើបាតុកម្ម តស៊ូមតិ បញ្ចេញយោបល់ អ៊ីចឹងអ្នកទាំង ៥៥នាក់នេះខ្លាចជាងប្រជាជនទៀត ដែលប្រជាជនអត់មានអភ័យឯកសិទ្ធិ លោកអត់មានខ្លាចទេ តែអ្នក ៥៥នេះ ពាក្យស្លោកមួយរបស់គាត់ ត្រូវបានបញ្ចប់នៅពេលដែលគណបក្សប្រជាជន ប្រើប្រាស់ប្រព័ន្ធតុលាការ។»
លោក ហ៊ុន សែន ថ្លែងចំអកផ្ទួនៗឲ្យគណបក្សសង្គ្រោះជាតិ នៅក្នុងរដ្ឋសភា កាលពីថ្ងៃទី៨ សីហា ថា អ្វីដែលបានសម្រេចក្នុងកិច្ចព្រមព្រៀងរវាងគណបក្សទាំង២ កាលពីថ្ងៃទី២២ ខែកក្កដា ឆ្នាំ២០១៤ វាមិនខុសគ្នាប៉ុន្មានទៅនឹងស្មារតីនៃការចរចា កាលពីថ្ងៃទី១៧ ខែកញ្ញា ឆ្នាំ២០១៣ នោះទេ។ លើសពីនេះ លោក ហ៊ុន សែន ចាត់ទុកការចូលសភារបស់បក្សប្រឆាំងពេលនេះ ថាជាការភ្ញាក់ខ្លួនរបស់បក្សប្រឆាំង។ ការថ្លែងរបស់ លោក ហ៊ុន សែន នេះ ត្រូវបានអ្នកវិភាគលើកឡើងថា ជាការបង្វែរការចាប់អារម្មណ៍ប្រជាពលរដ្ឋ កុំឲ្យគេចោទប្រកាន់ថា គណបក្សប្រជាជនកម្ពុជា គំរាមគណបក្សសង្គ្រោះជាតិ។ បញ្ហានេះ មន្ត្រីអង្គការសង្គមស៊ីវិល ថាការចូលធ្វើការងារ ដោយមានសម្ពាធនយោបាយនោះ នឹងមិនមានប្រសិទ្ធភាពក្នុងការបម្រើ ឬទាញយកផលប្រយោជន៍សម្រាប់ប្រជារាស្ត្រនោះទេ៕
No comments:
Post a Comment